[Rasmei Kampuchea Daily News] - បើកដំណើរការស្ពានអាកាសផ្សារដីហុយដោះស្រាយការកកស្ទះចរាចរបានមួយកម្រិតតែនៅតែស្ទះដដែលពីគល់ដល់ពេទ្យរ៉ូយ៉ាល់
ភ្នំពេញ៖អ្នកធ្វើដំណើរតាមមហាវិថីសហព័ន្ធរ៉ុស្សីទាំងទៅនិងមកជាពិសេសត្រង់កំណាត់ផ្លូវសហព័ន្ធរុស្ស៊ី ពិសេសចាប់ពីគល់ស្ពានអាកាសផ្សារដីហុយ ដល់ពេទ្យរ៉ូយ៉ាល់ភ្នំពេញ បានទទួលរងការកកស្ទះចរាចរណ៍រាល់ថ្ងៃ បើទោះបីស្ពានអាកាសផ្សារដីហុយ ឬស្ពានអាកាសមិត្តភាពកម្ពុជា_ចិនសែន សុខ បានបើកសម្ពោធដាក់ឱ្យប្រើប្រាស់ហើយក្តី។
ពាក់ព័ន្ធនឹងការកកស្ទះចរាចរណ៍ដែលបណ្ដាលឱ្យ ខាតម៉ោងខាតពេលនេះ ប្រជាពលរដ្ឋដែលជាអ្នកដំណើរបានសូមឱ្យមន្ត្រីជំនាញ ពិសេសក្រសួងសាធារណការនិងដឹកជញ្ជូននិងភាគីចិនម្ចាស់ជំនួយនិង មន្ទីរសាធារណការនិងដឹកជញ្ជូនរាជធានីភ្នំពេញត្រូវ ធ្វើសិក្សាឡើងវិញ ដើម្បីធ្វើយ៉ាងណាដោះស្រាយបញ្ហាការកកស្ទះចរាចរនៅតំបន់នេះឱ្យបានប្រសើរឡើងវិញឱ្យបានច្បាស់លាស់មូលហេតុស្ទះនេះ។
ប្រជាពលរដ្ឋបានលើកឡើងថា៖ ការស្ថាបនាស្ពានអាកាសមិត្តភាពកម្ពុជា_ចិនសែន សុខ ហៅស្ពានអាកាសស្តុបផ្សារដីហុយ ពួកគាត់ពិតជារីករាយណាស់ ដោយសារគិតថា សមិទ្ធផលថ្មីនេះនឹងអាចដោះស្រាយការកកស្ទះកំណាត់ផ្លូវសហព័ន្ធរុស្ស៊ី បានប្រសើរឡើង តែដឹងអី ពោលគឺក្រោយពីកសាងនិង បើកឱ្យដំណើរការប្រើប្រាស់ អាកាសស្តុបផ្សារដីហុយហើយ កំណាត់ផ្លូវនេះ ពិសេសនៅតំបន់ផ្សារទឹកថ្លានៅតែដោះស្រាយការកកស្ទះមិនបានដដែរ។ដោយពួកគាត់ត្រូវប្រើប្រាស់ពេលវេលាយ៉ាងយូទើបអាចរំដោះខ្លួនចេញពីការកកស្ទះនេះបាន។
ជាមួយគ្នានេះប្រជាពលរដ្ឋបានឱ្យដឹងទៀតថា៖ ពួកគាត់មិនមែនជាអ្នកជំនាញទេ តែបើតាមពួកគាត់ពិនិត្យមើលនឹងភ្នែកជាក់ស្តែង និងជាអ្នកបានធ្វើដំណើរឆ្លងកាត់តា់មបណ្តោយផ្លូវនេះជាក់ស្តែង គឺការកកស្ទះចរាចរនេះបណ្តាលមកពីមូលហេតុមួយចំនួន ក្នុងនោះរួមមានយានយន្តចេញពីម្តុំក្រោយផ្សារទឹកថ្លាមកផ្លូវសហព័ន្ធរុស្ស៊ីច្រើន ហើយអ្វីដែលបង្កឱ្យមានការកកស្ទះចរាចរខ្លាំងនោះ គឺការបង្កើតឱ្យមានផ្លូវឆ្លងកាត់របាំងពុះចែកទ្រូងផ្លូវចំនួន៣កន្លែង នោះគឺការបើកអោយមានច្រកចេញនិងចូលមុខវត្តទឹកថ្លា ផ្លូវឆ្លងកាត់ខាងកើតវត្តទឹកថ្លានិងការបង្កើតឱ្យមានផ្លូវកាត់របាំងពុះចែកទ្រូងផ្លូវ ជាប់ឈៀងខាងលិចមន្ទីរពេទ្យរ៉ូយ៉ាល់ភ្នំពេញ ។
កន្លងមកលោកប្រធានមន្ទីរសាធារណការនិងដឹកជញ្ជូនរាជធានីភ្នំពេញធ្លាប់ទទួលស្គាលថាតំបន់មន្ទីរពេទ្យរ៉ូយ៉ាល់ភ្នំពេញនេះស្ទះមែននិងនៅចំណុចគល់ស្ពានខាងកើតហើយលោកថានឹងស្នើរទៅក្រសួងមិនសាលារាជធានីបិទផ្លូវចំណុចនេះព្រមទាំងលែងឱ្យបទឆ្វេងទើបដោះស្រាយស្ទះបាន។អ្នកដំណើរគាត់និយាយថាប្រហែលលោករដ្ឋមន្ត្រីក្រសួងសាធារណការមិនសូវបានធ្វើដំណើរផ្លូវសហព័ន្ធរ៉ុស្សីបានមិនសូវឃើញស្ទះចរាចរដោយគាត់ជាប់នៅស្រុកកោះធំរាល់ថ្ងៃ។
ចំពោះបញ្ហានេះ ប្រជាពលរដ្ឋនៅតែបញ្ជាក់ដដែរទៀតថា គាត់មិនមែនជាមន្ត្រីជំនាញទេ តែបើតាមគាត់យល់ ខ្លួនឯង ដើម្បីដោះស្រាយចរាចរនៅតំបន់នេះអោយបានធូស្រាលមួយកម្រិត គឺមានតែបិទច្រកផ្លូវឆ្លងកាត់ទាំង៣កន្លែងនេះចោល ពោលគឺ បើអ្នកធ្វើដំណើរពីភ្នំពេញ(ពីកើតទៅលិច) ចង់បត់ឆ្វេងទៅក្រោយផ្សារទឹកថ្លា ឬទៅក្រោយមន្ទីរពេទ្យរ៉ូយ៉ាល់ភ្នំពេញ គួរត្រូវបត់ក្រោមស្ពាន អាកាសផ្សារដីហុយចំណុចមុខផ្សារផ្លាហ្សារទឹកថ្លា រួចទើបត្រឡប់ក្រោយវិញ(ទៅទិសខាងកើត) ដោយឡែកអ្នកដំណើរនៅម្តុំវត្តទឹកថ្លាបើចង់ចូលមកភ្នំពេញគួរត្រូវបត់ក្រោមស្ពាន អាកាសផ្សារដីហុយចំណុចមុខផ្សារផ្លាហ្សារទឹកថ្លានេះដែរ ។ ដោយហេតុថា ចំណុចបត់នេះមិនមានចរាចរមមាញឹកនោះទេ ។
ស្ពានអាកាសថ្មីនេះមានបណ្តោយ៩០៥ម៉ែត្រ ទទឹង១៦.៥ម៉ែត្រ ស្ថិតនៅប្រសព្វរវាងមហាវិថីសហព័ន្ធ រុស្ស៊ី និងផ្លូវហាណូយ (១០១៩) ដែលជាគម្រោង ហិរញ្ញប្ប ទាន របស់សាធារណរដ្ឋប្រជាមានិតចិននិងទទួលបានសិទ្ធិសាងសង់ ដោយ ក្រុមហ៊ុន សៀងហៃ រួមនិងការត្រួតពិនិត្យបច្ចេកទេសដោយក្រសួងសាធារណការ និងដឹកជញ្ជូន។ ប៉ុន្តែក្រោយបើកឱ្យដំណើរការប្រើប្រាស់ អាកាសស្តុបផ្សារដីហុយនេះហើយ កំណាត់ផ្លូវនេះ ពិសេសនៅតំបន់ផ្សារទឹកថ្លានៅតែដោះស្រាយការកកស្ទះមិនបានដដែរ ។
ប្រជាពលរដ្ឋ ជាអ្នកដំណើរបានសូមមន្ត្រីជំនាញ ពិសេសក្រសួង មន្ទីរសាធារណការ ធ្វើសិក្សាឡើងវិញ ដើម្បីធ្វើយ៉ាងណាដោះស្រាយបញ្ហាការកកស្ទះចរាចរនៅតំបន់នេះអោយបានប្រសើរឡើង កុំអោយដូចសព្វថ្ងៃនេះកកស្ទះសម្បើមណាស់៕
