សិក្ខាកាមប្រមាណ១៩០រូប ចូលរួមសិក្ខាសាលាផ្សព្វផ្សាយ និងវគ្គបណ្តុះបណ្តាលស្តីពី៖ “ សេវា សាធារណៈ ដែលបានធ្វើប្រតិភូកម្មជូនអង្គភាពច្រកចេញចូលតែមួយ ” និង “ ការប្រើប្រាស់ប្រព័ន្ធស្វ័យ ប្រវត្តិកម្ម គ្រប់គ្រងចំណូលសេវាសាធារណៈរបស់ក្រសួងសាធារណការ និងដឹកជញ្ជូន” សៀមរាប៖ ថ្ងៃអង្គារ-ពុធ ១៥រោច-១កើត ខែចេត្រ ឆ្នាំខាល ចត្វាស័ក ព.ស ២៥៦៧ ត្រូវនឹងថ្ងៃទី២១-២២ ខែមីនា ឆ្នាំ២០២៣ ឯកឧត្តមអនុរដ្ឋលេខាធិការ ស៊ឹង សុគង់ តំណាងឯកឧត្តម សួង ហេង រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយ និងវគ្គ បណ្តុះបណ្តាលស្តីពី៖ “សេវាសាធារណៈដែលបានធ្វើប្រតិភូកម្មជូនអង្គភាពច្រកចេញចូលតែមួយ ” និង “ ការប្រើប្រាស់ប្រព័ន្ធស្វ័យប្រវត្តិកម្ម គ្រប់គ្រងចំណូលសេវាសាធារណៈរបស់ក្រសួងសាធារណការ និងដឹក ជញ្ជូន” ដល់មន្ត្រីជំនាញនៃមន្ទីរសាធារណការ និងដឹកជញ្ជូនទូទាំង២៥រាជធានី-ខេត្ត និងអង្គភាពច្រក ចេញចូលតែមួយ សរុបប្រមាណ១៩០រូប។ សិក្ខាសាលានេះរៀបចំឡើងដើម្បីសម្រេចឱ្យបាននូវគោលដៅជាតិសំខាន់ៗ សម្រាប់ការអភិវឌ្ឍតាមបែប ប្រជាធិបតេយ្យនៅថ្នាក់ក្រោមជាតិ បង្កើនការយល់ដឹង ពង្រឹងសមត្ថភាពបន្ថែមដល់មន្ត្រីផ្ដល់សេវា ជំរុញ ការធ្វើទំនើបកម្មតាមបែបឌីជីថល ប្រព័ន្ធអភិបាលកិច្ចថ្នាក់ក្រោមជាតិ និងកែលម្អការផ្ដល់សេវា សាធារណៈ ប្រកបដោយគុណភាព គណនេយ្យភាព និងតម្លាភាព ស្របតាមគោលនយោបាយ និងចក្ខុ វិស័យរបស់រាជរដ្ឋាភិបាលកម្ពុជា ដែលកំពុងធ្វើទំនើបកម្ម បង្ខិតសេវាសាធារណៈឱ្យកាន់តែកៀគ ប្រជាពលរដ្ឋ លុបបំបាត់ចំណុចស្មុគស្មាញដែលនាំឱ្យពលរដ្ឋរង់ចាំយូរជាដើម។ ថ្លែងក្នុងអង្គពិធីនាឱកាសនោះ ឯកឧត្ដមអនុរដ្ឋលេខាធិការ បានថ្លែងអំណរគុណដល់សិក្ខាកាមជាមន្ត្រី មកពីគ្រប់មន្ទីរ និងច្រកចេញចូល អញ្ជើញចូលរួមសិក្ខាសាលាផ្សព្វផ្សាយនេះ ហើយសង្ឃឹមថាសិក្ខាកាមទាំងអស់នឹងបន្តចែករំលែកព័ត៌មាន របៀបរបបបែបបទនៃការផ្តល់សេវាទៅដល់ក្រុមការងារ ដែលមិនបាន ចូលរួមពេលត្រឡប់ទៅកាន់អង្គភាពរបស់ខ្លួន ដើម្បីអាចយកទៅអនុវត្តក្នុងការបម្រើសេវា ជូនពលរដ្ឋបាន កាន់តែល្អប្រសើរ ប្រកបដោយទំនុកចិត្ត សំដៅឈានទៅបំបាត់ប្រព័ន្ធរដ្ឋបាល ដែលបង្កឱ្យមានភាពយឺត យ៉ាវ និងបង្កការលំបាកដល់បងប្អូនប្រជាពលរដ្ឋ។ ជាមួយគ្នានោះផងដែរ ឯកឧត្ដមអនុរដ្ឋលេខាធិការ បានគូសបញ្ជាក់ថា៖ បច្ចុប្បន្ននេះបច្ចេកវិទ្យា ព័ត៌មានវិទ្យាក្នុងពិភពលោកកំពុងមានការីកចម្រើនយ៉ាងឆាប់រហ័ស ជាពិសេសក្នុងយុគសម័យបដិវត្តន៍ ឧស្សាហកម្មជំនាន់៤.០ ហើយត្រូវបានប្រើប្រាស់យ៉ាងទូលំទូលាយក្នុងប្រព័ន្ធគ្រប់គ្រងកិច្ចការ ការបែងចែកការងារត្រូវអនុវត្ត ការគ្រប់គ្រងទិន្នន័យ និងការប្រាស្រ័យទាក់ទងជាសាធារណៈ ដែលតម្រូវឱ្យយើង ជាមន្ត្រីបម្រើសេវាជូនពលរដ្ឋ ត្រូវមានចំណេះដឹងទូលំទូលាយលើផ្នែកនេះ។ បន្ថែមពីលើនេះ ឯកឧត្ដមអនុរដ្ឋលេខាធិការ បានសម្តែងក្តីសង្ឃឹមយ៉ាងមុតមាំថាសិក្ខាកាមទាំងអស់នឹងផ្តោតការយកចិត្តទុកដាក់ស្វែងយល់ និងពិភាក្សាគ្នាឱ្យបានផុលផុសលើប្រធានបទ ដើម្បីមានសមត្ថភាព អាចប្រើប្រាស់ប្រព័ន្ធព័ត៌មានវិទ្យារបស់ក្រសួង ក្នុងការផ្ដល់សេវាសាធារណៈជូនប្រជាពលរដ្ឋបានលឿន រហ័ស បន្ទាប់ពីបានបញ្ចប់សិក្ខាសាលាផ្សព្វផ្សាយ និងវគ្គបណ្ដុះបណ្ដាលនេះ។ សូមបញ្ជាក់ជូនថា៖ រាជរដ្ឋាភិបាលកម្ពុជា បានដាក់ចេញនូវចក្ខុវិស័យសម្រាប់កំណែទម្រង់ការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិក្នុងរយៈពេល១០ឆ្នាំខាងមុខ (ឆ្នាំ២០២១ ដល់ឆ្នាំ២០៣០) ដើម្បីឱ្យប្រជាពលរដ្ឋទទួលបានសេវាសាធារណៈ និងផលប្រយោជន៍ពីការអភិវឌ្ឍមូលដ្ឋានរបស់រដ្ឋបាល ថ្នាក់ក្រោមជាតិប្រកបដោយបរិយាប័ន្ន និងសមធម៌សង្គម រួមចំណែកសម្រេចឱ្យបាននូវគោលបំណង ដ៏ទូលំទូលាយក្នុងការអភិវឌ្ឍសេដ្ឋកិច្ច និងសង្គមជាតិ និងប្រែក្លាយកម្ពុជាទៅជាប្រទេសដែលមាន ចំណូលមធ្យមកម្រិតខ្ពស់នៅឆ្នាំ២០៣០៕