ភ្នំពេញៈ គំរោងហេដ្ឋារចនាសម្ព័ន្ឋធំៗជាច្រើន បាននិងកំពុងត្រៀមបញ្ចប់ និងចាប់ផ្តើមសាងសង់នៅឆ្នាំ២០២៤នេះ ខណៈគំរោងធំៗជាច្រើនក៏គ្រោងនឹងបញ្ចប់នៅឆ្នាំនេះផងដែរ។ ផ្លូវជាតិលេខ៥ គំរោងផ្លូវហាយវេអាស៊ាន ផ្លូវជាតិលេខ៥ នឹងបញ្ចប់ការសាងសង់នៅឆ្នាំ២០២៤នេះ ដែលផ្លូវនេះដើរនាទីសំខាន់ ក្នុងការតភ្ជាប់នៃច្រករបៀងភាគខាងត្បូងប្រទេស ដែលតភ្ជាប់រវាងប្រទេសថៃ កម្ពុជា និងវៀតណាម។ផ្លូវប្រវែងជាង៣០០គីឡូម៉ែត្រនេះ គ្រោងចំណាយថវិកាប្រមាណ៥០០លានដុល្លារអាមេរិក និងជាឥណទានហិរញ្ញប្បទាន(ការប្រាក់ទាប)ពីរដ្ឋាភិបាលជប៉ុន។ រាជរដ្ឋាភិបាលកម្ពុជា គ្រោងប្រែក្លាយតំបន់ជាប់ផ្លូវជាតិនេះ ជាសួនឧស្សាហកម្ម ដើម្បីទទួលបានផលប្រយោជន៍ពីការដឹកជញ្ជូនឆ្លងកាត់រវាងប្រទេសថៃ កម្ពុជា និងវៀតណាម ដែលស្ថិតនៅក្នុងយុទ្ឋសាស្រ្តនៃការអភិវឌ្ឈត្បូង ត្បូង។ផ្លូវជាតិលេខ១០ បើគ្មានការប្រែប្រួលទេ ផ្លូវជាតិដ៏សំខាន់ និងជាផ្លូវប្រវត្តិសាស្រ្តនេះ នឹងបញ្ចប់ការសាងសង់នៅចុងឆ្នាំនេះ ឬដើមឆ្នាំ២០២៥ខាងមុខ។ នេះជាផ្លូវតភ្ជាប់តំបន់ភូមិភាគពាយ័ព្យ ដែលជាប៉ូលសេដ្ឋកិច្ចទី៤ របស់ប្រទេស ទៅកាន់តំបន់ឆ្នេររបស់កម្ពុជាជាលើកដំបូង។មន្រ្តីជាន់ខ្ពស់ក្រសួងសាធារណៈការ និងដឹកជញ្ជូនលោកវ៉ា ស៊ីមសូរិយាបានមានប្រសាសន៍ឲ្យដឹងកន្លងមកថា ផ្លូវដ៏សំខាន់នេះ មិនត្រឹមតែតភ្ជាប់រវាងតំបន់ភូមិភាគពាយ័ព្យ និងតំបន់ឆ្នេរប៉ុណ្ណោះទេ តែជាការធ្វើសមាហរណកម្ម នៅផ្ទៃក្នុងប្រទេសផង និងជាការពង្រឹងឯករាជ្យភាពផ្នែកសេដ្ឋកិច្ច ដោយកាត់បន្ថយការពឹងផ្អែក ប្រទេសជិតខាងផងដែរ។ ពិសេសផ្លូវជាតិនេះ នឹងសម្រួលដល់ការដឹកកសិផលពីតំបន់ពាយ័ព្យ មកកាន់កំពង់ផែទឹកជ្រៅ ស្ថិតនៅក្នុងតំបន់តារាសាគរ ខេត្តកោះកុងផងដែរ។គំរោងព្រលានយន្តហោះតារាសាគរខេត្តកោះកុង ប្រសិនជាគ្មានការប្រែប្រួលទេនោះ ព្រលានយន្តហោះតារាសាគរ ខេត្តកោះកុង ដែលអភិវឌ្ឍន៍ដោយក្រុមហ៊ុនTien Jing Development Groupនឹងបើកដំណើរការនៅឆ្នាំនេះ ខណៈការសាងសង់បានបញ្ចប់ ដោយរង់ចាំតែការធ្វើតេស្ត សាកល្បងការហោះហើរនាពេលខាងមុខ។ព្រលានយន្តហោះនេះ នឹងដើរតួនាទីកាន់តែសំខាន់ ក្នុងការលើកកំពស់ការអភិវឌ្ឍនៅតំបន់ឆ្នេរ “តារារះនាទិសនារតី” ឲ្យកាន់តែមានភាពទាក់ទាញទាំងទេសចរណ៍ជាតិ អន្តរជាតិ និងការវិនិយោគផងដែរ។ការបើកសម្ភោធការដ្ឋានសាងសង់ព្រែកជីកហ្វូណនតេជោ គំរោងជីកព្រែកជីកប្រវត្តិសាស្រ្ត ដែលមានប្រវែងជាង១៨០គីឡូម៉ែត្រ និងគ្រោងចំណាយថវិកាសរុប ប្រមាណ១៧០០លានដុល្លារអាមេរិក ទទួលបានការសាទរពីប្រជាពលរដ្ឋ ស្ទើរគ្រប់ទិសទីនៅទូទាំងប្រទេស និងក្រៅប្រទេស។ការជីកព្រែកជាប្រវត្តិសាស្រ្តនេះ មិនត្រឹមតែលើកកំពស់សេដ្ឋកិច្ចជាតិ កាត់បន្ថយការពឹងផ្អែក ប្រទេសជិតខាងប៉ុណ្ណោះទេ តែក៏ពង្រឹងឯករាជ្យភាព ផ្នែកសេដ្ឋកិច្ចរបស់កម្ពុជា ដែលតែងតែរងសម្ភាធពីការពឹងផ្អែកប្រទេសជិតខាងផងដែរ។ព្រែកជីកប្រវត្តិសាស្រ្ត ដែលស្ថិតក្រោមការចង្អុលបង្ហាញដោយសម្តេចតេជោហ៊ុន សែន ប្រធានក្រុមឧត្តមទីប្រឹក្សាព្រះមហាក្សត្រ និងបន្តអនុវត្តន៍ ដោយសម្តេចមហាបវរធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា ក៏បាននិងកំពុងចូលរួមលើក កំពស់សេដ្ឋកិច្ចនៅមូលដ្ឋាន និងលើកកំពស់ការវិនិយោគលើវិស័យសំណង់ និងអចលនទ្រព្យ ដែលធ្វើឲ្យប្រជាពលរដ្ឋរស់នៅ តាមដងព្រែកនេះ ទទួលបានជីវភាពកាន់តែប្រសើរ។ តាមគំរោងព្រែកជីកនេះ នឹងចាប់ផ្តើមចេញពីទន្លេរបាសាក់ ទៅកាន់សមុទ្រក្នុងខេត្តកែប ដែលបណ្តាញគមនាគមនេះ ធ្លាប់ត្រូវបានប្រើប្រាស់នៅសម័យហ្វូណនផងដែរ ប៉ុន្តែការខ្ទេចខ្ទាំប្រទេសដោយសារសង្រ្គាម បានធ្វើឲ្យស្លាកស្នាមជាប្រវត្តិសាស្រ្តមួយចំនួន ត្រូវបាត់បង់គួរឲ្យសោកស្តាយ។តាមប្រភពព័ត៌មានពីក្រសួងសាធារណៈការ និងដឹកជញ្ជូនបានបង្ហើបឲ្យដឹងថា ការបើកការដ្ឋានផ្លូវការលើការជីកព្រែកនេះ នឹងចាប់ផ្តើមនៅមុនពិធីបុណ្យចូលឆ្នាំប្រពៃណីជាតិខាងមុខនេះ។ ការសាងសង់ស្ពានមិត្តភាពកម្ពុជា កូរ៉េភ្នំពេញ អរិយក្សត្រ គំរោងស្ពាន ដែលមានលក្ខណៈដូច “ឥន្ឋនូ” រះឡើងលើផ្ទៃទន្លេរចតុមុខនេះ អាចនឹងចាប់ផ្តើមបើកការដ្ឋានសាងសង់ក្នុងឆ្នាំនេះ ស្របពេលការសិក្សាលើលំហូរទឹក ផលប៉ះពាល់បរិស្ថាន សណ្ឋានតួស្ពាន និងតម្លៃនៃការសាងសង់បានបញ្ចប់រួចហើយ។ស្ពានមិត្តភាពកម្ពុជា កូរ៉េ ដែលគេទន្ទឹងរង់ចាំជាយូរមកហើយនេះ នឹងមិនត្រឹមតែសម្រួលដល់ការធ្វើដំណើរប៉ុណ្ណោះទេ តែវានឹងជាImageមួយលើកកំពស់សោភ័ណភាព រាជធានីភ្នំពេញមួយកម្រិតទៀត ពិសេសធ្វើឲ្យតំបន់អរិយក្សត្រ កាន់តែមានភាពត្រចះត្រចង់បន្ថែមទៀត ខណៈអ្នកអភិវឌ្ឍន៍ធំៗជាច្រើន បានត្រៀមដីទុកជាស្រេច ដើម្បីអភិវឌ្ឈន៍នៅតំបន់នេះនាពេលអនាគត។ ស្ពាននេះ ក៏នឹងរួមចំណែកលើកកំពស់សេដ្ឋកិច្ច នៅមូលដ្ឋាន និងលើកកំពស់ការអភិវឌ្ឍទីក្រុងអរិយក្សត្រ មកកាន់លំដាប់ថ្មីផងដែរ។ ការពង្រីកផ្លូវជាតិលេខ៧ជាពីរគន្លងពីស្គន់ ទៅកាន់ក្រុងកំពង់ចាម ផ្លូវជាតិលេខ៧ ដែលតភ្ជាប់ពីទីប្រជុំជន ស្គន់ ស្ថិតនៅក្នុងស្រុកជើងព្រៃ ទៅកាន់ខេត្តកំពង់ចាម បានបើកការដ្ឋានសម្ភោធការសាងសង់រួចហើយ ប៉ុន្តែដំណើរការហាក់មានសភាពយឺតយ៉ាវ។ ហេតុនេះឆ្នាំ២០២៤ នឹងជាពេលវេលា ដែលក្រុមហ៊ុនចិន អាចនឹងពន្លឿនការសាងសង់ផ្លូវនេះ។ផ្លូវជាតិដ៏សំខាន់នេះ នឹងលើកកំពស់សេដ្ឋកិច្ច និងអភិវឌ្ឍន៍ក្រុងកំពង់ចាម ដែលមានសភាពស្ងប់ស្ងាត់ ឲ្យកាន់តែមានសភាពរសរវើកជាងមុនមួយកម្រិតទៀត។ ការបញ្ចប់ការសាងសង់ផ្លូវហាយវេ និងព្រលានយន្តហោះតេជោក្រុងតាខ្មៅ រហូតមកទល់ពេលនេះ ការស្ថាបនាគំរោងផ្លូវតភ្ជាប់ផ្លូវហាយវេ ពីព្រលានយន្តហោះអន្តរជាតិតេជោ ក្រុងតាខ្មៅ មកកាន់ផ្លូវ៦០ម៉ែត្រ នឹងបញ្ចប់នៅឆ្នាំនេះ ខណៈព្រលានយន្តហោះ លំដាប់ពិភពលោកតម្លៃ១៥០០លានដុល្លារអាមេរិក បានបញ្ចប់ការសាងសង់បានប្រមា ណ៦០ភាគរយផងដែរ ដែលការចំណាយបានកើនឡើងដល់ជាង៨០០លានដុល្លាររួចហើយ។តាមផែនការការសាងសង់ព្រលានយន្តហោះនេះ នឹងបញ្ចប់នៅចុងឆ្នាំនេះ និងត្រៀមបើកដំណើរការជាផ្លួវការ នៅឆ្នាំ២០២៥ខាងមុខ។ គំរោងព្រលានយន្តហោះលំដាប់4Eនេះ នឹងលើកកំពស់ការតភ្ជាប់ផ្លូវអាកាស ជម្រុញការទាក់ទាញក្រុមហ៊ុនអាកាសចរណ៍ ទាក់ទាញការវិនិយោគពីបរទេស ពិសេសធ្វើឲ្យកម្ពុជា នឹងស្ថិតនៅក្នុងផែនទីពិភពលោក ក្នុងរូបភាពថ្មីមួយទៀត ខណៈប្រទេសនេះត្រៀមចាកចេញ ពីឋានៈជាប្រទេសអភិវឌ្ឍន៍តិចតួចនៅឆ្នាំ២០២៧ និងត្រៀមឈានទៅកាន់ឋានៈ ជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងឈានទៅកាន់ឋានៈ ជាប្រទេសមានប្រាក់ចំណូលខ្ពស់ នៅឆ្នាំ២០៥០ខាងមុខផងដែរ៕