[VAYO FM] - អ្នកសេដ្ឋកិច្ច៖ក្រៅពីព្រះសីហនុនិងបន្ទាយមានជ័យ រដ្ឋាភិបាលគួរស្ថាបនាផ្លូវដែកទៅខេត្តភាគឦសាន
2023-01-16
Go to the website published VAYO FM
លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានលើកឡើងថា បើសិនជាមានលទ្ធភាព រដ្ឋាភិបាលគួរតែអភិវឌ្ឍន៍ឱ្យមានផ្លូវរថភ្លើងល្បឿនលឿន ឬល្បឿនមធ្យមទៅកាន់ខេត្តភាគឦសាន ដូចជា ខេត្តស្ទឹងត្រែង មណ្ឌលគិរី និងខេត្តរតនគិរី ដោយសារនាពេលខាងមុខខេត្តទាំងបីនេះក៏នឹងក្លាយជាច្រកលំហូរទំនិញ និងទេសចរណ៍ដ៏សំខាន់ផងដែរ។
ជាមួយគ្នា លោកបណ្ឌិតថា ការសាងសង់ ឬស្ថាបនាផ្លូវរថភ្លើងល្បឿនលឿននឹងផ្ដល់ជាសារៈប្រយោជន៍ច្រើនដល់វិស័យគមនាគមន៍របស់កម្ពុជា ទាំងការធ្វើដំណើរ និងការដឹកជញ្ជូនផលិតផល ព្រមទាំងទំនិញផ្សេងៗ។ ផ្ដល់សារៈប្រយោជន៍ច្រើនដោយហេតុថា ផ្លូវរថភ្លើងល្បឿនលឿនអាចផ្ទុកបរិមាណដឹកជញ្ជូនបានច្រើន និងមិនសូវមានប៉ះពាល់ច្រើនដូចទៅនឹងការដឹកជញ្ជូនតាមផ្លូវទឹក ឬផ្លូវថ្នល់ ក៏ដូចជាផ្លូវជាតិឡើយ។
លោកបណ្ឌិតហុង វណ្ណៈគូសបញ្ជាក់ថា ការដឹកជញ្ជូនតាមផ្លូវដែក ឬផ្លូវរថភ្លើងល្បឿនលឿនចំណេញទាំងពេលវេលា និងការចំណាយ ព្រោះចំណាយពេលវេលាតិចក្នុងការដឹកជញ្ជូន ហើយជាពិសេសថែមទាំងជួយកាត់បន្ថយគ្រោះថ្នាក់ចរាចរណ៍ថែមទៀតផង។
លើសពីនេះ លោកបណ្ឌិតយល់ថា ការស្ថាបនាផ្លូវរថភ្លើងល្បឿនលឿនក៏ដូចជាកាត់បន្ថយផលប៉ះពាល់ដល់បរិស្ថាន តាមរយៈការកាត់បន្ថយការដឹកជញ្ជូនតាមរថយន្ត ដែលអាចជួយដល់ការកាត់បន្ថយការពុលបរិយាកាស និងឧស្ម័នផ្ទះកញ្ចក់ជាដើម។
ដោយឡែកនៅពេលសួរថា តើការស្ថាបនាផ្លូវរថភ្លើងល្បឿនលឿននឹងអាចផ្ដល់ផលប៉ះពាល់ដល់ការដឹកជញ្ជូនតាមផ្លូវថ្នល់ ឬផ្លូវជាតិដែរឬទេ? អ្នកជំនាញសេដ្ឋកិច្ចដដែលឆ្លើយថា ពិតជាមានផលប៉ះពាល់ ប៉ុន្តែរដ្ឋាភិបាលប្រាកដជាបានថ្លឹងថ្លែងរួចរាល់ហើយសម្រាប់ការស្ថាបនាផ្លូវដែលបម្រើដល់ការដឹកជញ្ជូនយុទ្ធសាស្ត្រនេះ ព្រោះផ្ដល់ផលចំណេញច្រើនជាជាងផលប៉ះពាល់។
គួរឱ្យដឹងថា លោកនាយករដ្ឋមន្ត្រីហ៊ុន សែន ក្នុងកិច្ចប្រជុំគណៈរដ្ឋមន្ត្រី កាលពីថ្ងៃទី១៣ ខែមករា ឆ្នាំ២០២៣ បានជំរុញឱ្យក្រសួងសេដ្ឋកិច្ចនិងហិរញ្ញវត្ថុ និងក្រសួងសាធារណការនិងដឹកជញ្ជូនពន្លឿនការសិក្សាគម្រោងសាងសង់ផ្លូវរថភ្លើងពីរាជធានីភ្នំពេញទៅខេត្តព្រះសីហនុ និងពីរាជធានីភ្នំពេញទៅក្រុងប៉ោយប៉ែត ខេត្តបន្ទាយមានជ័យ។ គម្រោងស្ថាបនាផ្លូវរថភ្លើងល្បឿនលឿនរបស់រាជរដ្ឋាភិបាលនេះ ក្នុងគោលបំណងធំសម្រាប់បម្រើឱ្យវិស័យដឹកជញ្ជូនឱ្យកាន់តែសម្បូរបែប និងដើម្បីជំរុញកំណើនសេដ្ឋកិច្ច-សង្គមកម្ពុជាឱ្យកាន់តែរីកចម្រើន ក៏ដូចជាបង្កើនប្រាក់ចំណូល និងលើកកម្ពស់ជីវភាពរបស់ប្រជាជន។ យ៉ាងណាមិញ បច្ចុប្បន្នកម្ពុជាមានផ្លូវដែកសំខាន់ៗចំនួន២ខ្សែ រួមមាន៖ ទី១.ផ្លូវដែកពីរាជធានីភ្នំពេញទៅខេត្តព្រះសីហនុ និងទី២.ផ្លូវដែកពីរាជធានីភ្នំពេញទៅកាន់ខេត្តបន្ទាយមានជ័យ៕
