ព្រឹត្ដិការណ៍សង្ក្រាន្ដវិទ្យាស្ថានតេជោសែន សាធារណការ និងដឹកជញ្ជូន(TSI) ឆ្នាំ២០២៣ និងការសម្តែងរបាំត្រុដិ ទីស្តីការក្រសួង៖ នារសៀលថ្ងៃសុក្រ ២រោច ខែចេត្រ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី០៧ ខែមេសា ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញចូលរួមព្រឹត្តិការណ៍សង្ក្រាន្តដែលរៀបចំឡើងដោយវិទ្យាស្ថានតេជោសែន សាធារណការ និងដឹកជញ្ជូន និងទស្សនាការសម្តែងរបាំត្រុដិ ដែលដឹកនាំសម្តែងដោយនិស្សិតវិទ្យាស្ថាន ដោយមានការអញ្ជើញចូលរួមពីឯកឧត្តម លោកជំទាវជាថ្នាក់ដឹកនាំក្រសួង ថ្នាក់ដឹកនាំវិទ្យាស្ថាន មន្ត្រីរាជការក្រោមឱវាទក្រសួង និងសិស្ស និស្សិតផងដែរ។ ព្រឹត្ដិការណ៍នេះរៀបចំឡើងដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខែ្មរ ដែលជាទំនៀមទម្លាប់ និងអត្តសញ្ញាណដ៏ល្អផូរផង់របស់ជាតិ ក៏ដូចជាដើម្បីបង្កើនភាពជិតស្និតរវាងថ្នាក់ដឹកនាំក្រសួងសាធារណការ និងដឹកជញ្ជូន លោកគ្រូ-អ្នកគ្រូ សាស្ត្រាចារ្យ និងនិស្សិតគ្រប់ជំនាន់ ក្រោមការឧបត្ដម្ភគាំទ្រពីឯកឧត្ដមទេសរដ្ឋមន្ត្រី។ កម្មវិធីនេះ ត្រូវបានធ្វើឡើងរយៈពេលមួយថ្ងៃពេញ ដោយមានសកម្មភាពជាច្រើនរួមមាន៖ ការលេងល្បែងប្រជាប្រិយ ការសម្ដែងសមត្ថភាព និងការប្រកួតប្រជែងរបស់និស្សិត ការលក់ម្ហូបអាហារនៅតាមស្ដង់ ការតាំងបង្ហាញសមិទ្ធិផលនានារបស់អង្គភាពក្រោមឱវាទក្រសួង និងការប្រគុំតន្រ្ដីជាដើម។ ព្រឹត្ដិការណ៍នេះ ជាការផ្តល់ឱកាសឱ្យនិស្សិតចូលរួមបង្កើតគំនិតច្នៃប្រឌិត តាមរយៈសកម្មភាពនានាដូចជា៖ ការរៀបចំកម្មវិធី ការធ្វើការងារជាក្រុម ការលក់ម្ហូបអាហារតាមស្ដង់ ការលេងល្បែងកម្សាន្ដ និងការចូលរួមប្រកួតប្រជែងសម្តែងជាដើម ដែលជាជំនាញទន់ ដើម្បីអភិវឌ្ឍសមត្ថភាពផ្ទាល់ខ្លួនបន្ថែមពីលើជំនាញបច្ចេកទេស ដែលវិទ្យាស្ថានបានផ្ដល់ជូន។ ជាងនេះទៅទៀត នេះក៏ជាកាយវិការមួយបង្ហាញ អំពីការចូលរួមសកម្មភាពសង្គម ការថែរក្សាទំនៀមទំលាប់ វប្បធម៌ ប្រពៃណី របស់ប្រទេសជាតិយើង និងប្រមូលថវិកាសប្បុរសធម៌ ដើម្បីជួយដល់សាលាដែលមានការខ្វះខាតក្នុងខេត្ដសៀមរាបផងដែរ។ សូមបញ្ជាក់ផងដែរថា៖ រាប់ចាប់ពីការតុបតែងទីធ្លាវិទ្យាស្ថាន ការរៀបចំស្ដង់ ការសម្ដែងសមត្ថភាព ការរៀបចំកម្មវិធី រហូតដល់ការគ្រប់គ្រងពិធីការកម្មវិធី គឺត្រូវបានធ្វើឡើងដោយកម្លាំងសាមគ្គី របស់និស្សិតគ្រប់ជំនាន់ ក្រោមការណែនាំ និងសម្របសម្រួលរបស់ថ្នាក់ដឹកនាំវិទ្យាស្ថាន។ តាមរយៈការចូលរួមរៀបចំកម្មវិធីសង្ក្រាន នេះ និស្សិតវិទ្យាស្ថានតេជោសែន សាធារណការ និងដឹកជញ្ជូន បានរៀនសូត្របន្ថែមនូវជំនាញទន់ដោយផ្ទាល់ពីការអនុវត្ដការងារ (On-Job Training) ដែលក្នុងនោះរួមមាន៖ ជំនាញនិយាយជាសាធារណៈ (Public Speaking Skill) ជំនាញរៀបចំគ្រប់គ្រងកម្មវិធី (Event-management Skill) ជំនាញភាពជាអ្នកដឹកនាំ (Leadership Skill) ការធ្វើការងារជាក្រុម ការគ្រប់គ្រងពេលវេលា និង ជំនាញផ្សព្វផ្សាយ ជាដើម៕