[Rasmei Kampuchea Daily News] - ខេត្តស្ទឹងត្រែងចាប់ផ្ដើមសាងសង់ទីលានទុកដាក់សំរាមតម្លៃជាង៤លានដុល្លារ
ស្ទឹងត្រែង: ទីលានទុកដាក់សំរាមនៅខេត្តស្ទឹងត្រែងដែលមានតម្លៃជាង៤លានដុល្លារបានចាប់ផ្ដើមសាងសង់ហើយ។
លោក សរ គឹមណាត ប្រធានមន្ទីរសាធារណការ និងដឹកជញ្ជូនខេត្តស្ទឹងត្រែងបានឲ្យដឹងនៅព្រឹកថ្ងៃទី១៥ ខែកុម្ភៈ ឆ្នាំ២០២៣ថា ទីលានទុកដាក់សំរាមសម្រាប់ខេត្តស្ទឹងត្រែងដែលមានតម្លៃជាង៤លានដុល្លារនោះ បានចាប់ផ្ដើមសាងសង់នៅដំណាក់កាលទី១លើផ្ទៃដី១០ហិកតាកាលពីឆ្នាំ២០២២។ ទីលានមួយនេះសរុបផ្ទៃដីជាង១០០ហិកតាស្ថិតនៅក្នុងស្រុកថាឡាបរិវ៉ាត់។
ដោយឡែកកាលពីព្រឹកថ្ងៃទី១៤ កុម្ភ: លោកស្វាយ សំអ៊ាង អភិបាលខេត្តស្ទឹងត្រែង បានអញ្ជើញចុះពិនិត្យមើលដំណើរការដ្ឋានសំណង់ទីលានទុកដាក់សំរាមខាងលើ ដែលកំពុងសាងសង់បាន ៤០ភាគរយហើយ។ ការដ្ឋានសាងសង់នេះគឺជាគម្រោងអភិវឌ្ឍន៍ក្រុងរបៀង៤ របស់ក្រសួងសារធារណការ និង ដឹកជញ្ជូន ក្រោមកម្ចីឥណទាន ធនាគារអភិវឌ្ឍន៍អាស៊ី ( ADB ) ។
លោក ស្វាយ សំអ៊ាង អភិបាលខេត្តស្ទឹងត្រែង បានបញ្ជាក់ថា÷ នេះ គឺជាទីលានចាក់សំរាមលើក ដំបូងនៅខេត្តស្ទឹងត្រែង ដែលបង្កើតឡើងមានលក្ខណៈស្តង់ដារត្រឹមត្រូវតាមបច្ចេកទេស ធំទូលាយ អាចនឹងសង់រួចរាល់ នៅចុងឆ្នាំ២០២៣។
លោកអភិបាលខេត្តបានបន្ថែមថា÷បញ្ហាសំរាមគឺមានសារៈសំខាន់បំផុតដែលអាជ្ញាធរខេត្តត្រូវយកចិត្តទុកដាក់គ្រប់គ្រងឲ្យមានប្រសិទ្ធភាពខ្ពស់។ ប្រសិនបើគ្រប់គ្រងមិនបានល្អទេ វានឹងធ្វើឲ្យមានផលប៉ះពាល់ទៅដល់បរិស្ថាន និងសុខភាពអចិន្ត្រៃយ៍របស់មនុស្សជាហានិភ័យខ្ពស់បំផុតដល់សុខភាព៕
