កិច្ចប្រជុំស្តីពីការពង្រឹងការងារសាលាបង្រៀនបើកបរយានយន្តគ្រប់ប្រភេទ ដើម្បីពង្រឹងប្រសិទ្ធភាព និងគុណភាពនៃការបង្រៀន ក៏ដូចជាគ្រប់គ្រងសាលា និងសាខាសាលាបង្រៀនបើកបរយានយន្តឱ្យបានល្អប្រសើរ នៅទីស្ដីការក្រសួងនាថ្ងៃអង្គារ ៥កើត ខែភទ្របទ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៩ ខែកញ្ញា ឆ្នាំ២០២៣ ឯកឧត្ដម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពង្រឹងការងារសាលាបង្រៀនបើកបរយានយន្តគ្រប់ប្រភេទ ដោយមានការចូលរួមពីមន្ត្រីជំនាញពាក់ព័ន្ធនៃអគ្គនាយកដ្ឋានដឹកជញ្ជូនផ្លូវគោក និងនាយក-នាយិកាសាលាបង្រៀនបើកបរយានយន្តគ្រប់ប្រភេទមកពី២៥រាជធានី-ខេត្តសរុបចំនួន៥៤សាលា។ ថ្លែងទៅកាន់អង្គប្រជុំនាឱកាសនោះ ឯកឧត្តមអគ្គនាយក បានគូសបញ្ជាក់អំពីសារៈសំខាន់នៃការពង្រឹងបន្ថែមលើការងារសាលា និងសាខាសាលាបង្រៀនបើកបរយានយន្ត ដោយសារពិនិត្យឃើញមានភាពមិនប្រក្រតីមួយចំនួននាពេលកន្លងមករួមមានដូចជា៖ ការអនុវត្តមិនបានត្រឹមត្រូវតាមខ្លឹមសារប្រកាសលេខ.២២៣ ប្រក.សក.ដជគ ចុះថ្ងៃទី៣០ ខែមិថុនា ឆ្នាំ២០២០ ស្តីពីលក្ខខណ្ឌ និងនីតិវិធីនៃការចេញលិខិតអនុញ្ញាតឱ្យធ្វើអាជីវកម្មសាលាបង្រៀនបើកបរយានយន្តរបស់ក្រសួង ការគ្រប់គ្រងសាខាសាលាបង្រៀនបើកបររបស់ខ្លួនមិនបានគ្រប់ជ្រុងជ្រោយ ការចេញបង្កាន់ដៃជូនអតិថិជនមិនទាន់បានត្រឹមត្រូវដោយប្រើប្រាស់រូបសញ្ញា (LOGO)ក្រសួងជាដើម។ល។ បន្ថែមពីលើនេះ ឯកឧត្តមប្រធានអង្គប្រជុំ ក៏បានជំរុញលើកទឹកចិត្តឱ្យនាយក-នាយិកាសាលាបង្រៀនបើកបរយានយន្ត លើកឡើងអំពីការលំបាក បញ្ហាប្រឈម ក៏ដូចជាមតិយោបល់ និងសំណូមពរផ្សេងៗ ហើយមតិយោបល់ និងសំណូមពរមួយចំនួន ត្រូវបានដោះស្រាយ និងមួយចំនួនទៀត ត្រូវបានទទួលយកទៅពិនិត្យ ពិភាក្សាឱ្យបានច្បាស់លាស់ជាមួយជំនាញ។ ឯកឧត្តមអគ្គនាយក បានឯកភាពភាពឱ្យមានកិច្ចប្រជុំពីរដងក្នុងមួយឆ្នាំ និងបានស្នើឱ្យនាយក-នាយិកាសាលាបង្រៀនបើកបរយានយន្តទាំងអស់ពង្រឹងប្រសិទ្ធភាព និងគុណភាពនៃការបង្រៀន ក៏ដូចជាគ្រប់គ្រងសាលា និងសាខាសាលាបង្រៀនបើកបរយានយន្តរបស់ខ្លួនឱ្យបានល្អប្រសើរ ព្រមទាំងស្នើឱ្យបង្កើតសមាគមឱ្យបានឆាប់រហ័សផងដែរ៕