គណៈប្រតិភូក្រសួងសាធារណការ និងដឹកជញ្ជូន ចូលរួមកិច្ចប្រជុំប្រចាំត្រីមាសទី៤ ឆ្នាំ២០២២ នៃវេទិកាដឹកជញ្ជូនអន្តរជាតិ (4th Quaternal Meeting 2022 of International Transport Forum) តាមប្រព័ន្ធវីដេអូពីចម្ងាយ ទីស្ដីការក្រសួង៖ ថ្ងៃចន្ទ ១៤រោច ខែអស្សុជ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី២៤ ខែតុលា ឆ្នាំ២០២២ ឯកឧត្តម ឡេង ធនយុទ្ធា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួងចូលរួមកិច្ចប្រជុំប្រចាំត្រីមាសទី៤ ឆ្នាំ២០២២ នៃវេទិកាដឹកជញ្ជូនអន្តរជាតិ (4th Quaternal Meeting 2022 of International Transport Forum) តាមប្រព័ន្ធវីដេអូពីចម្ងាយ ដោយមានការចូលរួមពីរដ្ឋជាសមាជិកប្រមាណ៦៤ប្រទេស។ កិច្ចប្រជុំនេះនឹងប្រព្រឹត្តទៅរយៈពេលបួនថ្ងៃចាប់ពីថ្ងៃទី២៤ ដល់ថ្ងៃទី២៧ ខែតុលា ឆ្នាំ២០២២ ដើម្បីពិនិត្យមើលឡើងវិញនូវវឌ្ឍនភាព និងលទ្ធផលនៃការសិក្សាស្រាវជ្រាវថ្មីៗ ជជែកតុមូលលើប្រធានបទសំខាន់ៗចំពោះមុខ ការរៀបចំគោលនយោបាយដឹកជញ្ជូន។ល។ សំដៅជំរុញវិស័យដឹកជញ្ជូនឱ្យកាន់តែប្រសើរឡើងក្នុងនោះរួមមាន៖ ១) កិច្ចប្រជុំគណៈកម្មការស្រាវជ្រាវដឹកជញ្ជូនលើកទី១២ (12th TRC) ២) កិច្ចប្រជុំក្រុមប្រឹក្សាគ្រប់គ្រងការដឹកជញ្ជូនលើកទី៣៦ (36th TMB) ៣) កិច្ចប្រជុំរួមគ្នានៃគណៈកម្មការស្រាវជ្រាវដឹកជញ្ជូន(TRC) ក្រុមប្រឹក្សាគ្រប់គ្រងការដឹកជញ្ជូន(TMB) និងក្រុមប្រឹក្សានៃការចូលរួមភាពជាដៃគូ(CPB) ៤) កិច្ចប្រជុំរួមគ្នានៃក្រុមការងារឆ្នាំ២០២៣/ក្រុមការងារឆ្នាំ២០២៤ (TF2023/TF2024) និង ៥) សិក្ខាសាលាវាយតម្លៃកិច្ចប្រជុំកំពូលប្រចាំឆ្នាំ២០២២ (ITF Summit 2022)ផងដែរ៕