“រាល់កិច្ចការងារដែលក្រសួងបាន និង កំពុងអនុវត្ត តែងតែកំណត់ច្បាស់លាស់នូវតម្លាភាព ឬគណនេយ្យភាពសង្គម” មតិលើកឡើងរបស់នាយកគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្នុងពីធីបើកវគ្គ សិក្ខាសាលាផ្សព្វផ្សាយការអនុវត្តគណនេយ្យភាពសង្គមក្នុងក្របខណ្ឌគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) សៀមរាប៖ ថ្ងៃសុក្រ ២រោច ខែចេត្រ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៧ ខែមេសា ឆ្នាំ២០២៣ លោក ចៅ សុភៈភិបាល អគ្គនាយករង នៃអគ្គនាយកដ្ឋានប្រព័ន្ធចម្រោះទឹកកខ្វក់ និងជានាយកគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ព្រមដោយ លោកស្រី លឹម ផល្លីកា អភិបាលរងក្រុងសៀមរាប និងជាប្រធានក្រុមការងារគណនេយ្យភាពសង្គមក្រុង បានអញ្ជើញជាសហអធិបតីបើកវគ្គសិក្ខាសាលាផ្សព្វផ្សាយការអនុវត្តគណនេយ្យភាពសង្គម ក្នុងក្របខណ្ឌគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ដោយមានការចូលរួមផងដែរពីមន្ត្រីថ្នាក់មូលដ្ឋានមកពី សង្កាត់ស្លក្រាម សង្កាត់ស្វាយដង្គំ សង្កាត់សាលាកំរើក មន្ទីរ និងបណ្តាអង្គភាពពាក់ព័ន្ធ។ គោលបំណងនៃការរៀបចំសិក្ខាសាលានេះ គឺធ្វើឱើងដម្បីផ្សព្វផ្សាយ ចែករំលែកនូវបទពិសោធន៍ ពីការអនុវត្តគណនេយ្យភាពសង្គមក្នុងគម្រោងលើកកម្ពស់ការយល់ដឹងពីស្តង់ដារនានា អំពីសេវាកម្មទឹកកខ្វក់ ដល់ភាគីពាក់ព័ន្ធតាមថ្នាក់ខេត្ត ក្រុង សង្កាត់ មន្ទីរ ដើម្បីអាចកៀរគរការគាំទ្រពីដៃគូគ្រប់កម្រិតនៅថ្នាក់ក្រោមជាតិលើការងារឱ្យមានគណនេយ្យភាពសង្គម ក្នុងគម្រោងផ្គត់ផ្គង់ទឹកស្អាត និងអនាម័យ ដោយមានការពិនិត្យវាយតម្លៃលទ្ធផលការងារប្រចាំត្រីមាស និងលើកផែនការសកម្មភាពប្រចាំឆ្នាំ២០២៣។ បន្ថែមពីលើនេះ ក៏មានការពិភាក្សាព្រមព្រៀងគ្នា រវាងអ្នកផ្តល់សេវា និងអ្នកទទួលសេវា ដើម្បីបង្កើតផែនការរួមគ្នា បង្កើនការតបណ្តាញលូទឹកស្អាត ធ្វើឱ្យប្រសើរឡើងនូវសេវាអនាម័យ និងត្រូវពង្រឹងសមត្ថភាពបន្ថែមដល់អង្គភាព ក្នុងន័យកែលម្អគុណភាពនៃការផ្តល់សេវាឱ្យមានប្រសិទ្ធភាពជូនពលរដ្ឋ។ នាឱកាសនោះ លោកអគ្គនាយករង បានថ្លែងអំណរគុណដល់សិក្ខាកាមទាំងអស់ដែលបានចូលរួមពីគ្រប់ផ្នែកពាក់ព័ន្ធ និងបានគូសបញ្ជាក់ថា រាល់កិច្ចការងារដែលក្រសួងបានអនុវត្តកន្លងមក និងបច្ចុប្បន្ន តែងតែកំណត់ដាក់បញ្ជូលនូវ គណនេយ្យភាពសង្គម គឺជាយន្តការមួយដ៏ប្រសើរក្នុងការលើកកម្ពស់ ឱ្យមានការចូលរួមរបស់ប្រជាពលរដ្ឋ និងជាការរួមចំណែកយ៉ាងសំខាន់ធ្វើឱ្យប្រសើរឡើងក្នុងការផ្តល់សេវាសាធារណៈផ្នែកទឹកកខ្វក់ ប្រកបដោយប្រសិទ្ធភាព។ ទន្ទឹមនឹងនោះដែរ លោកអគ្គនាយករង បានលើកពីក្តីសង្ឃឹមយ៉ាងមុតមាំក្នុងការចូលរួម ពីគ្រប់អង្គភាព ក៏ដូចជាភាគីពាក់ព័ន្ធទាំងអស់ ក្នុងការសហការ សម្របសម្រួល ដើម្បីបន្តអនុវត្តសកម្មភាពដែលត្រូវធ្វើក្នុងពេលខាងមុខ ដើម្បីទទួលបានប្រសិទ្ធភាព រវាងអ្នកប្រើប្រាស់សេវា និងអ្នកផ្តល់សេវា។ អង្គសិក្ខាសាលា បានចែករំលែកនូវចំណេះដឹង បទពិសោធន៍ល្អៗ ដែលបានអនុវត្តកន្លងមក និងមានការពិភាក្សាផ្លាស់ប្តូរមតិយោបល់យ៉ាងផុលផុស ពីគ្រប់អង្គភាពពាក់ព័ន្ធដែលបានអញ្ជើញចូលរួមនាពេលនោះ៕