[Kampucheathmey] - ផែរណបតាមដងទន្លេពីរកន្លែងលេចរូបរាង ជំរុញវិស័យដឹកជញ្ជូនតាមផ្លូវទឹកនៅកម្ពុជា
2022-11-01
Go to the website published Kampucheathmey
ផែរណបតាមដងទន្លេចំនួនពីរ កំពុងលេចរូបរាងក្នុងផែនការពង្រីកសកម្មភាពដឹកជញ្ជូនតាមផ្លូវទឹកក្នុងប្រទេសកម្ពុជា។
លោក ស៊ុន ចាន់ថុល រដ្ឋមន្រ្តីក្រសួងសាធារណការនិងដឹកជញ្ជូនបានថ្លែងថា ការអភិវឌ្ឍផែរណបតាមដងទន្លេជាបន្តបន្ទាប់ ដើម្បពង្រីកសកម្មភាពដឹកជញ្ជូនតាមផ្លូវទឹក។
គម្រោងចំណតផែរណបតាមដងទន្លេ ចំនួន ៧ កន្លែងរួមមាន ចំណតផែរណបពហុបំណងកោះរកា (LM២៦) ចំណតផែរណបពហុបំណងព្រែកអញ្ចាញ (UM១) ចំណតផែរណបពហុបំណងទន្លេបិទ (UM២) ចំណតផែរណបពហុបំណងឆ្លូង (ក្រចេះ) ចំណតផែរណបពហុបំណងកំពង់ឆ្នាំង និងចំណតផែរណបពហុបំណងព្រែកក្តាមជាដើម។
ក្នុងនោះមានគម្រោង ៤ កន្លែងបានអនុម័ត ទីមួយគម្រោង ផែរណបគីឡូម៉ែត្រលេខ ៦ ទីពីរគម្រោងផែរណបនៅទន្លេបិទក្នុងខេត្តត្បូងឃ្មុំ ទីបីផែរណកោះរកាព្រំដែនវៀតណាម និងទីបួនផែរណបបព្រែកតាមាក់។ ចំណែកកំពង់ផែបីទៀតស្ថិតនៅក្នុងដំណាក់កាលកំពុងសិក្សានៅឡើយ។
ផែរណបនៅទន្លេបិទកំពុងសាងសង់សម្រេចបានជាង ៨៦ ភាគរយ និងផែរណបនៅគីឡូលេខ ៦ បានបញ្ចប់កំពុងដាក់ដំណើរការរួចហើយ។ នេះបើតាមឲ្យដឹងរបស់លោកស៊ុន ចាន់ថុល។
ថ្លែងក្នុងសន្និសីទកាលពីពេលថ្មីៗនេះ លោកស៊ុន ចាន់ថុល បានមើលឃើញការអភិវឌ្ឍកំពង់ផែរណបតាមផ្លូវទឹកឲ្យបានច្រើន នឹងរួមចំណែកកាត់បន្ថយការខូចខាតដល់ផ្លូវថ្នល់ ចំណេញពេលវេលា និងបន្ថយថ្លៃដើមលើការដឹកជញ្ជូន។កម្ពុជាកំពុងជំរុញឱ្យមានការដឹកជញ្ជូនតាមផ្លូវទឹកកាន់តែច្រើនតាមដែលអាចធ្វើបាន ខណៈដែលបណ្តាប្រទេសនៅជិតខាងកម្ពុជា ក៏បានប្រើប្រាស់ការដឹកជញ្ជូនទំនិញតាមផ្លូវទឹក ក្នុងការជំរុញការអភិវឌ្ឍសេដ្ឋកិច្ចរបស់ប្រទេសគេ។
រដ្ឋាភិបាលកម្ពុជាតាមរយៈក្រសួងសាធារណការនិងដឹកជញ្ជូន បានលើកឡើងពីផែនការស្ដារផ្លូវទឹកនៅតាមទន្លេបាសាក់ពីព្រែកអំបិលទៅខេត្តតាកែវ កំពត កែប មានចម្ងាយ១៦៨គីឡូម៉ែត្រ។ តាមការសិក្សាជំហានដំបូង ក្នុងប្រវែង ១៦៨ គីឡូម៉ែត្រនេះ មានប្រហែល ១១៥ គីឡូម៉ែត្រ ជាផ្លូវទឹកដែលអាចធ្វើដំណើរបានទាំងខែប្រាំង និងវស្សា៕
