វិទ្យាស្ថានតេជោសែន សាធារណការ និងដឹកជញ្ជូន រៀបចំការប្រឡងបញ្ចប់ឆមាសទី២ ឆ្នាំទី២ របស់និស្សិតជំនាន់ទី១ ដើម្បីពង្រឹងសមត្ថភាពនិស្សិតក្នុងវិស័យសាធារណការ និងដឹកជញ្ជូន ទីស្ដីការក្រសួង៖ ថ្ងៃចន្ទ ៤កើត ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៦ ខែធ្នូ ឆ្នាំ២០២២ ឯកឧត្តម ហឿន សំនៀង បានអញ្ជើញជាអធិបតីក្នុងកម្មវិធីបើកវិញ្ញាសាប្រឡងបញ្ចប់ឆមាសទី២ ឆ្នាំទី២ របស់និស្សិតជំនាន់ទី១ នៃវិទ្យាស្ថានតេជោសែន សាធារណការ និងដឹកជញ្ជូន ដែលប្រព្រឹត្តទៅរយៈពេលបីថ្ងៃ ដោយមានការចូលរួមពីថ្នាក់ដឹកនាំនាយកដ្ឋាន និងក្រុមការងារវិទ្យាស្ថានផងដែរ។ ថ្លែងក្នុងមតិសា្វគមន៍ ឯកឧត្តមនាយក បានសម្តែងសេចក្តីសោមនស្សរីករាយ ដែលបានចូលរួមបើកវិញ្ញាសាប្រឡងបញ្ចប់ឆមាសទី២ ឆ្នាំទី២ ជូននិស្សិតជំនាន់ទី១ របស់វិទ្យាស្ថានតេជោសែន សាធារណការ និងដឹកជញ្ជូន ព្រមទាំងបានថ្លែងអំណរគុណដល់ថ្នាក់ដឹកនាំ និងក្រុមការងារវិទ្យាស្ថានទាំងអស់ដែលបានខិតខំប្រឹងប្រែងរៀបចំការប្រឡងនេះឡើង។ ឆ្លៀតក្នុងឱកាសនោះ ឯកឧត្តមនាយក បានជំរុញលើកទឹកចិត្តឱ្យក្មួយៗនិស្សិតទាំងអស់ខិតខំប្រឹងប្រែងប្រឡងឱ្យបានជាប់ទាំងអស់គ្នា ដោយគោរពតាមបទបញ្ជា និងការណែនាំរបស់អនុរក្សដែលឈរពិនិត្យតាមដានការប្រឡងនៅក្នុងថ្នាក់ប្រឡងរយៈពេលបីថ្ងៃនេះ។ ការប្រឡងនេះត្រូវបានរៀបចំឡើងប្រកបដោយសុក្រឹតភាព និងភាពត្រឹមត្រូវ ដើម្បីពង្រឹងសមត្ថភាព ក៏ដូចជាលើកកម្ពស់គុណភាពនិស្សិតឱ្យកាន់តែមានភាពល្អប្រសើរ ដែលជាការសម្រួចជំនាញបច្ចេកទេសរបស់និស្សិតនាថ្ងៃអនាគត ឱ្យឆ្លើយតបទៅនឹងការអភិវឌ្ឍរបស់សង្គមជាតិ។ សូមជម្រាបជូនថា៖ ការប្រឡងបញ្ចប់ឆមាសទី២ ឆ្នាំទី២ ជំនាន់ទី១ របស់និស្សិតវិទ្យាស្ថានតេជោ សែន សាធារណការ និងដឹកជញ្ជូន នេះ នឹងប្រព្រឹត្តទៅរយៈពេលបីថ្ងៃពេញ ទាំងពេលព្រឹក និងពេលរសៀល ចាប់ពីថ្ងៃទី២៦ ដល់ថ្ងៃទី២៨ ខែធ្នូ ឆ្នាំ២០២២ នៅសាលប្រជុំទីស្តីការក្រសួង ដែលមាននិស្សិតជំនាន់ទី១ ចូលរួមប្រឡងលើជំនាញដូចជា៖ ១). ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែកនិងសំណង់កំពង់ផែ, ២). ជំនាញប្រព័ន្ធចម្រោះទឹកកខ្វក់, ៣). ជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក, ៤). ជំនាញភស្តុរភារកម្ម និងគ្រប់គ្រងខ្សែច្រវាក់ផ្គត់ផ្គង់, ៥). ជំនាញបើកបរនាវា និង ៦). ជំនាញម៉ាស៊ីននានា៕