តំណាងធនាគារនីហរ័ណ-អាហរ័ណកូរ៉េ ធ្វើបទបង្ហាញអំពីនីតិវិធីនៃការអនុវត្តគម្រោងក្នុងក្របខ័ណ្ឌឥណទានសម្បទានពីមូលនិធិសហប្រតិបត្តិការអភិវឌ្ឍន៍សេដ្ឋកិច្ច(EDCF) កូរ៉េ ទីស្ដីការក្រសួង៖ កាលពីថ្ងៃព្រហស្បតិ៍ ទី១១ ខែមករា ឆ្នាំ២០២៤ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគ្រប់គ្រង និងសម្របសម្រួលគម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់នៅក្រុងតាខ្មៅ (ជំហាន២) បានអញ្ជើញជាអធិបតីក្នុងការធ្វើបទបង្ហាញ និងការពិភាក្សាជាមួយតំណាងធនាគារនីហរ័ណ-អាហរ័ណកូរ៉េ អំពីនីតិវិធីនៃការអនុវត្តគម្រោងក្នុងក្របខ័ណ្ឌឥណទានសម្បទានពីសាធារណរដ្ឋកូរ៉េ (EDCF) ដោយមានការចូលរួមពីថ្នាក់ដឹកនាំក្រសួងទទួលបន្ទុក មន្ត្រីជំនាញបច្ចេកទេស នៃអគ្គនាយកដ្ឋានប្រព័ន្ធចម្រោះទឹកកខ្វក់ និងសមាជិកគ្រប់គ្រងគម្រោងផងដែរ។ តំណាងធនាគារនីហរ័ណ-អាហរ័ណកូរ៉េបានធ្វើបទបង្ហាញអំពីនីតិវិធីនៃការអនុវត្តគម្រោង ដែលរួមមានដូចជា៖ ការកំណត់អត្តសញ្ញាណគម្រោង ការរៀបចំតាមដំណាក់កាលនីមួយៗរបស់គម្រោង ការវាយតម្លៃ និងកិច្ចព្រមព្រៀងកម្ចី ជាដើម។ បទបង្ហាញក៏បានបញ្ជាក់ពីលក្ខណសម្បត្តិនៃការជ្រើសរើសក្រុមហ៊ុនទីប្រឹក្សាគម្រោង ការរចនាប្លង់លម្អិត ការងារលទ្ធកម្ម ការដេញថ្លៃជាសាធារណៈ ក្នុងការជ្រើសរើសក្រុមហ៊ុនសាងសង់ ផ្គត់ផ្គង់សម្ភារ ការត្រួតពិនិត្យ និងវាយតម្លៃលើវឌ្ឍនភាពការងារ និងចុងក្រោយគឺការធ្វើរបាយការណ៍បញ្ចប់គម្រោង ព្រមទាំងវាយតម្លៃទៅលើលទ្ធផលការងារគម្រោងទាំងមូល ដើម្បីជាទស្សទានក្នុងការអនុវត្តគម្រោងបន្តបន្ទាប់ទៀតឱ្យមានគុណភាពប្រសើរឡើង៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube