យោងតាមប្រសាសន៍លើកឡើងរបស់ឯកឧត្ដម ស៊ុន ចាន់ថុល ទេសរដ្ឋមន្រ្ដីរដ្ឋមន្ដ្រីក្រសួងសាធារណការ និងដឹកជញ្ជូន ក្នុងសន្និសីទសារព័ត៌មានស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងសាធារណការ និងដឹកជញ្ជូន” បានឲ្យដឹងថា គម្រោងផ្លូវជាតិលេខ៣១ ផ្លូវជាតិលេខ៣៣ និងផ្លូវជាតិលេខ៤១ ត្រូវបានសិក្សារួចរាល់ហើយ ខណៈថវិកាសម្រាប់ការសាងសង់ក៏មានដែរ ដោយរង់ចាំតែថ្ងៃបើការដ្ឋានតែប៉ុណ្ណោះ។ថ្លែងនៅក្នុងកម្មវិធីខាងលើននោះ ឯកឧត្ដមទេសរដ្ឋមន្រ្ដីបានបញ្ជាក់យ៉ាងដូច្នេះថា “ផ្លូវ៣១ តភ្ជាប់ពីបែកគូស ទៅកំពង់ត្រាចមួយ ។ ផ្លូវ ៣៣ តភ្ជាប់ពីកែបមកកំពង់ត្រាច ពីកំពង់ត្រាចមកកំពត ផ្លូវជាតិលេខ ៤១ តពីលេខ ៤ មកលេខ ៣ ផ្លូវនេះបានចរចាចប់សព្វគ្រប់ នឹងបើកការដ្ឋាននៅពេលវេលាដែលសមស្របរបស់សម្ដេចអគ្គមហាសេនាបតីតេជោ ហ៊ុន សែន នឹងបើកការដ្ឋានឆ្នាំនេះ ឬឆ្នាំក្រោយ។ ប៉ុន្ដែថវិកាមានគ្រប់គ្រាន់ចាប់ផ្ដើមដំណើរការហើយ”។ សូមជម្រាប់ផងដែរថា ការកសាងផ្លូវទាំងបីខ្សែខាងលើនេះ គឺដើម្បីសម្រួលដល់ការធ្វើដំណើរ និងការដឹកជញ្ជូនកសិផល ក៏ដូចជាទាក់ទាញភ្ញៀវទេសចរណ៍ជាតិ និងអន្តរជាតិ ឱ្យមកទស្សនាខេត្តកែប និងកំពតឲ្យកាន់តែច្រើន។ ហើយការសាងសង់នេះ ក៏ជាសរសៃឈាមដ៏សំខាន់មួយ ជួយបង្កើនសកម្មភាពដល់កំពង់ផែក្នុងខេត្ដទាំងនេះឲ្យមានសកម្មភាពកាន់តែខ្លាំងផងដែរ៕