លោកបណ្ឌិត ហេង សុផាន់ណារិទ្ធ អគ្គនាយករងបេឡាជាតិសន្តិសុខសង្គម និងជា ប្រធានក្រុមការងារសុវត្ថិភាពចរាចរណ៍ផ្លូវគោក សម្រាប់គាំពារកម្មករ និយោជិត (ស.ផ.ក) នៅក្នុងពិធីអប់រំផ្សព្វផ្សាយ “ច្បាប់ស្តីពីចរាចរណ៍ផ្លូវគោក សុវត្ថិភាព លើមធ្យោបាយធ្វើដំណើរ និងសុវត្ថិភាព លើមធ្យោបាយដឹកជញ្ជូន ជូនអ្នកបើកបរ ដឹកកម្មករ និងកម្មករ និយោជិត” កាលពីសប្តាហ៍កន្លងទៅនេះ បានមានប្រសាសន៍ថាៈ បញ្ហាធំចម្បង​ដែលធ្វើឱ្យមានករណីគ្រោះថ្នាក់ចរាចរណ៍ គឺកើតឡើងដោយសារ​អ្នកប្រើប្រាស់ផ្លូវមួយចំនួន មិនបានប្រុងប្រយ័ត្ន មិនគោរពច្បាប់ស្តីពីចរាចរណ៍ផ្លូវគោក និងវិធានសុវត្តិភាពនានា ដោយបើកបរលើសល្បឿនកំណត់ មិនគោរពសិទ្ធិ មិនប្រកាន់ស្ដាំ វ៉ាជែង បត់មិនត្រឹមត្រូវ បើកបរក្នុងស្ថានភាពស្រវឹង កត្តាយានយន្ត ងងុយ មិនពាក់ខ្សែក្រវាត់សុវត្ថិភាព ខ្វះការប្រុងប្រយ័ត្ន ឬខ្វះការយោគយល់ អធ្យាស្រ័យ បង្កឱ្យមានគ្រោះថ្នាក់ចរាចរណ៍ កើតឡើង ជារៀងរាល់ថ្ងៃ។ លោកអគ្គនាយករង ក៏បានជំរុញដល់អ្នកបើកបររថយន្តដឹកកម្មករ និយោជិតទាំងអស់ ចូលរួមគោរពច្បាប់ចរាចរណ៍​ដើម្បីសុវត្ថិភាពរបស់យើង តាមពាក្យស្លោករបស់សម្តេច នាយករដ្ឋមន្ត្រី និងសារអំពាវនាវរបស់គណៈកម្មាធិការជាតិ សុវត្ថិភាពចរាចរណ៍ ផ្លូវគោកគឺ៖ ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍, គោរពច្បាប់ចរាចរណ៍ ផ្លូវគោក ជាកាតព្វកិច្ចរបស់អ្នកប្រើប្រាស់ផ្លូវគ្រប់រូប, បើកបរលើសល្បឿន ដែលច្បាប់ កំណត់ ងាយប្រឈមនឹងគ្រោះថ្នាក់, បើស្រវឹង សូមកុំបើកបរ, គោរពច្បាប់ ស្តីពី ចរាចរណ៍ផ្លូវគោក គឺគោរពជីវិតខ្លួនឯង និងអ្នកដទៃ, គោរពច្បាប់ស្តីពីចរាចរណ៍ផ្លូវគោក គឺលើកកម្ពស់កិត្យានុភាពជាតិ និងការពារជីវិតអ្នក ត្រូវពាក់មួកសុវត្ថិភាព។ យោងតាមរបាយការណ៍របស់ ក្រុមការងារសុវត្ថិភាពចរាចរណ៍ផ្លូវគោក សម្រាប់គាំពារ កម្មករ និយោជិត នៅក្នុងឆ្នាំ២០២២ កន្លងទៅថ្មីៗនេះ មានករណីគ្រោះថ្នាក់ចរាចរណ៍ ផ្លូវគោក បានកើតឡើងលើបងប្អូនកម្មករ និយោជិត សរុបចំនួន ៥ ១៥៨ ករណី ដែលមានជនរងគ្រោះ សរុបចំនួន ៦ ០៥១ នាក់ (ស្លាប់ ១៥៦ នាក់ របួសធ្ងន់ ១ ៦២៤ នាក់ និងរបួសស្រាល ៤ ២៧១ នាក់) ក្នុងនោះគ្រោះថ្នាក់លើរថយន្តដឹកកម្មករ និយោជិត មានចំនួន ១៣លើក និងមានជនរងគ្រោះសរុបចំនួន ៣៨០ នាក់ (ស្លាប់ ១នាក់ របួសធ្ងន់ ៤៩ នាក់ និង របួសស្រាល ៣៣០ នាក់) មានការកើនឡើង បើធៀបទៅនឹង ឆ្នាំ២០២១ កន្លងទៅ។ ដោយឡែក ក្នុងឆ្នាំ២០២២ កន្លងទៅ សម្រាប់ខេត្តស្វាយរៀង មានករណីគ្រោះថ្នាក់ចរាចរណ៍ បានកើតឡើងលើបងប្អូន កម្មករ និយោជិត សរុបចំនួន ៣៦៥ ករណី ដែលមានជនរងគ្រោះ សរុបចំនួន ៤៣៥ នាក់ ដែលក្នុងនោះស្រ្តីមានចំនួន ២០៤ នាក់។ សូមបញ្ជាក់ថា ពិធីអប់រំផ្សព្វផ្សាយ “ច្បាប់ស្តីពីចរាចរណ៍ផ្លូវគោក សុវត្ថិភាពលើ មធ្យោបាយធ្វើដំណើរ និងសុវត្ថិភាព លើមធ្យោបាយដឹកជញ្ជូន ជូនអ្នកបើកបរដឹកកម្មករ និងកម្មករ និយោជិត” បានប្រព្រឹត្តទៅ នាព្រឹកថ្ងៃទី១៧ ខែមីនា ឆ្នាំ២០២៣ ស្ថិតនៅក្នុងតំបន់សេដ្ឋកិច្ចពិសេស មេនហាតធេន ក្រុងបាវិត ខេត្តស្វាយរៀង ដោយមានវត្តមានចូលរួម ពីតំណាងស្ថាប័ន មន្ទីរ រោងចក្រ និងអង្គភាពពាក់ព័ន្ធនានា ព្រមទាំងមានការចូលរួមពី បងប្អូនអ្នកបើកបរ រថយន្តដឹកកម្មករ និយោជិត និងបងប្អូនកម្មករ និយោជិត សរុបប្រមាណជាង ៣៥០ នាក់៕