ពិធីប្រគល់-ទទួលផ្ទាំងបដា សារសុវត្ថិភាពចរាចរណ៍ផ្លូវគោក ចំនួន៣៥០ផ្ទាំងពីក្រុមហ៊ុន Manulife សម្រាប់យុទ្ធនាការផ្សព្វផ្សាយអប់រំសាធារណៈ ទីស្ដីការក្រសួង៖ ថ្ងៃអង្គារ ១១រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៧ ខែមករា ឆ្នាំ២០២៣ លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ.) បានអញ្ជើញជាអធិបតីក្នុងពិធីប្រគល់-ទទួលផ្ទាំងបដា សារសុវត្ថិភាពចរាចរណ៍ផ្លូវគោក ឧបត្ថម្ភដោយក្រុមហ៊ុន Manulife ដោយមានការចូលរួមពីអង្គការមូលនិធិបង្ការរបួសអាស៊ី មន្ទីរសាធារណការ និងដឹកជញ្ជូន២៥រាជធានី-ខេត្ត និងសមាជិក សមាជិកា នៃគ.ស.ច.គ.ជាច្រើនរូប ផងដែរ។ ពិធីនេះរៀបចំឡើងដើម្បីប្រគល់-ទទួលផ្ទាំងបដា សារសុវត្ថិភាពចរាចរណ៍ផ្លូវគោកចំនួន ៣៥០ផ្ទាំង ដែលទទួលបានការឧបត្ថម្ភពីក្រុមហ៊ុន Manulife ជូនដល់គ.ស.ច.គ. សម្រាប់ប្រើប្រាស់ក្នុងយុទ្ធនាការផ្សព្វផ្សាយអប់រំសាធារណៈ បញ្ជ្រាបការយល់ដឹងដល់ប្រជាពលរដ្ឋអំពីសុវត្ថិភាពចរាចរណ៍ សំដៅកាត់បន្ថយគ្រោះថ្នាក់ចរាចរណ៍។ លើកឡើងក្នុងកិច្ចប្រជុំនាឱកាសនោះ លោកជំទាវរដ្ឋលេខាធិការ បានថ្លែងអំណរគុណយ៉ាងជ្រាលជ្រៅ ដល់ក្រុមហ៊ុន Manulife ដែលបានប្រគល់ផ្ទាំងបដា សារផ្សព្វផ្សាយអំពីសុវត្ថិភាពចរាចរណ៍ជូនដល់ គ.ស.ច.គ. ព្រមទាំងបានថ្លែងកោតសរសើរដល់មន្ត្រីតាមមន្ទីររាជធានី-ខេត្ត និងអាជ្ញាធរមានសមត្ថកិច្ច ដែលបានសហការដោយយកចិត្តទុកដាក់ក្នុងការចុះផ្សព្វផ្សាយចំណេះដឹង និងអប់រំសាធារណជនគ្រប់ រាជធានី-ខេត្ត ឱ្យយល់ដឹងបន្ថែមទៀតអំពីសុវត្ថិភាពចរាចរណ៍ ដើម្បីចូលរួមចំណែកក្នុងការកែប្រែផ្នត់គំនិតនៃការបើកបរឱ្យកាន់តែមានសណ្ដាប់ធ្នាប់ល្អ កាត់បន្ថយគ្រោះថ្នាក់ចរាចរណ៍ ដែលអាចជួយរក្សាបានទាំងសេដ្ឋកិច្ចគ្រួសារ និងសង្គមជាតិ៕