កិច្ចប្រជុំលើគម្រោងសាកល្បងស្ដីពីប្រព័ន្ធដឹកជញ្ជូនឆ្លាតវៃ (ITS) ដោយប្រើ Big data នៅកម្ពុជា ដើម្បីចូលរួមចំណែកក្នុងការដោះស្រាយ កាត់បន្ថយការកក់ស្ទះ និងណ៍នៅរាជធានីភ្នំពេញ នៅព្រឹកថ្ងៃព្រហស្បតិ៍ ទី២៣ ខែវិច្ឆិកា ឆ្នាំ២០២៣ ឯកឧត្ដម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនគោក បានអញ្ជើញជួបពិភាក្សាជាលើកដំបូងលើគម្រោងសាកល្បងស្ដីពីប្រព័ន្ធដឹកជញ្ជូនឆ្លាតវៃ (ITS) ដោយផ្អែកលើការប្រើ Big data នៅកម្ពុជា ដែលមានការចូលរួមពីលោកអគ្គនាយករង លោក លោកស្រីប្រធាន អនុប្រធាននាយកដ្ឋាន លោក លោកស្រីប្រធាន អនុប្រធានការិយាល័យ និងមន្រ្តីពាក់ព័ន្ធផងដែរ និងភាគីកូរ៉េ ដែលដឹកនាំដោយលោកបណ្ឌិត Kim Chang Kyun ជាអ្នកគ្រប់គ្រងគម្រោង និងសហការីចំនួន ៩ នាក់ (តំណាង Consortium នៃប្រទេសកូរ៉េ)។ កិច្ចប្រជុំនេះរៀបចំឡើងក្នុងគោលបំណងណែនាំសមាសភាពក្រុមការងារទាំងសងខាង ស្វែងយល់ឱ្យបានស៊ីជម្រៅលើគម្រោង និងផែនការគម្រោងនាពេលអនាគត ក៏ដូចជាលើកឡើងពីកិច្ចការផ្សេងៗដែលភាគីទាំងសងខាងត្រូវអនុវត្តដើម្បីធានានិរន្តរភាពនៃគម្រោង។ ឯកឧត្ដមអគ្គនាយក បានសំដែងនូវការគាំទ្រនិងពេញចិត្តលើគម្រោងនេះ និងបន្តគោរពស្នើការគាំទ្រពីឯកឧត្ដមរដ្ឋមន្រ្តី ដើម្បីឱ្យគម្រោងនេះអាចអនុវត្តទៅបានប្រកបដោយប្រសិទ្ធភាព និងទទួលបានជោគជ័យសម្រាប់ចូលរួមចំណែកក្នុងការដោះស្រាយ និងកាត់បន្ថយការកក់ស្ទះ និងណ៍នៅរាជធានីភ្នំពេញ។ លទ្ធផលនៃកិច្ចប្រជុំបានសម្រេចលើការត្រួតពិនិត្យកំណត់ហេតុនៃការពិភាក្សា (Record Discussion) ឡើងវិញ ការពិនិត្យមើល Term Reference ការរៀបចំអនុសារណៈយោគយល់ (MOU) និងការត្រួតពិនិត្យបញ្ហានានា ដើម្បីឱ្យគម្រោងអនុវត្តបានជោគជ័យ។ ក្រោយការត្រួតពិនិត្យឯកសាររួចរាល់ កិច្ចប្រជុំបានឯកភាពរៀបចំកិច្ចប្រជុំបន្ទាប់ទៀត ដើម្បីត្រួតពិនិត្យលើឯកសារដែលបានឡើងមកពិភាក្សាថ្ងៃនេះ៕