[Kley Kley News] - រដ្ឋមន្រ្តីក្រសួងសាធារណការ បញ្ជាក់ជាថ្មីអំពីគម្រោងរថភ្លើងលើអាកាសនៅភ្នំពេញ
2018-05-30
Go to the website published Kley Kley News
លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានបញ្ជាក់ថា ក្រសួងកំពុងតែបន្តសហការជាមួយអង្គការ JICA សិក្សាគម្រោងរថភ្លើងលើអាកាស (AGT) ពីភ្នំពេញ ទៅព្រលានយន្តហោះ។ ការថ្លែងនេះ ធ្វើឡើងក្នុងពិធីដាក់ឱ្យប្រើប្រាស់បណ្តោះអាសន្នផ្លូវដែក បាត់ដំបង-ពោធិ៍សាត់ កាលពីថ្ងៃទី២៩ ខែឧសភា ឆ្នាំ២០១៨។
លោកបន្តថា ក្រោយពេលសិក្សាចប់សព្វគ្រប់ គម្រោងនេះអាចនឹងត្រូវចាប់ផ្តើមសាងសង់នៅឆ្នាំ២០១៩។ លោកអះអាងថា ជប៉ុនឯកភាពឱ្យកម្ពុជាខ្ចីជាង ៨០០លានដុល្លារ ដើម្បីសាងសង់រថភ្លើងលើអាកាសនេះ។
ការលើកឡើងរបស់លោករដ្ឋមន្រ្តីខាងលើនេះ គឺបន្ទាប់ពីមានសារព័ត៌មានមួយចំនួនបានចេញផ្សាយថា ជប៉ុន មិនឱ្យលុយមកកម្ពុជា សាងសង់រថភ្លើងនេះទេ ដោយសារការបោះឆ្នោតមិនត្រឹមត្រូវ។
បើតាមគម្រោងដែលអាជ្ញាធរបានបង្ហាញនាពេលកន្លងមក ឱ្យដឹងថា គម្រោងរថភ្លើងលើអាកាស AGT មានប្រវែង ១៨គីឡូម៉ែត្រ រត់តាមបណ្តោយផ្លូវមួយចំនួនដូចជា៖ មហាវិថីហ្សាលដឺហ្គោល មហាវិថីព្រះមុនីរ៉េត ផ្លូវលេខ ២១៧ ផ្លូវវេងស្រេង ឆ្ពោះទៅព្រលានយន្តហោះ និង១ខ្សែទៀតបែកខ្នែងទៅផ្លូវជាតិលេខ៤ និងផ្លូវកប់ស្រូវ។
អាជ្ញាធររាជធានីភ្នំពេញ បានអះអាងថា គម្រោងដឹកជញ្ជូនលើអាកាសខ្នាតមធ្យមនេះ ជាផ្នែកមួយដ៏សំខាន់ដែលជាមធ្យោបាយដឹកជញ្ជូនសាធារណៈ ក្នុងការចូលរួមកាត់បន្ថយការកកស្ទះចរាចរណ៍ ការប្រែប្រួលអាកាសធាតុ និងការវិវត្តនៃសង្គមសេដ្ឋកិច្ច របស់ប្រទេសកម្ពុជានាពេលអនាគត៕
