[4 Cambodian People] - សម្តេចតេជោ ហ៊ុន សែន អញ្ជើញសម្ពោធកំណាត់ផ្លូវជាតិលេខ៦ប្រវែងជាង ២៤៨គីឡូម៉ែត្រតម្លៃជាង២៥៥លានដុល្លារ
កំណាត់ផ្លូវជាតិលេខ៦ ប្រវែងសរុប ២៤៨.៥៣គីឡូម៉ែត្រចាប់ពីថ្នល់កែង ខេត្តកំពង់ចាម ដល់អង្រ្គង ខេត្តសៀមរាប បានប្រារព្ធពិធីសម្ពោធដាក់ឲ្យប្រើប្រាស់ជាផ្លូវការនៅព្រឹកថ្ងៃទី១១ ខែមិថុនា ឆ្នាំ២០១៨នេះ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា គម្រោងសាងសង់ឡើងវិញកំណាត់ផ្លូវជាតិលេខ៦ ចាប់ពីថ្នល់កែង ខេត្ដកំពង់ចាម ដល់អង្រ្គង ខេត្តសៀមរាប ឆ្លងកាត់ខេត្តចំនួន០៣ រួមមាន៖ ខេត្តកំពង់ចាម ប្រវែង ៤៣.៩៨គីឡូម៉ែត្រ ខេត្តកំពង់ធំ ប្រវែង ១៤៤.២៥គីឡូម៉ែត្រ និងខេត្តសៀមរាប ប្រវែង ៦០.៣០គីឡូម៉ែត្រ។
គម្រោងសាងសង់ផ្លូវនេះចែកចេញជា ០៣កំណាត់រួមមាន៖ កំណាត់ផ្លូវទី១ ចាប់ពីថ្នល់កែង ដល់ស្គន់ ប្រវែង ២៨,៧៣គីឡូម៉ែត្រ ត្រូវបានពង្រីកទទឹងតួផ្លូវរហូតដល់ ២៥ម៉ែត្រ ដោយក្រាលបេតុងកៅស៊ូ AC កម្រាស់ ១០សង់ទីម៉ែត្រ ទទឹង ២០,៥០ម៉ែត្រ លើទទឹងតួផ្លូវសរុប ២៥ម៉ែត្រ, កំណាត់ផ្លូវទី២ ចាប់ពីស្គន់ ដល់ស្ទឹងសែន ប្រវែង ១០២.៩០គីឡូម៉ែត្រ រួមជាមួយកំណាត់ផ្លូវទី៣ ចាប់ពីស្ទឹងសែន ដល់អង្រ្គង ប្រវែង ១១៦.៩០គីឡូម៉ែត្រ ត្រូវបានពង្រីកទទឹងតួផ្លូវរហូតដល់ ១២ម៉ែត្រ ដោយក្រាលបេតុងកៅស៊ូ AC កម្រាស់ ១០សង់ទីម៉ែត្រ ទទឹង ១១ម៉ែត្រ លើទទឹងតួផ្លូវសរុប ១២ម៉ែត្រ។
កំណាត់ផ្លូវជាតិលេខ៦ ដែលទើបបើកសម្ពោធជាផ្លូវការនេះចំណាយថវិកាសរុបប្រមាណ ២៥៥.០២លានដុល្លារអាមេរិក ជាហិរញ្ញប្បទានសម្បទានរបស់ចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា ប្រមាណ ៥ភាគរយ សម្រាប់ការដោះស្រាយផលប៉ះពាល់ ការបោសសម្អាតមីន និងយុទ្ធភ័ណ្ឌមិនទាន់ផ្ទុះ និងពន្ធអាករ និងសួយសារ។ កំណាត់ផ្លូវនេះ បានចំណាយពេលសាងសង់ ៥០ខែ ចាប់ផ្តើមពីខែឧសភា ឆ្នាំ២០១៣ និងបញ្ចប់នៅខែកក្កដា ឆ្នាំ២០១៧៕
