នៅព្រឹកថ្ងៃទី៣០ ខែមករា ឆ្នាំ២០២៣ នេះ ក្រោយចប់កិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក ឆ្នាំ២០២២ និងលើកទិសដៅបន្ដឆ្នាំ២០២៣ សម្ដេចក្រឡាហោម ស ខេង បានថ្លែងប្រាប់អ្នកសារព័ត៌មានថា៖ «ច្បាប់ថ្មីនេះ បានឆ្លងគណៈកម្មាធិការជាតិសុវត្ថិភាពចរាចរណ៍ផ្លូវគោករួចរាល់ហើយ យើងកំពុងបញ្ជូនទៅក្រុមអក្សរសាស្ដ្រដើម្បីជួយមើលអក្ខរាវិរុទ្ធឲ្យបានច្បាស់លាស់ […] ខ្ញុំសង្ឃឹមថា នឹងជួយកាត់បន្ថយគ្រោះថ្នាក់ចរាចរណ៍ ព្រោះដោយសារច្បាប់ចាស់មានចំណុចមួយចំនួនអត់ស្រប ដូច្នេះខ្ញុំគិតថា អាចជួយបានច្រើន (ជួយកាត់បន្ថយគ្រោះថ្នាក់ចរាចរណ៍)»។ សម្តេចក្រឡាហោម បានគូសបញ្ជាក់ថា ដើមចមដែលជំរុញឲ្យធ្វើច្បាប់ចរាចរណ៍ថ្មី ដោយមិនធ្វើវិសោធន៍កម្មច្បាប់ចាស់ដែលមានស្រាប់នោះ ដោយសារតែច្បាប់ថ្មីមានការកែប្រែច្រើនស្ទើរទាំងស្រុង ហើយច្បាប់ចាស់ នោះទៀតសោទមានចំណុចមួយចំនួនអត់ស្របជាមួយស្ថានភាពជាក់ស្ដែងនៅពេលបច្ចុប្បន្ន។ ក្នុងនោះឧទាហរណ៍ជាក់ស្ដែង ការប្រើប្រាស់ផ្លូវល្បឿនលឿនជាដើម។ សូមជម្រាបថា សេចក្ដីព្រាងច្បាប់ចរាចរណ៍ថ្មីនេះ បានតាក់តែងឡើងដោយកែសម្រួលខ្លឹមសារមាត្រាច្បាប់ចាស់ ចំនួន ៤៨មាត្រា និងបន្ថែមមាត្រាថ្មីៗមួយចំនួនទៀត ដើម្បីឲ្យស្របតាមការអភិវឌ្ឍរបស់កម្ពុជា ជាពិសេសលើការអភិវឌ្ឍ ផ្លូវថ្នល់ រួមដូចជា ការពង្រីកផ្លូវ ការកសាងផ្លូវល្បឿនលឿន និងចង់បង្កើនប្រសិទ្ធភាព កាត់បន្ថយអ្នកស្លាប់ និងរបួសដោយគ្រោះថ្នាក់ចរាចរណ៍ ព្រមទាំងទប់ស្កាត់ការបើកបរមានសារធាតុញៀនជាដើម។ ច្បាប់ចរាចរណ៍ថ្មីនេះ មាន ១២ជំពូក ៩០មាត្រា៕