ការកសាងផ្នត់គំនិត និងការលើកទឹកចិត្តសម្រាប់ផលិតភាពនៅកន្លែងការងារ “Building Growth Mindset & Motivation for Productivity at Work” គឺជាប្រធានបទបណ្តុះបណ្តាលមន្ត្រីរាជការ អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូន ទីស្ដីការក្រសួង៖ នារសៀលថ្ងៃសុក្រ ៨រោច ខែពិសាខ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១២ ខែឧសភា ឆ្នាំ២០២៣ ឯកឧត្តម ហ៊ាង សុទ្ធាយុត្តិ អគ្គនាយកនៃអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូន បានអញ្ជើញជាអធិបតីភាពក្នុងពិធីបើកវគ្គបណ្ដុះបណ្ដាលស្ដីពីការកសាងផ្នត់គំនិត និងការលើកទឹកចិត្តសម្រាប់ផលិតភាពនៅកន្លែងការងារ “Building Growth Mindset & Motivation for Productivity at Work” ឧទ្ទេសនាមដោយលោកគ្រូ ចាន់ សេរី ជូនដល់មន្ត្រីរាជការ និងបុគ្គលិកចំណុះអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈប្រមាណ៦០រូប។ ក្នុងពិធីបើកវគ្គបណ្ដុះបណ្ដាល ឯកឧត្តមអគ្គនាយក បានផ្ដល់មតិស្វាគមន៍សម្រាប់អង្គពិធីទាំងមូល ព្រមទាំងមានប្រសាសន៍លើកទឹកចិត្តដល់មន្ត្រីរាជការ និងបុគ្គលិកទាំងអស់ឱ្យគោរពនូវឥរិយាបថ និងផ្នត់គំនិតវិជ្ជមាន ប្រកបភាពច្នៃប្រឌិតខ្ពស់សម្រាប់វគ្គបណ្ដុះបណ្ដាលនេះ ដោយហេតុថា ក្រោមការដឹកនាំរបស់ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ជានិច្ចកាលតែងតែជំរុញទឹកចិត្តឱ្យគ្រប់មន្ត្រីរាជការក្រោមឱវាទទាំងអស់បង្កើនស្មារតីក្នុងការពង្រីកចំណេះដឹងផ្ទាល់ខ្លួន ទាំងជំនាញបច្ចេកទេស (Hard Skill) និងជំនាញទន់ (Soft Skill) ដើម្បីប្រើប្រាស់ជាប្រយោជន៍រួមសម្រាប់ស្ថាប័ន ប្រទេសជាតិ និងខ្លួនឯង។ ក្នុងវគ្គបណ្ដុះបណ្ដាលនេះ លោកគ្រូឧទ្ទេសនាមបានចែករំលែកទៅកាន់មន្ត្រីរាជការ និងបុគ្គលិកទាំងអស់ឱ្យបានយល់ដឹងពីគោលបំណងសំខាន់ៗរួមមាន៖ (១). យល់ដឹងកាន់តែច្បាស់អំពីទំនួលខុសត្រូវការងារ (២). មានអំណត់អត់ធ្មត់ អាចជំនះលើបញ្ហាលំបាកៗ ដើម្បីបានលទ្ធផលជាគោល (៣). មានភាពជាអ្នកដឹកនាំ អាចសហការ និងធ្វើការងារជាក្រុមប្រកបដោយភាពស្និតស្នាល (៤). មានការគិត ឥរិយាបទ និងអាកប្បកិរិយាជាវិជ្ជមាន និង (៥). ចេះស្វែងយល់ពីចំនុចខ្សោយរបស់ខ្លួន ព្រមទាំងបន្តអភិវឌ្ឍនខ្លួនលើជំនាញបច្ចេកទេសឱ្យបានច្បាស់លាស់៕