ភ្នំពេញ៖ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន នៅថ្ងៃទី២៩ ខែមិថុនានេះ បានសម្ពោធដាក់ឱ្យដំណើរការជាផ្លូវការមណ្ឌលផ្តល់សេវាសាធារណៈ របស់ក្រសួងសាធារណការនិងដឹកជញ្ជូន ស្ថិតនៅផ្សារទំនើបអ៊ីអន ម៉ល មានជ័យ រាជធានីភ្នំពេញ។ នៅក្នុងឱកាសនោះ ឯកឧត្តម ស៊ុន ចាន់ថុល បានថ្លែងថា ការបង្កើតមណ្ឌលផ្តល់សេវាសាធារណៈ នាពេលនេះ ​គឺជាលើកទី៧ហើយដែលក្រសួងបានដាក់ឱ្យដំណើរការ ក្នុងគោលបំណងបង្ខិតសេវា​សាធារណៈជូនប្រជាពលរដ្ឋយើងឱ្យបានលឿន មានប្រសិទ្ធភាព និងតម្លាភាព ស្របតាម​អនុសាសន៍​ណែនាំរបស់សម្តេចតេជោ ហ៊ុន សែន ​នាយករដ្ឋមន្រ្តីកម្ពុជាថា​ យើងជាអ្នកបំរើសរាស្រ្ត មិនមែន​ជាចៅហ្វាយរាស្រ្តនោះទេ។ ដូច្នេះយើងខិតខំធ្វើយ៉ាងណាផ្តល់សេវាសាធារណៈចាំបាច់ផ្សេងៗ​ ជូនប្រជាពលរដ្ឋឱ្យទាន់​ពេល​វេលា។ លើសពីនេះ ឯកឧត្តម បានអំពាវនាវដល់ប្រជាពលរដ្ឋកុំប្រើឈ្មួញ​កណ្តាលរត់​ការ​ឯកសារផ្សេងៗ​ អស់ថវិការច្រើនណាស់ ​ប៉ុន្តែបើយើងធ្វើដោយខ្លួនមិនអស់ថវិកាច្រើនោះទេ ហើយរហ័សទៀតផង។ មណ្ឌលផ្តល់សេវាសាធារៈ របស់ក្រសួងសាធារណការ និងដឹកជញ្ជូន​ ស្ថិតនៅផ្សារទំនើបអ៊ីអន ម៉ល មានជ័យ រាជធានីភ្នំពេញ ​ចាប់បើកដំណើរជារៀងរាល់ថ្ងៃ ​ពីម៉ោង៩ព្រឹក​ ដល់ម៉ោង១០យប់ មានផ្តល់សេវាដូចជា៖ ប្តូរពន្យារបណ្ណបើកបរយានយន្ត, ដាក់ពាក្យត្រួតពិនិត្យ​លក្ខណៈបច្ចេកទេស​យានជំនិះ​ ឫហៅថា ឆៀក, ចុះបញ្ជី​ និងផ្ទេរកម្មសិទ្ធិ​យានជំនិះ​, បំពាក់​ឧបករណ៍ ETC លើយានយន្ត និងលតាបត្រអនុញ្ញាតទោចក្រយានយន្ត៥០០cc ឬ ២៧KW ​ធ្វើដំណើរផ្លូវល្បឿនលឿន។ គិតចាប់ពីឆ្នាំ២០១៦ មកដល់បច្ចុប្បន្ន ក្រោមការដឹកនាំរបស់ឯកឧត្តមស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន ​បានបង្កើតឱ្យមានមណ្ឌលផ្តល់សេវាសាធារណៈ នៅ​តាមផ្សាទំនើប និងទីប្រជុំជននានា ចំនួន ០៧ទីតាំងរួមមាន៖ ទី១.មណ្ឌលប្តូរ និងពន្យាបណ្ណបើកបរផ្សារទំនើប អ៊ីអន ម៉ល ភ្នំពេញ សាខាទី១។ទី២.មណ្ឌលប្តូរ និងពន្យាបណ្ណបើកបរផ្សារទំនើប អ៊ីអន ម៉ល សែនសុខ សាខាទី២។ ទី៣. មណ្ឌលផ្តល់សេវាសាធារណៈ ផ្សារទំនើបជីប ម៉ុង ណូរ៉ូ ម៉ល (NORO MALL) ទី៤. មណ្ឌល ផ្តល់សេវាសាធារណៈ ទីស្ដីការក្រសួងសាធារណការ ​និងដឹកជញ្ជូន ទី៥.មណ្ឌលផ្តល់សេវាសាធារណៈ ផ្សារទំនើប ហេរីថោក វ៉ក ស្ថិតនៅក្រុងសៀមរាប ទី៦.មណ្ឌលផ្តល់សេវាសាធារណៈ ផ្សារទំនើប ហ្វូរី ថែម សឃ្វែរ ម៉ល ស្ថិតនៅ ក្រុងព្រះសីហនុ និងទី៧.មណ្ឌលសេវាផ្តល់សេវាសាធារណៈ ផ្សារទំនើប អ៊ីអន ម៉ល មានជ័យ សាខាទី៣ ៕