ក្រសួងសាធារណការ និងដឹកជញ្ជូន បានសម្ពោធបើកឱ្យប្រើប្រាស់ជាផ្លូវការនូវទីលានចាក់សំរាមថ្មីចំនួន ២ទីតាំង តម្លៃជាង ១០លានដុល្លារ ស្ថិតនៅក្នុងខេត្តកែប និងកំពត។ ទីលានចាក់សំរាមថ្មីទាំងពីរ ត្រូវបានសម្ពោធ​ឱ្យប្រើប្រាស់ ក្រោមអធិបតីភាព ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន កាលពីថ្ងៃទី៣០ ខែឧសភា ឆ្នាំ២០២៣។ ទីលានចាក់សំរាមទី១ ស្ថិតនៅលើផ្ទៃដី ៨ហិកតា ក្នុងសង្កាត់ព្រៃធំ ក្រុងកែប ខេត្តកែប ត្រូវបានសាងសង់ឡើងនៅខែឧសភា ឆ្នាំ២០២០ ដោយចំណាយថវិកាអស់ ៧,១លានដុល្លារ។ គម្រោងនេះ ស្ថិតក្រោមគម្រោងហេដ្ឋារចនាសម្ព័ន្ធទេសចរណ៍សម្រាប់កំណើនប្រកបដោយបរិយាបន្ន នៃមហាអនុតំបន់មេគង្គជំហានទី២ របស់ADB មានទឹកប្រាក់អនុវត្តគម្រោង៣០លានដុល្លារ។ (អានបន្ថែម) ដោយឡែក ទីលានចាក់សំរាមទី២ ស្ថិតលើផ្ទៃដីសរុប ១០,៣៣៨ហិកតា ក្នុងភូមិថ្មី ឃុំថ្មី ស្រុកទឹកឈូ ខេត្តកំពត ដែលចំណាយថវិកាសាងសង់អស់​ ៣.៣៧២.៥១៤ ដុល្លារ ចាប់ផ្ដើមសាងសង់នៅថ្ងៃទី២០ ខែឧសភា ឆ្នាំ២០២១ និងបញ្ចប់ការងារសាងសង់នៅថ្ងៃទី៣០ កញ្ញា ២០២២ កន្លងទៅនេះ។ គម្រោងទាំង២នេះ ក៏ជាកម្ចីពីធនាគារអភិវឌ្ឍន៍អាស៊ី (ADB) ដែលស្ថិតក្រោមគម្រោងអភិវឌ្ឍន៍ទីក្រុងរបៀងនៃមហា​​អនុតំបន់មេគង្គជំហានទី២។ គួរបញ្ជាក់ថា ទីលានទុកដាក់សំរាមថ្មីទាំងពីរនេះ មានសមត្ថភាពប្រតិបត្តិការដល់ទៅ ២០ឆ្នាំ ដែលស្របតាមបទដ្ឋានបច្ចេកទេសផងដែរ។