អ្វីទៅជា “ច្រក ETC” ? ស្វែងយល់ពីច្រកអាទិភាពនេះជាមួយគ្នា ដើម្បីធានាដល់ការចូល-ចេញផ្លូវល្បឿនលឿនដោយមិនបាច់រង់ចាំ “ETC” គឺជាច្រកអាទិភាព ស្ថិតនៅខាងឆ្វេងដៃបង្អស់ នៃបញ្ជរបង់ប្រាក់ផ្លូវល្បឿនលឿនភ្នំពេញ-ក្រុងព្រះសីហនុ មានសញ្ញា ETC នៅពីលើ ហើយមានរបាំងបើក-បិទដោយស្វ័យប្រវត្តិ ដើម្បីឱ្យយានយន្តចូល-ចេញបាន។ ដើម្បីចូល-ចេញច្រកនេះបាន បងប្អូនអ្នកបើកបរត្រូវមានបំពាក់ឧបករណ៍ OBU នៅលើកញ្ចក់រថយន្តផ្នែកខាងមុខជាដាច់ខាត ប្រសិនបើរថយន្តរបស់បងប្អូនដែលមិនបានបំពាក់ឧបករណ៍ OBU នោះទេ គឺមិនអាចចូល-ចេញ “ច្រក ETC” នេះបានឡើយ បើទោះបីជាបានបញ្ចូលទឹកប្រាក់ទៅក្នុងផ្លាកលេខជាមុនក៏ដោយ។ ដើម្បីបំពាក់ឧបករណ៍ OBU បងប្អូនអាចអញ្ជើញទៅធ្វើការចុះឈ្មោះនៅ មណ្ឌលផ្តល់សេវាសាធារណៈទីស្តីការក្រសួងសាធារណការ និងដឹកជញ្ជូន ឬ គ្រប់បណ្តាស្ថានីយបង់ប្រាក់ផ្លូវល្បឿនលឿនទាំង ០៨ទីតាំង ដោយនាំយកទៅជាមួយនូវរថយន្តដែលត្រូវបំពាក់ និងឯកសារតម្រូវ រួមមានដូចខាងក្រោម៖ ១. អត្តសញ្ញាណប័ណ្ណសញ្ជាតិខ្មែរ ២. បណ្ណសម្គាល់យានជំនិះ(កាតគ្រី) និង ៣. វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ(ឆៀក)។ សូមបញ្ជាក់ផងដែរថា៖ ប្រសិនបើមិនបានបំពាក់ឧបករណ៍ OBU បងប្អូនក៏អាចជ្រើសរើសការចូល-ចេញតាម “ច្រក ANPR” ផងដែរ ដែលតម្រូវឱ្យបញ្ចូលទឹកប្រាក់ជាមុនទៅក្នុងផ្លាកលេខ ឬ ជ្រើសរើសការចូល-ចេញដោយធម្មតាតាម “ច្រក MTC” ដែលតម្រូវឱ្យយកកាតនៅច្រកចូល និងទូទាត់ជាសាច់ប្រាក់សុទ្ធនៅច្រកចេញ។ ក្នុងករណីមានចរាចរណ៍មមាញឹក បងប្អូនអាចប្រឈមនឹងការរង់ចាំយូរនៅច្រកចេញ ចំពោះការជ្រើសរើស “ច្រក MTC” ៕ ::: សម្រាប់ព័ត៌មានបន្ថែម សូមទាក់ទងទូរស័ព្ទលេខ៖ 1275 (ព័ត៌មានទូទៅ) 1399 / 023 26 31 61 (សេវាកម្ម) :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube