[4 Cambodian People] - សម្តេចតេជោ ហ៊ុន សែន សាទរការតភ្ជាប់ផ្លូវរថភ្លើងពីភ្នំពេញ-ពោធិ៍សាត់
សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅព្រឹកថ្ងៃទី០៥ ខែកក្កដាបានមានប្រសាសន៍ជម្រាបដល់បងប្អូនប្រជាពលរដ្ឋទូទាំងប្រទេសថា កាលពីថ្ងៃទី០៤ ខែកក្កដាផ្លូវរថភ្លើងពីភ្នំពេញទៅកាន់ខេត្តពាធិ៍សាត់ត្រូវបានតភ្ជាប់ជាស្ថាពររួចហើយ។
ផ្លូវដែកនេះគឺនឹងជួយដល់ការធ្វើដំណើររបស់ប្រជាពលរដ្ឋ នឹងសម្រួលដល់ការដឹកជញ្ជូនទំនិញគ្រប់ប្រភេទឱ្យកាន់តែប្រសើរឡើង។ នេះជាដំណឹងល្អសម្រាប់វិនិយោគគិនទាំងក្នុងនិងក្រៅប្រទេសឱ្យបានជ្រាបពីជម្រើសនៃការដឹកជញ្ជូនតាមផ្លូវដែក។
សម្តេចតេជោ ហ៊ុន សែន បន្តថា ដើម្បីជំរុញការអភិវឌ្ឍប្រទេសឱ្យកាន់តែរីកចម្រើន រាជរដ្ឋាភិបាលកម្ពុជា បានស្វាគមន៍ និងកំពុងកៀរគរវិនិយោគគិនពីបរទេសមកកម្ពុជាថែមទៀត ព្រោះបច្ចុប្បនេះប្រទេសយើងក៏សំបូរធនធានមនុស្ស, មានផ្លូវស្ពានដឹកជញ្ជូនតូចធំ, ផ្លូវទឹក, ផ្លូវដែក និងផ្លូវអាកាស ហើយកាលពីពេលថ្មីៗកន្លងទៅនេះ យើងក៏បានស្តារ និងកែលម្អកំពង់ផែទឹកជ្រៅនៅខេត្តព្រះសីហនុដែលអាចឲ្យកប៉ាល់ដឹកទំនិញចំណុះរហូតដល់ ៥ម៉ឺនតោនចូលចតបានដោយមិនចាំបាច់ផ្លាស់ប្តូរទំនិញនៅប្រទេសដទៃឡើយ។
សម្តេចបញ្ជាក់ថា តាមរយៈសក្ដានុពលនៃធនធានមនុស្ស និងប្រព័ន្ឋហេដ្ឋារចនាសម្ព័ន្ឋផ្លូវដឹកជញ្ជូនគ្រប់ទីកន្លែង រួមទាំងតម្លៃអគ្គីសនីកាន់តែចុះថោក គឺយើងសង្ឃឹមថា កម្ពុជានឹងកាន់តែទាក់ទាញបាននូវការចាប់អារម្មណ៍ពីវិនិយោគិនបរទេសកាន់តែច្រើនជាក់ជាមិនខាន៕
