គម្រោងស្តារ និងលើកកម្រិតគុណភាពផ្លូវជាតិលេខ ៣១ ប្រវែងសរុប ៥៣,៥៣គ.ម ចាប់ពីបែកគុសចំណុចប្រសព្វផ្លូវជាតិលេខ ៣ រហូតទៅដល់ទីរួមស្រុកកំពង់ត្រាចខេត្តកំពតចំណុចតភ្ជាប់ផ្លូវជាតិលេខ ៣៣ វឌ្ឍនភាពមកដល់ពេលនេះសម្រេចបាន ៦០%។ក្នុងដំណើរចុះពិនិត្យ គម្រោងស្តារ និងលើកកម្រិតគុណភាពផ្លូវជាតិលេខ ៣១ ដឹកនាំដោយលោក ខាន់ ម៉ាណេរ រដ្ឋលេខាធិការ ក្រសួងសាធារណការ និងដឹកជញ្ជូន បានពិនិត្យធ្វើតេស្តដោយម៉ាស៊ីន FWD ផ្ទៀងផ្ទាត់ភាពធន់នៃគ្រឹះរង Subbase ស្រទាប់គ្រឹះសំខាន់ Basecourse (ជាមធ្យមលទ្ធផល 453MPa-507MPa) ស្រទាប់កម្រាលកៅស៊ូបេតុង AC ស្រទាប់ទី ១ (439MPa-536MPa) និងខួងពិនិត្យកម្រាស់ស្រទាប់ AC ទី ១ (លទ្ធផល 4,2cm-5cm) ដើម្បីអនុញ្ញាតឱ្យបន្តការងារទៅមុខទៀត។ក្រោយពីបានចុះពិនិត្យផ្ទាល់ លោក ខាន់ ម៉ាណេរ រដ្ឋលេខាធិការបានបញ្ជាក់ថា លទ្ធផលការងារជារួមនៃគម្រោងស្ដារ និងលើកកម្រិតផ្លូវជាតិលេខ ៣១ សម្រេចបាន ៦០ ភាគរយ។ នៅដំណាច់ខែមិថុនា ការងារចាក់បេតុងកៅស៊ូស្រទាប់ទី ១ និងទី ២ នឹងរួចរាល់ដែលអាចឱ្យបងប្អូនប្រជាពលរដ្ឋធ្វើដំណើរបានទៅមកដោយរលូន ហើយការងារផ្សេងៗទៀតដូចជា៖ ការបំពាក់បរិក្ខារផ្លូវថ្នល់ បន្ថែមប្រព័ន្ធបង្ហូរទឹកសងខាងផ្លូវ និងការងារមួយចំនួនផ្សេងទៀត អាចនឹងបញ្ជប់នៅចុងឆ្នាំ២០២៤ នេះ ដោយបញ្ចប់មុនកិច្ចសន្យា ១ ឆ្នាំ។បើតាមមន្រ្តីក្រសួងសាធារណការនិងដឹកជញ្ជូន ការចុះពិនិត្យជាប្រចាំនេះធ្វើឡើងក្នុងគោលបំណងតាមដានការងារបច្ចេកទេសសាងសង់របស់ក្រុមហ៊ុនសំដៅឱ្យការសាងសង់ប្រព្រឹត្តទៅស្របតាមបទដ្ឋានបច្ចេកទេស និងកិច្ចសន្យាសាងសង់ ធានាឱ្យបានការសាងសង់មានគុណភាពរឹងមាំ អាចប្រើប្រាស់ជាប់បានយូរអង្វែង៕