កិច្ចប្រជុំពិភាក្សាការងារលើគម្រោងស្តារ និងលើកកម្រិតកំណាត់ផ្លូវជាតិលេខ៧ (រមាត-ត្រពាំងគ្រៀល) ទីស្ដីការក្រសួង៖ នាព្រឹកថ្ងៃអង្គារ ៩កើត ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៨ ខែកុម្ភៈ ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាការងារលើគម្រោងស្តារ និងលើកកម្រិតកំណាត់ផ្លូវជាតិលេខ៧ (រមាត-ត្រពាំងគ្រៀល) ជាមួយ លោក Wu Guoquan ទីប្រឹក្សាសេដ្ឋកិច្ច និងពាណិជ្ជកម្ម នៃស្ថានទូតសាធារណរដ្ឋប្រជាមានិតចិនប្រចាំកម្ពុជា និងក្រុមហ៊ុន China Railway First Survey & Design Institute Group Co.,Ltd ដោយមានការចូលរួមពីថ្នាក់ដឹកនាំក្រសួង និងមន្ត្រីបច្ចេកទេសជាច្រើនរូប។ ក្រុមហ៊ុនបានធ្វើបទបង្ហាញជូនឯកឧត្តមទេសរដ្ឋមន្ត្រី លើការសិក្សាពីបច្ចុប្បន្នភាពនៃផ្លូវជាតិលេខ៧ និងនីតិវិធីសំខាន់ៗក្នុងស្តារ និងលើកកម្រិតកំណាត់ផ្លូវជាតិមួយខ្សែនេះ ចាប់ពីភូមិរមាត ឃុំអូរគ្រៀង ស្រុកសំបូរ ខេត្តក្រចេះ រហូតដល់ត្រពាំងគ្រៀល ខេត្តស្ទឹងត្រែង (ព្រំប្រទល់កម្ពុជា-ឡាវ) ប្រវែងសរុប ៩៦,៦៣គីឡូម៉ែត្រ។ តាមរយៈការពិនិត្យលើបទបង្ហាញ អង្គប្រជុំក៏បានផ្លាស់ប្តូរមតិ និងលើកជាមតិយោបល់ ឱ្យក្រុមហ៊ុនទទួលបន្ទុកពិនិត្យសិក្សាលើការប្រើប្រាស់បច្ចេកទេសផ្លូវថ្នល់ និងការរៀបចំកំណត់ទទឹងផ្លូវឱ្យបានសមរម្យសម្រាប់ស្ថានភាពភូមិសាស្ត្រផ្លូវជាតិលេខ៧នេះផងដែរ ដើម្បីរៀបចំនីតិវិធីបន្តសម្រាប់ឈានដល់ការអនុវត្តគម្រោងនៅពេលខាងមុខ។ គម្រោងនេះជាគម្រោងស្ថិតក្រោមជំនួយឥតសំណងពីសាធារណរដ្ឋប្រជាមានិតចិន ដែលទទួលបន្ទុកការសិក្សាដោយក្រុមហ៊ុន China Railway First Survey & Design Institute Group Co.,Ltd៕