នៅក្នុងឆ្នាំ២០២៣ នេះស្ពានធំៗចំនួន ២ កន្លែង ដែលសាងសាង់ និងវិយោគដោយសារក្រុមហ៊ុន OCIC របស់អ្នកឧកញ៉ា ពុង ឃាវសែ នឹងត្រូវបញ្ចប់សាងសាង់ជាស្ថាពរដើម្បីដាក់ឲ្យប្រើប្រាស់ ដោយស្ពានទាំង ២ នោះរួមមាន៖ ស្ពានខ្សែកាបតភ្ជាប់កោះពេជ្រ-កោះនរា និងស្ពានខ្សែកាបឆ្លងកាត់ទន្លេសាប។ ស្ពានខ្សែកាបតភ្ជាប់កោះពេជ្រ-កោះនរា ត្រូវបានបើកការសាងសង់កាលពីអំឡុងខែតុលា ឆ្នាំ២០២០។ ស្ពាននេះមានប្រវែងសរុប ៨២៤ ម៉ែត្រ និងទទឹង ២៤.៥ ម៉ែត្រ មានសសរខ្សែកាបកម្ពស់ ៦០ ម៉ែត្រចំនួន ២ ដើម និងមានផ្លូវចរាចរ ២ ទៅ ២ មក។ តាមការគ្រោងទុកគម្រោងនេះនឹងចំណាយថវិកាសាងសង់ចំនួន ៣៨ លានដុល្លារ។ ជាមួយគ្នានេះដែរ យោងតាមការចុះផ្សាយពីមន្ទីរសាធារណការ និងដឹកជញ្ជូនរាជធានីភ្នំពេញ គិតត្រឹមថ្ងៃទី៤ ខែមីនាឆ្នាំ២០២៣ ការដ្ឋានសាងសង់ស្ពានខ្សែកាបកោះពេជ្រ-កោះនរា សម្រេចលទ្ឋផលបាន ៦២% ហើយ។ តាមផែនការ គម្រោងនេះ នឹងបញ្ចប់ការសាងសង់នៅចុងឆ្នាំ២០២៣។ ស្ពានកោះពេជ្រ-កោះនរា គឺជាការភ្ជាប់ចរាចរកណ្តាលរាជធានីភ្នំពេញទៅមកផ្លូវជាតិលេខ ១ ហើយនឹងកាត់បន្ថយការកកស្ទះចរាចរលើស្ពានព្រះមុនីវង្សទាំង២ផងដែរ។ ២. ស្ពានខ្សែកាបឆ្លងកាត់ទន្លេសាប ស្ពានខ្សែកាបនេះ មានប្រវែងសរុប ៦៤២ ម៉ែត្រ ទទឹង ២០.៥ ម៉ែត្រ មានសសរទាញខ្សែកាបចំនួន ៤ កម្ពស់ ៤០ ម៉ែត្រធៀបនឹងកម្រាលស្ពាន ដែលសាងសង់តភ្ជាប់ពីផ្លូវជាតិលេខ ៥ ស្ថិតនៅក្នុងខណ្ឌឫស្សីកែវឆ្លងកាត់ទន្លេសាបឆ្ពោះទៅកាន់ទីក្រុងរណបថ្មីជ្រោយចង្វារ និងផ្លូវជាតិលេខ ៦A។ តាមការបញ្ជាក់ពីមន្ទីរសាធារណការ និងដឹកជញ្ជូន គិតត្រឹមខែមករា កន្លងទៅស្ពាននេះសាងសង់សម្រេចបាន ៩៣% នៃគម្រោងទាំងមូល។ នៅពេលបើកដំណើរការស្ពានដ៏សំខាន់នេះ នឹងជួយរំដោះការធ្វើចរាចរលើផ្លូវជាតិលេខ៦ និងផ្លូវជាតិលេខ៥ ក៏ដូចជាច្រកចេញចូលរាជធានីភ្នំពេញថែមទៀតផង។ សូមជម្រាបថា គម្រោងសាងសង់ស្ពានឆ្លងកាត់ទន្លេសាបនេះ ត្រូវបានចាប់ផ្ដើមសាងសង់កាលពីអំឡុងខែតុលា ឆ្នាំ២០១៧ ហើយតាមការគ្រោងទុក គម្រោងនេះនឹងបញ្ចប់ទាំងស្រុងនៅដើមខែមេសាឆ្នាំ២០២៣នេះផងដែរ ខណៈដែលថវិកាសម្រាប់ការសាងសង់គឺមានចំនួន ៣៥ លានដុល្លារ៕