កិច្ចប្រជុំអនុគណៈកម្មការសម្របសម្រួលបទអន្តរាគមន៍សម្រាប់ត្រៀមរៀបចំសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសាធារណការ និងដឹកជញ្ជូន ទីស្តីការក្រសួង៖ នាព្រឹកថ្ងៃព្រហស្បតិ៍ ទី១៨ ខែមករា ឆ្នាំ២០២៤ ឯកឧត្តម វ៉ាស៊ឹម សុរិយា អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំអនុគណៈកម្មការសម្របសម្រួលបទអន្តរាគមន៍សម្រាប់ត្រៀមរៀបចំសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសាធារណការ និងដឹកជញ្ជូន ដោយមានការអញ្ជើញចូលរួមពីឯកឧត្តមអគ្គនាយកផែនការ និងគោលនយោបាយ លោក លោកស្រីតំណាងអគ្គនាយកដ្ឋាន អគ្គាធិការដ្ឋាន វិទ្យាស្ថាន កំពង់ផែស្វយ័ត លោកប្រធានមន្ទីរសាធារណការ និងដឹកជញ្ជូនរាជធានី-ខេត្ត ព្រមទាំងលោក លោកស្រី ជាសមាជិក សមាជិកា គណៈកម្មការជាច្រើនរូបផ្សេងទៀត។ កិច្ចប្រជុំនាឱកាសនេះ ធ្វើឡើងក្នុងគោលបំណង ដើម្បីត្រៀមរៀបចំបទអន្តរាគមន៍របស់បណ្តាអគ្គនាយកដ្ឋាននីមួយៗ និងមន្ទីរ អង្គភាពនានាក្រោមឱវាទក្រសួង ដោយត្រូវរាយការណ៍ជូនអង្គសន្និបាតនូវលទ្ធផលការអនុវត្តការងារឆ្នាំ២០២៣ លើកទិសដៅការងារឆ្នាំ២០២៤ ក្នុងនោះដែរត្រូវរៀបចំបទអន្តរាគមន៍ឱ្យស៊ីសង្វាក់ជាមួយប្រធានបទគោល “ពង្រឹងការអភិវឌ្ឍធនធានមនុស្ស គុណភាពសំណង់ហេដ្ឋារចនាសម្ព័ន្ធ ការរៀបចំច្បាប់-បទដ្ឋានគតិយុត្ត ការផ្តល់សេវា និងការប្រើប្រាស់បច្ចេកវិទ្យានិងឌីជីថល” និងផ្តោតលើចំណុចសំខាន់ៗដូចជា៖ ចំណុចខ្លាំង ចំណុចខ្សោយ បញ្ហាប្រឈម ដំណោះស្រាយ និងសំណូមពរ។ បន្ថែមពីនេះទៀត មន្ទីរសាធារណការ និងដឹកជញ្ជូនខេត្តដែលត្រូវធ្វើបទអន្តរាគមន៍តំណាងឱ្យខេត្តផ្សេងទៀតក្នុងក្រុមជាមួយគ្នា ត្រូវរៀបចំបទបង្ហាញ ដោយសង្កត់ធ្ងន់តាមប្រធានបទដែលបានបែងចែកជូនតាមក្រុមនីមួយៗ និងត្រូវប្រមូលធាតុចូលពីគ្រប់បណ្ដាខេត្តជាសមាជិកក្រុម៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube