កិច្ចប្រជុំបូកសរុបបេសកកម្មគាំទ្រការអនុវត្តគម្រោងលើកទី៧ នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ថ្ងៃសុក្រ ១២កើត ខែអស្សុជ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៧ ខែតុលា ឆ្នាំ២០២២ នៅទីស្តីការក្រសួង ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំបូកសរុបបេសកកម្មគាំទ្រការអនុវត្តគម្រោងលើកទី៧ នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ។ កិច្ចប្រជុំនេះមានការអញ្ជើញចូលរួមដោយផ្ទាល់ពីឯកឧត្តម តាន់ សុខជា អគ្គនាយកនៃអគ្គនាយកដ្ឋានផ្គត់ផ្គង់ទឹកស្អាត នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោក កូវ ភីរម្យ ប្រធានក្រុមការងារគម្រោង និងលោកស្រី Marie Krumova Chapuis សហប្រធានក្រុមការងារធនាគារពិភពលោក និងតាមប្រព័ន្ធវីដេអូពីចម្ងាយពីក្រុមការងារនៃអង្គភាពគ្រប់គ្រងសមាសភាគគម្រោង-១ (CMU-1) អង្គភាពគ្រប់គ្រងសមាសភាគគម្រោង-២ (CMU-2) តំណាងមកពីក្រសួងសេដ្ឋកិច្ច និងហិរញ្ញវត្ថុ ក្រុមការងារធនាគារពិភពលោក និងភាគីពាក់ព័ន្ធផងដែរ។ អង្គប្រជុំបានជជែកពិភាក្សាអំពីលទ្ធផលនៃសមិទ្ធផលដែលសម្រេចបាន បញ្ហាបច្ចេកទេសនានាជាមួយអ្នកអនុវត្តគម្រោង ស្ថានភាពនៃការគ្រប់គ្រងហិរញ្ញវត្ថុ ការងារលទ្ធកម្ម និងការវាយតម្លៃវឌ្ឍនភាពការងារ ចំណុចចន្លោះប្រហោងកន្លងមក បញ្ហាប្រឈមនានា ការទទួលខុសត្រូវលើបេសកកម្មរបស់ក្រុមការងារពាក់ព័ន្ធ និងការពិនិត្យអនុវត្តតាមផែនការសកម្មភាព សម្រាប់ធ្វើការពន្លឿនលើការអនុវត្តគម្រោងឱ្យមានប្រសិទ្ធភាព ប្រកបដោយចីរភាព។ ថ្លែងទៅកាន់អង្គប្រជុំនាឱកាសនោះ ឯកឧត្តមអនុរដ្ឋលេខធិការ ក្នុងនាមគណៈគ្រប់គ្រង CMU-2 បានថ្លែងអំណរគុណយ៉ាងជ្រាលជ្រៅចំពោះសហសេវិកអញ្ជើញមកពីធនាគារពិភពលោក ដែលតែងតែចូលរួមជួយជ្រោមជ្រែងក្រសួងសាធារណការ និងដឹកជញ្ជូនលើវិស័យគ្រប់គ្រងប្រព័ន្ធចម្រោះទឹកកខ្វក់ ក៏ដូចជាវិស័យផ្សេងៗទៀត។ ឯកឧត្តមអនុរដ្ឋលេខធិការ ក៏បានថ្លែងអរគុណផងដែរដល់ក្រុមការងារគ្រប់ផ្នែកពាក់ព័ន្ធ ដែលបានខិតខំប្រឹងប្រែង និងប្តេជ្ញាចិត្តខ្លាំងក្លាក្នុងការបំពេញការងាររបស់ខ្លួន ធ្វើឱ្យលេចសមិទ្ធផលជាផ្លែផ្កាល្អប្រសើរ ក៏ដូចជាដែលបានបំពេញការងាររបស់ខ្លួនយ៉ាងសកម្មធ្វើឱ្យដំណើការគម្រោងឆ្ពោះទៅមុខ សម្រេចលទ្ធផលទៅតាមផែនការដែលបានគ្រោងទុក។ ជាទីបញ្ចប់ ឯកឧត្តមអនុរដ្ឋលេខធិការ បានជំរុញលើកទឹកចិត្តឱ្យគ្រប់អង្គភាពពាក់ព័ន្ធបន្តរួបរួមគ្នាបំពេញកាតព្វកិច្ចការងារប្រកបដោយទំនួលខុសត្រូវ ច្បាស់លាស់ និងធ្វើយ៉ាងណាឱ្យលេចនូវផ្លែផ្កាតាមគោលដៅដូចបានព្រមព្រៀងក្នុងផែនការរំពឹងទុក ធានាឱ្យបាននូវប្រសិទ្ធភាព ប្រកបដោយចីរភាព៕