ពិធីបិទវគ្គបណ្ដុះបណ្ដាលស្ដីពីបច្ចេកទេសសាងសង់ ជួសជុល និងថែទាំស្ពាន ក្រោមកម្មវិធីផ្ទេរបច្ចេកវិទ្យា(Technology Transfer Program) ទីស្ដីការក្រសួង៖ ថ្ងៃព្រហស្បតិ៍ ១២កើត ខែបឋមាសាឍ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៩ ខែមិថុនា ឆ្នាំ២០២៣ ឯកឧត្តមរដ្ឋលេខាធិការ សូរ វ៉ិចទ័រ តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបិទវគ្គបណ្ដុះបណ្ដាលស្ដីពីបច្ចេកទេសសាងសង់ ជួសជុល និងថែទាំស្ពាន ក្រោមកម្មវិធីផ្ទេរបច្ចេកវិទ្យា(Technology Transfer Program) ដោយមានការអញ្ជើញចូលរួមពីថ្នាក់ដឹកនាំក្រសួង និងមន្រ្តីជំនាញមកពីបណ្តា អង្គភាពពាក់ព័ន្ធក្រោមឱវាទក្រសួង។ វគ្គបណ្តុះបណ្តាលនេះមានរយៈពេលពីរថ្ងៃកន្លះ សហការរៀបចំដោយក្រសួងសាធារណការ និងដឹកជញ្ជូន ទីភ្នាក់ងារជំរុញការវិនិយោគកូរ៉េ (KOTRA) ក្រុមហ៊ុន Soosung Engineering & Consulting របស់សាធារណរដ្ឋកូរ៉េ ក្នុងគោលបំណងដើម្បីផ្ដល់ឱកាសដល់សិក្ខាកាមដែលជាវិស្វករជំនាញឱ្យទទួលបាននូវចំណេះដឹង ជំនាញ និងបទពិសោធន៍ជាក់ស្តែងយ៉ាងទូលំទូលាយ ជាពិសេសការប្រើប្រាស់បច្ចេកទេស និងបច្ចេកវិទ្យាទំនើបៗចុងក្រោយពីក្រុមហ៊ុន Soosung Engineering។ ថ្លែងទៅកាន់អង្គពិធីនាឱកាសនោះ ឯកឧត្តមរដ្ឋលេខាធិការ បានសម្តែងក្តីសង្ឃឹមយ៉ាងមុតមាំថា៖ វិស្វករជំនាញទាំងអស់ ដែលបានចំណាយពេលវេលាដ៏មានតម្លៃរបស់ខ្លួនមកចូលរួមវគ្គបណ្តុះបណ្តាលនេះ នឹងប្រើប្រាស់នូវចំណេះដឹង និងបទពិសោធន៍ដែលខ្លួនទទួលបានទាំងនេះទៅអនុវត្តការងាររបស់ខ្លួនឱ្យកាន់តែមានប្រសិទ្ធភាពបន្ថែមទៀត ដើម្បីចូលរួមចំណែកក្នុងការអភិវឌ្ឍហេដ្ឋារចនាសម្ព័ន្ធរូបវន្តកម្ពុជាឱ្យកាន់តែមានការរីកច្រើនថែមទៀត។ ឆ្លៀតក្នុងឱកាសនោះដែរ ឯកឧត្តមរដ្ឋលេខាធិការ បានរំលឹកឡើងវិញនូវការប្តេជ្ញាចិត្តរបស់ឯកឧត្តមទេស រដ្ឋមន្ត្រី ក្នុងការបណ្តុះបណ្តាលវិស្វករកម្ពុជាឱ្យចេះធ្វើផ្លូវ សង់ស្ពានឆ្លងទន្លេ និងប្រព័ន្ធហេដ្ឋារចនាសម្ព័ន្ធ ឱ្យមានគុណភាពរឹងមាំដោយខ្លួនឯងដោយមិនពឹងបរទេស ដោយហេតុថាបុព្វបុរសយើងសម័យមុនមានសមត្ថភាពអាចកសាងអង្គរវត្ត និងប្រាង្គប្រាសាទនានាយ៉ាងស្រស់បំព្រងប្រកបដោយគុណភាពរឹងមាំជាប់បានយូររាប់រយឆ្នាំ និងល្បីល្បាញពាសពេញសកលលោក។ ជាចុងក្រោយ ឯកឧត្តមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់ក្រុមហ៊ុន Soosung Engineering និងទីភ្នាក់ងារKOTRA ដែលបានផ្តួចផ្តើមគំនិត និងសហការរៀបចំវគ្គបណ្តុះបណ្តាលនេះ ឡើង ហើយសង្ឃឹមថាក្រុមហ៊ុន នឹងពិនិត្យលទ្ធភាពក្នុងការសហការរៀបចំវគ្គបណ្តុះបណ្តាលបែបនេះ ឬ ទស្សនកិច្ចសិក្សាលើប្រធានបទដទៃបន្ថែមទៀត ដើម្បីចូលរួមបណ្តុះបណ្តាលវិស្វករកម្ពុជា ក៏ដូចជាពង្រឹងសមត្ថភាពមន្ត្រីជំនាញរបស់ក្រសួងឱ្យកាន់តែមានសមត្ថភាពខ្ពស់ថែមទៀត៕