កិច្ចប្រជុំទ្វេភាគីលើកទី៥ រវាងក្រសួងសាធារណការ និងដឹកជញ្ជូន នៃព្រះរាជាណាចក្រកម្ពុជា និងក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ (MLIT) ជប៉ុន ស្តីពីកិច្ចសហប្រតិបត្តិការបច្ចេកទេសក្នុងវិស័យប្រព័ន្ធលូទឹកកខ្វក់ ដឹកនាំដោយឯកឧត្តម តូច ចាន់កុសល រដ្ឋលេខាធិការប្រចាំការ ភ្នំពេញ៖ ថ្ងៃអង្គារ ១កើត ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៥ ខែតុលា ឆ្នាំ២០២២ ឯកឧត្តម តូច ចាន់កុសល រដ្ឋលេខាធិការប្រចាំការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តមទេសរដ្ឋមន្រ្តី ស៊ុន ចាន់ថុល បានអញ្ជើញដឹកនាំគណៈប្រតិភូក្រសួងចូលរួមកិច្ចប្រជុំទ្វេភាគីលើកទី៥ស្តីពី៖“កិច្ចសហប្រតិបត្តិការបច្ចេកទេសក្នុងវិស័យប្រព័ន្ធលូទឹកកខ្វក់” ជាមួយក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍(MLIT) ជប៉ុន ក្រោមប្រធានបទ៖ “ការអភិវឌ្ឍធនធានមនុស្ស និងពង្រឹងស្ថាប័នលើវិស័យប្រព័ន្ធទឹកកខ្វក់” ដោយមានការចូលរួមមតិយោបល់ពីវាគ្មិនសំខាន់ៗនៃក្រសួងស្ថាប័នទាំងពីរ លើតួនាទីរបស់រដ្ឋបាលថ្នាក់ជាតិ ការគ្រប់គ្រងការងារប្រព័ន្ធទឹកកខ្វក់នៅប្រទេសជប៉ុន ឧបករណ៍ជំនួយ និង/ឬ ប្រព័ន្ធគ្រប់គ្រងដើម្បីពង្រឹងសមត្ថភាព និងស្ថាប័នពាក់ព័ន្ធនឹងវិស័យទឹកកខ្វក់ តាមរយៈគម្រោងសហប្រតិបត្តិការចៃកាកម្ពុជា (Technical Cooperation Project, JICA Cambodia) ស្ថានភាពទូទៅនៃការគ្រប់គ្រងទឹកកខ្វក់នៅកម្ពុជា និងសំណើផែនការសកម្មភាពជំហានបន្ទាប់ៗដើម្បីជាមូលដ្ឋានក្នុងការជជែកពិភាក្សាគ្នា។ ឯកឧត្តមរដ្ឋលេខាធិការប្រចាំ បានរំលឹកសាវតា និងលទ្ឋផលនៃកិច្ចប្រជុំទ្វេភាគីទាំង៤លើកកន្លងមក ព្រមទាំងសកម្មភាពគម្រោងមួយចំនួនទាក់ទងនឹងវិស័យនេះ ក្រោយពីមានកិច្ចសហប្រត្តិបត្តិការបច្ចេកទេសរវាងប្រទេសទាំងពីរលើវិស័យប្រព័ន្ធលូ និងប្រព័ន្ធប្រព្រឹត្តកម្មទឹកកខ្វក់ រហូតកម្ពុជាក្លាយពីសមាជិកនៃប្រទេសក្នុងភាពជាដៃគូក្នុងតំបន់លើការគ្រប់គ្រងទឹកកខ្វក់ (Asian Wastewater Management Partnership, AWaP)។ ក្រោយពីបានពិភាក្សាយ៉ាងផុសផុល និងចូលរួមមតិយោបល់លើបញ្ហាប្រឈមទាក់ទងនឹង“ការអភិវឌ្ឍធនធានមនុស្ស និងពង្រឹងស្ថាប័នលើវិស័យប្រព័ន្ធទឹកកខ្វក់” ឯកឧត្តមរដ្ឋលេខាធិការ បានសំណូមពរដល់រដ្ឋាភិបាលជប៉ុន និងប្រជាជនជប៉ុនតាមរយៈក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ (MLIT) ជប៉ុន និងទីភ្នាក់ងារចៃការប្រចាំកម្ពុជា បន្តជួយគាំទ្រ ពន្លឿន និងផ្តល់អាទិភាពខ្ពស់ដល់គម្រោងសហប្រតិបត្តិការបច្ចេកទេស និងការបណ្តុះបណ្តាលលើវិស័យប្រព័ន្ធទឹកកខ្វក់ និងសំណូមពរផងដែរដល់មន្ត្រីបច្ចេកទេស និងថ្នាក់ដឹកនាំមន្ទីរសាធារណការ និងដឹកជញ្ចូនរាជធានី-ខេត្តទាំងអស់ យកចិត្តទុកដាក់បន្ថែម ពង្រឹងពង្រីកសមត្ថភាពខ្លួន និងស្ថាប័ន ជាពិសេសប្រើប្រាស់ធនធាន និង ការគ្រប់គ្រងដឹកនាំក្នុងភាពឆ្លាតវៃ៕