សិក្ខាសាលាស្តីពី ការរៀបចំគម្រោងផែនការសាងសង់ហេដ្ឋារចនាសម្ព័ន្ធ និងសំណង់អាគារនៅច្រកទ្វារព្រំដែនអន្តរជាតិត្រពាំងស្រែ ព្រំដែនកម្ពុជា-វៀតណាម ក្រោមអធិបតីភាពឯកឧត្តម ឈៀង ពេជ្រ អគ្គនាយកនៃអគ្គនាយកដ្ឋានភ័ស្តុភាកម្ម ទីស្ដីការក្រសួង៖ ថ្ងៃពុធ ២រោច ខែអស្សុជ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី១២ ខែតុលា ឆ្នាំ២០២២ ឯកឧត្តម ឈៀង ពេជ្រ អគ្គនាយកនៃអគ្គនាយកដ្ឋានភ័ស្តុភាកម្ម ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាស្តីពីការរៀបចំគម្រោងផែនការសាងសង់ហេដ្ឋារចនាសម្ព័ន្ធ និងសំណង់អាគារនៅច្រកទ្វារព្រំដែនអន្តរជាតិត្រពាំងស្រែ ព្រំដែនកម្ពុជា-វៀតណាម ដោយមានការចូលរួមពីលោក Yoo Han-Jun ទីប្រឹក្សាជាន់ខ្ពស់តំណាងក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន នៃសាធារណរដ្ឋកូរ៉េ និងមន្ត្រីជំនាញពាក់ព័ន្ធក្នុងគម្រោងប្រមាណ៥០រូប។ សិក្ខាសាលានេះរៀបចំឡើងក្នុងគោលបំណងបង្ហាញពីការរៀបចំគម្រោងផែនការសាងសង់ហេដ្ឋារចនាសម្ព័ន្ធ និងសំណង់អាគារនៅច្រកទ្វារព្រំដែនអន្តរជាតិត្រពាំងស្រែ (Establishment of Comprehensive Plan of Cross-Border Checkpoint Facility at International Border Trapeang Srae, Cambodia) ឋិតក្នុងភូមិសាស្ត្រ ខេត្តក្រចេះ ព្រំដែនកម្ពុជា-វៀតណាម ក្នុងក្របខណ្ឌជំនួយអភិវឌ្ឍន៍ផ្លូវការរបស់សាធារណរដ្ឋកូរ៉េ (ODA) ដែលត្រូវចំណាយពេលវេលាសម្រាប់សិក្សាលទ្ធភាព ប្រមាណ២៤ខែ ចាប់ពីខែសីហា ឆ្នាំ២០២២ ដល់ខែមិថុនា ឆ្នាំ២០២៤។ គម្រោងនេះផ្តោតលើការស្ថាបនាហេដ្ឋារចនាសម្ព័ន្ធ សំណង់បរិក្ខារ បម្រើឱ្យច្រកទ្វារព្រំដែនអន្តរជាតិត្រពាំងស្រែ ដែលក្នុងនោះរួមមាន៖ ការិយាល័យអន្តោប្រវេសន៍ ការិយាល័យគ្រប់គ្រងច្រក អគារសម្រាប់ភ្ញៀវទេសចរណ៍ កន្លែងផលិតថាមពល អន្តេវាសិកដ្ឋាន និងទីធ្លាសម្រាប់កុងតឺន័រជាដើម។ ឆ្លៀតក្នុងឱកាសនោះដែរ ឯកឧត្តមអគ្គនាយក បានថ្លែងអំណរគុណយ៉ាងជ្រាលជ្រៅ និងកោតសរសើរ ចំពោះរដ្ឋាភិបាលនៃសាធារណរដ្ឋកូរ៉េ តាមរយៈក្រសួងដែនដី ហេដ្ឋារចនាសម្ព័ន្ធ និង ដឹកជញ្ជូននៃសាធារណរដ្ឋកូរ៉េ ដែលបានប្តេជ្ញាចិត្តគាំទ្រក្នុងការអនុវត្តគម្រោងនេះ ដើម្បីរួមចំណែកលើ ការអភិវឌ្ឍន៍សង្គមកម្ពុជាឱ្យកាន់តែមានការរីកចម្រើនថែមទៀត។ សូមជម្រាបជូនថា៖ ភាគីកម្ពុជា និងកូរ៉េ បានបង្ហាញជំនឿយ៉ាងមុតមាំថា៖ គម្រោងនេះនឹងរួមចំណែកបង្កើនទំហំពាណិជ្ជកម្មតាមព្រំដែនកម្ពុជា-វៀតណាម ជាពិសេសច្រកទ្វារអន្តរជាតិត្រពាំងស្រែ ធ្វើឱ្យប្រសើរឡើងដល់ការប្រកួតប្រជែងតម្លៃនៃការដឹកជញ្ជូន ជំរុញការធ្វើទំនើបកម្មផ្នែកភ័ស្តុភាកម្មឱ្យសម្រេចបាននូវគោលដៅអភិវឌ្ឍន៍សេដ្ឋកិច្ចកម្ពុជា និងប្រែក្លាយជាមជ្ឈមណ្ឌលដឹកជញ្ជូនក្នុងតំបន់ផងដែរ៕