[Khmer times] - ក្រសួងសាធារណការរកឃើញយានយន្តកែច្នៃខុសបច្ចេកទេសជាង ៩ ០០០គ្រឿងនៅឆ្នាំមុន
2023-02-16
Go to the website published Khmer times
ក្រសួងសាធារណការ និងដឹកជញ្ជូនបាននិយាយថា ពួកគេបានរកឃើញយានយន្តកែច្នៃមិនត្រឹមត្រូវតាមលក្ខណ:បច្ចេកទេសចំនួន ៩ ០០២គ្រឿង។ ចំនួននេះមានការថយចុះ ១០ភាគរយធៀបនឹងឆ្នាំ២០២១។
ក្រសួងសាធារណការនិងដឹកជញ្ជូន បានបង្ហាញរបាយការណ៍ពីម្សិលមិញថា ក្នុងឆ្នាំ២០២២ មានយានយន្តកែច្នៃខុសលក្ខណបច្ចេកទេសចំនួន
៥២ ៤៩៤គ្រឿងត្រូវបានកំណត់អត្តសញ្ញាណ ហើយនៅក្នុងចំណោមនោះបានរកឃើញចំនួន ៩ ០០២គ្រឿង ជាយានយន្តកែច្នៃមិនត្រឹមត្រូវតាមលក្ខណៈបច្ចេកទេស។
របាយការណ៍បន្តថា ចំនួនយានយន្តកែច្នៃមិនត្រឹមត្រូវតាមលក្ខណៈបច្ចេកទេសនៅក្នុងឆ្នាំ២០២២ មានការថយចុះ១០ភាគរយបើធៀបនឹងឆ្នាំ២០២១។ ប៉ុន្តែរបាយការណ៍នោះមិនបានបញ្ជាក់ពីប្រភេទយានយន្តនិងចំណាត់ការមកលើម្ចាស់យានយន្តកែច្នៃមិនត្រឹមត្រូវតាមលក្ខណៈបច្ចេកទេសនោះទេ។
ខ្មែរថាមស៍មិនអាចទាក់ទងអ្នកនាំពាក្យក្រសួងសាធារណការនិងដឹកជញ្ជូនលោក គង់ វិមាន ដើម្បីធ្វើអត្ថាធិប្បាយលើករណីនេះបានទេពីម្សិលមិញ។
ទោះយ៉ាងណាក្រសួងសាធារណការនិងដឹកជញ្ជូនបានយកចិត្តទុកដាក់លើបញ្ហានេះជាខ្លាំង។ នៅខែមេសា ឆ្នាំ២០២២ ក្រសួងបានដាក់ចេញវិធានការក្ដៅមកលើយានយន្តកែច្នៃមិនត្រឹមត្រូវតាមលក្ខណៈបច្ចេកទេសនិងគ្មានការអនុញ្ញាតពីក្រសួង ដែលធ្វើឲ្យប៉ះពាល់ដល់ផ្នែកសុវត្ថិភាពរបស់យាន និងបានធ្វើឲ្យប្រែប្រួលអត្តសញ្ញាណសម្គាល់របស់រថយន្ត។
ក្រសួងបន្តថា សកម្មភាពនេះបានផ្ទុយពីមាត្រា១៩ ស្តីពីការគ្រប់គ្រងយានដ្ឋានជួសជុលនិងយានដ្ឋានកែច្នៃ ដំឡើងយានយន្ត។
ក្រសួងបញ្ជាក់ថា ការកែច្នៃយានយន្តប៉ះពាល់ដល់ផ្នែកសុវត្ថិភាពរបស់យាន ដូចជាប្រព័ន្ធចង្កូត ប្រព័ន្ធទ្រសាក់ស៊ីនិងគ្រោងតួ ហើយក្រសួងមិនបានអនុញ្ញាតឲ្យចូលត្រួតពិនិត្យលក្ខណៈបច្ចេកទេស ឬចុះបញ្ជីផ្តល់បណ្ណសម្គាល់ និងបំពាក់ផ្លាកលេខសម្គាល់យានជំនិះឡើយ។ ការធ្វើបែបនេះ ដើម្បីធានានូវសន្តិសុខសណ្តាប់ធ្នាប់ សុវត្ថិភាព និងការគ្រប់គ្រងយានយន្តធ្វើចរាចរណ៍នៅលើផ្លូវថ្នល់។
ចំណែកយានដ្ឋានកែច្នៃរថយន្ត ដែលធ្វើសកម្មភាពកែច្នៃដំឡើងម៉ូឌែលរថយន្តដែលប៉ះពាល់ដល់ផ្នែកសុវត្ថិភាពរបស់យាន និងមិនបានស្នើសុំការអនុញ្ញាតកែច្នៃដំឡើង ក្រសួងនឹងចាត់វិធានការចុះបិទផ្អាកសកម្មភាពធ្វើអាជីវកម្មនៅទីតាំងយានដ្ឋាននោះ។នាយកអង្គការមូលនិធិបង្ការរបួសអាស៊ីប្រចាំនៅកម្ពុជា (AIP) លោក គឹម បញ្ញា បានសម្ដែងសាទរចំពោះយានយន្តកែច្នៃខុសបច្ចេកទេសមានការថយចុះសម្រាប់ឆ្នាំ២០២២ ដែលនេះជាយកចិត្តទុកដាក់របស់ក្រសួងសាធារណការនិងដឹកជញ្ជូនក្នុងយុទ្ធនាការទប់ស្កាត់និងលុបបំបាត់ការកែច្នៃយានយន្តដែលគ្មានការអនុញ្ញាតដោយច្បាប់។
លោកបន្តថា ការទប់ស្កាត់នេះដើម្បីធ្វឲ្យដងផ្លូវមានសុវត្ថិភាពសម្រាប់ការធ្វើដំណើរ និងដើម្បីបញ្ចៀសគ្រោះថ្នាក់ដល់ខ្លួនឯងដែលជាបញ្ជាយានយន្ត ក៏ដូចជាអ្នករួមដំណើរលើដងផ្លូវជាមួយគ្នា។ ទោះបែបនេះក្ដី លោក គឹម បញ្ញា ជំរុញឲ្យក្រសួងសាធារណការនិងដឹកជញ្ជូនកាន់តែរឹតបន្តឹងបន្ថែមទៀតលើករណីការកែច្នៃយានយន្តនេះ ព្រោះភាគីពាក់ព័ន្ធបានខិតខំធ្វើកិច្ចការនេះអស់រយៈជាច្រើនឆ្នាំមកហើយ ប៉ុន្តែយានយន្តកែច្នៃខុសច្បាប់នៅតែកើតមានច្រើន។
លោកនិយាយថា៖ «ប្រសិនបើក្នុងចំណោមប្រជាពលរដ្ឋរបស់យើងប្រើប្រាស់យានយន្តកែច្នៃខុសច្បាប់សម្រាប់ដឹកជញ្ជូនទិន្នផលកសិកម្ម គឺដោយសារតែគាត់ខ្វះការយល់ដឹង។ ដូច្នេះយើងគួរតែមានការសហការជាមួយនឹងអាជ្ញាធរមូលដ្ឋាន ជាពិសេសនៅតំបន់ដែលយើងកត់សម្គល់ឃើញមានករណីកែច្នៃយានយន្តច្រើន ដោយអប់រំនិងណែនាំពួកគាត់»។
លោកបន្តថា៖ «ប្រសិនបើយានយន្តកែច្នៃខុសលក្ខណៈបច្ចេកទេសដែលធ្វើឡើងដោយក្រុមហ៊ុនដឹកជញ្ជូន នោះក្រសួងសាធារណការ និងដឹកជញ្ជូនគួរតែមានវិធានការធ្ងន់ធ្ងរលើក្រុមហ៊ុនទាំងនោះ ដោយយើងមានការផ្សព្វផ្សាយជាមុនក្នុងរយៈពេលមួយខែឬពីរខែ បន្ទាប់មកយើងប្រើប្រាស់វិធានការក្ដៅដូចជាការដកអាជ្ញាបណ្ណបន្ថែមពីលើវិធានការច្បាប់ចំពោះយានដ្ឋានកែច្នៃយានយន្តដែលគ្មានច្បាប់ទាំងនោះ»៕
