(កែប)៖ លោក ម៉ម ទូច ប្រធានមន្ទីរសាធារណការ និងដឹកជញ្ជូនខេត្តកែប នៅថ្ងៃទី១១ ខែធ្នូ ឆ្នាំ២០២៣នេះ បានចាត់មន្ដ្រីជំនាញនៃមន្ទីរសាធារណការខេត្ត សហការជាមួយកម្លាំងសមត្ថកិច្ចពាក់ព័ន្ធ ចុះអប់រំណែនាំដល់អ្នកបើកបររថយន្ដ ពិសេសរថយន្ដធុនធំ នៅលើផ្លូវ​ខេត្ត​1335​​ស្ថិត​ក្នុង​ភូមិ​ចំការ​ចេក ​(តំបន់ភ្នំវល្លិ)​ ឃុំ​ពងទឹក​ ស្រុក​ដំណាក់​ចង្អើរ​។ ក្នុងប្រតិបត្តិការនេះ មានការចូលរួមពីរដ្ឋបាលស្រុកដំណាក់ចង្អើរ អាជ្ញាធរមូលដ្ឋាន តំណាងកងរាជអាវុធហត្ថ អធិការដ្ឋាននគរបាលស្រុក។ ក្នុងនោះក្រុមការងារបានរួមគ្នាចុះណែនាំ តម្រង់​ទិសដល់អ្នកបើកបរតាមដងផ្លូវ ការប្រើ​ប្រាស់​ល្បឿន​ ការផ្ទុកដឹកលើសទម្ងន់ ការតទ្រុងខុសលក្ខណៈបច្ចេកទេស​ ការគ្របសំណាញ់ និងឯកសារដែលត្រូវភ្ជាប់ពេលបើកបរ (បណ្ណបើកបរ​ និងឈៀកជាដើម)​ ដល់រថយន្តបែនដឹកថ្ម ដី ធុនធ្ងន់ ចំនួន១៨គ្រឿង​ និងបានធ្វើកិច្ចសន្យាជាមួយម្ចាស់រថយន្តទាំងនោះអោយគោរពតាមច្បាប់កំណត់។ បន្ថែមពីនេះ ក៏បានផ្សព្វផ្សាយ ច្បាប់ស្តីពីផ្លូវថ្នល់ ដោយស្រង់យកមាត្រា៦០ មាត្រា៧៥ ជំពូកទី១១ ស្ដីពីទោសបញ្ញត្តិដល់អ្នកបើកបរគ្រប់រូប ក្នុងករណីប្រព្រឹត្តល្មើសផងដែរ៕