ឯកឧត្តមស៊ុន ចាន់ថុល ចែករំលែកបទពិសោធន៍ដល់ប្រតិភូអ្នកដឹកនាំវ័យក្មេងអាស៊ាន ក្រោមកម្មវិធី ASEAN Young Leaders Programme ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានទទួលជួបសំណេះសំណាល និងចែករំលែកបទពិសោធន៍ដល់ប្រតិភូអ្នកដឹកនាំវ័យក្មេងអាស៊ាន ប្រមាណ២០រូប ដឹកនាំដោយលោកស្រី Swati Mathur នាយិកាប្រតិបត្តិនៃអង្គការ Common Purpose Asia-Pacific Limited ក្រោមកម្មវិធី ASEAN Young Leaders Programme ឆ្នាំ២០២២។ កម្មវិធីនេះរៀបចំឡើងក្នុងគោលបំណងដើម្បីចែករំលែកចំណេះដឹង បទពិសោធន៍ និងការអនុវត្តល្អៗ ពីសំណាក់ឯកឧត្តមទេសរដ្ឋមន្ត្រី ទាក់ទងនឹងភាពជាអ្នកដឹកនាំក្នុងវិស័យឯកជន និងរដ្ឋ ក៏ដូចជាដើម្បីឱ្យ យុវជនវ័យក្មេងអាស៊ានបានឈ្វេងយល់កាន់តែច្បាស់អំពីការរីកចម្រើនលើវិស័យសាធារណការ និងដឹកជញ្ជូន របស់កម្ពុជាផងដែរ។ ថ្លែងនៅក្នុងកម្មវិធីនេះ ឯកឧត្តមទេសរដ្ឋមន្ត្រី បានជម្រាបជូនយុវជនវ័យក្មេងអាស៊ានអំពីការរីកចម្រើន របស់ប្រទេសជាតិ និងវិស័យហេដ្ឋារចនាសម្ព័ន្ធរបស់កម្ពុជា ជាពិសេសទិសដៅការងារអាទិភាពសំខាន់ៗក្នុងការអភិវឌ្ឍន៍វិស័យសាធារណការ និងដឹកជញ្ជូន នៅកម្ពុជា និងបានឆ្លើយឆ្លងជាមួយយុវជនវ័យក្មេង អាស៊ានទៅវិញទៅមក អំពីទិដ្ឋភាពទូទៅពាក់ព័ន្ធជាមួយនឹងផែនការអភិវឌ្ឍន៍វិស័យហេដ្ឋារចនាសម្ព័ន្ធ ផងដែរ។ បន្ថែមពីលើនេះ ឯកឧត្តមទេសរដ្ឋមន្ត្រី បានផ្តល់អនុសាសន៍ណែនាំដល់យុវជនវ័យក្មេងអាស៊ានទាក់ទងនឹងការដឹកនាំស្ថាប័ន ការដឹកនាំអង្គភាព បទពិសោធន៍ ការអនុវត្តល្អៗ គុណតម្លៃផ្សេងៗ និងគោលការណ៍សំខាន់ៗមួយចំនួនជាចក្ខុវិស័យសម្រាប់ការតម្រង់ទិសក្នុងភាពជាអ្នកដឹកនាំ រួមជាមួយនឹងទ្រឹស្តី “E” ចំនួន៥គឺ Energy Energize Edge Execute Enthusiasm និងពាក្យស្លោកមួយឃ្លា ថា៖ "សូមកុំសួរថាកម្ពុជា ធ្វើអ្វីឱ្យយើង ត្រូវសួរថាយើងធ្វើអ្វីឱ្យកម្ពុជា" ដើម្បីអភិវឌ្ឍន៍ខ្លួនឆ្ពោះទៅរកភាពជោគជ័យក្នុងពេលអនាគតក្នុងនាមជាអ្នកដឹកនាំជំនាន់ថ្មី៕