សិក្ខាសាលាស្ដីពី“ការប្រមូលទិន្នន័យវាយតម្លៃតម្រូវការកម្មវិធីបណ្តុះបណ្តាល” រៀបចំដោយវិទ្យាស្ថានតេជោសែន សាធារណការ និងដឹកជញ្ជូន ទីស្តីការក្រសួង៖ ថ្ងៃសុក្រ ទី១៩ ខែមករា ឆ្នាំ២០២៤ លោកជំទាវ ឥម នីថារ៉ា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញចូលរួមជាអធិបតីក្នុងកម្មវិធីសិក្ខាសាលាស្ដីពី “ការប្រមូលទិន្នន័យវាយតម្លៃតម្រូវការកម្មវិធីបណ្តុះបណ្តាល” ជូនដល់ថ្នាក់ដឹកនាំក្រសួង ចាប់ពីកម្រិតប្រធាននាយកដ្ឋាន រហូតដល់កម្រិតអនុរដ្ឋលេខាធិការ និងមានការចូលរួមពីសំណាក់លោក-លោកស្រីថ្នាក់ដឹកនាំ មន្រ្តីរាជការ និងបុគ្គលិកទាំងអស់ នៃវិទ្យាស្ថានតេជោសែន សាធារណការ និងដឹកជញ្ជូន។ សិក្ខាសាលានេះ ធ្វើឡើងក្នុងគោលបំណងប្រមូលធាតុចូល និងព័ត៌មានបន្ថែមឱ្យបានគ្រប់ជ្រុងជ្រោយ ពីសំណាក់សិក្ខាកាមជាថ្នាក់ដឹកនាំក្រសួង សំដៅរៀបចំវគ្គបណ្តុះបណ្តាលឱ្យបានត្រឹមត្រូវ និងប្រកបដោយប្រសិទ្ធភាព ស្របតាមតម្រូវការជាក់ស្ដែងរបស់ថ្នាក់ដឹកនាំ សម្រាប់ពេលបច្ចុប្បន្ន និងអនាគត។ តាមរយៈការរៀបចំសិក្ខាសាលានេះ វិទ្យាស្ថាន ទទួលបានធាតុចូលជាមូលដ្ឋានសម្រាប់ការវិភាគ និងវាយតម្លៃតម្រូវការសម្រាប់កម្មវិធីបណ្តុះបណ្តាលនានាជូនថ្នាក់ដឹកនាំក្រសួង ការពិនិត្យ សិក្សា វាយតម្លៃ និងផ្តល់យោបល់លើវគ្គបណ្តុះបណ្តាលនីមួយៗបានច្បាស់លាស់ ការកំណត់អាទិភាពចំពោះវគ្គបណ្តុះបណ្តាល និងពេលវេលាសមស្របសម្រាប់បើកដំណើរការវគ្គបណ្តុះបណ្តាល និងមានលទ្ធភាពគ្រប់គ្រាន់ដើម្បីស្វែងរកគ្រូឧទ្ទេស ឬអ្នកបណ្តុះបណ្តាលសម្រាប់វគ្គបណ្តុះបណ្តាលតាមតម្រូវការ។ សូមបញ្ជាក់ផងដែរថា៖ ក្រៅពីការអប់រំថ្នាក់ឧត្ដមសិក្សា ការបណ្ដុះបណ្ដាលបច្ចេកទេស វិទ្យាស្ថានតេជោសែន សាធារណការ និងដឹកជញ្ជូន ក៏មានវគ្គបណ្ដុះបណ្ដាលចែករំលែកចំណេះដឹង ជូនដល់ថ្នាក់ដឹកនាំ និងមន្ដ្រីរាជការក្រសួងផងដែរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube