ចាប់តាំងពីថ្ងៃបើកការដ្ឋានសាងសង់រហូតមកដល់ខែមេសា ឆ្នាំ២០២៣ នេះគម្រោងលើកកម្រិតគុណភាពផ្លូវជាតិលេខ៤៨ ដែលមានទីតាំងស្ថិតនៅក្នុងខេត្តកោះកុងសម្រេចការសាងសង់បានជាង ២៥ភាគរយហើយ ខណៈគម្រោងនេះនឹងត្រូវបន្ថែមពេលវេលាសម្រាប់ការសាងសង់បន្ថែមទៀតផងដែរ។ នេះបើយោងតាមការបញ្ជាក់ពីលោកជំទាវ មិថុនា ភូថង អភិបាលនៃគណៈអភិបាលខេត្ដកោះកុង។ យោងតាមការការចុះផ្សាយពីហ្វេសប៊ុកផេកផ្លូវការរបស់លោកជំទាវអភិបាលខេត្ដបានឲ្យដឹងថា កាលពីថ្ងៃទី១៥ ខែឧសភា ឆ្នាំ២០២៣ កន្លងទៅ លោកជំទាវ បានចុះត្រួតពិនិត្យការសាងសង់លើកកម្រិតគុណភាពផ្លូវជាតិលេខ៤៨ មានប្រវែង១៤៨គីឡូម៉ែត្រ ចំនួន៤ចំណុច ដូចជា÷ -ចំណុចទី១ ចាប់ពីឃុំបឹងព្រាវ ស្រុកស្រែអំបិល ជាគីឡូម៉ែត្រ០ ផ្លូវដើរសាធារណៈ -ចំណុចទី២ គីឡូម៉ែត្រ៦០ តំបន់ទំនប់ទឹកខ្ពស់ -ចំណុចទី៣ គីឡូម៉ែត្រ១២០ តំបន់ត្រូវកាយយកថ្មចេញ មកបំពេញទីតាំងដែលទាប។ -ចំណុចទី៤ គីឡូម៉ែត្រ១៤២ តំបន់ដែលមាន ៤គន្លងសម្រាប់យានយន្ត។ គួរបញ្ជាក់ថា ផ្លូវជាតិលេខ៤៨ ទីតាំង៤គន្លងសម្រាប់យានយន្ត បានចំនួន៥កន្លែង។ ក្នុងនោះតាមការបញ្ជាក់របស់លោកជំទាវ «គិតមកត្រឹមខែមេសា ឆ្នាំ២០២៣ ផ្លូវជាតិលេខ៤៨ សម្រេចបាន២៥.៥៧% ។ រយៈពេលសាងសង់នឹងត្រូវបន្ថែមពេល១២ខែទៀត ពីលើកាលកំណត់បញ្ចប់»។ គួរជម្រាបផងដែរថា គម្រោងសាងសង់ផ្លូវជាតិខាងលើនេះ បើកការដ្ឋានសាងសង់តាំងពីថ្ងៃទី៣ ខែកមរា ឆ្នាំ២០២២។ គម្រោងផ្លូវនេះត្រូវបានអនុវត្តការសាងសង់ដោយក្រុមហ៊ុនកូរ៉េ IL SUNG & HANIL Joint Venture ខណៈផ្លូវលនេះត្រូវបែងចែកជា២គន្លង ប្រវែង ១២២,៩គីឡូម៉ែត្រ និងផ្លូវ៤គន្លងមានប្រវែង ២៥,១គីឡូម៉ែត្រ ក្រាលដោយបេតុងកៅស៊ូ (AC) កម្រាស់ ០៧សង់ទីម៉ែត្រ រួមជាមួយបេតុងសរសៃដែក ដែលនឹងប្រើប្រាស់ត្រង់ផ្លូវប្រសព្វចំនួន៥ទីតាំង គ្រោងចំណាយថិវិកាសាងសង់ ៧៨ លានដុលារ៕