ផ្លូវល្បឿនលឿនភ្នំពេញ-ព្រះសីហនុ ដែលមានតម្លៃ ២ពាន់លានដុល្លារ នឹងដាក់ឱ្យប្រើប្រាស់សាកល្បងពេញមួយខែតុលា។ សេចក្តីប្រកាសព័ត៌មានរបស់ក្រសួងបានឱ្យដឹងថា ដើម្បីផ្សព្វផ្សាយ និងលើកកម្ពស់ការយល់ដឹងដល់សាធារណជនអំពីការប្រើប្រាស់ផ្លូវល្បឿនលឿននេះ ជាលើកដំបូងក្នុងប្រទេសកម្ពុជា ក្រសួងសាធារណការ និងដឹកជញ្ជូន និងក្រុមហ៊ុនវិនិយោគ បានសម្រេចអនុញ្ញាតឱ្យសាធារណជនប្រើប្រាស់ផ្លូវល្បឿនលឿននេះ ដោយមិនគិតថ្លៃរយៈពេល១ខែ ចាប់ពីថ្ងៃទី១ ដល់ថ្ងៃទី៣១ ខែតុលា ឆ្នាំ២០២២។ យានជំនិះទាំងអស់ត្រូវបានអនុញ្ញាតឱ្យបើកល្បឿនអតិបរមាលើសពី៧០ គីឡូម៉ែត្រក្នុងមួយម៉ោង និងម៉ូតូទាំងអស់ដែលមានចាប់ពី 500cc ឡើងទៅ ត្រូវបានអនុញ្ញាតឲ្យធ្វើដំណើរនៅលើផ្លូវនេះ។ ការសាងសង់ផ្លូវល្បឿនលឿនភ្នំពេញ-ព្រះសីហនុ ប្រវែង ១៨៧ គីឡូម៉ែត្រ និងទទឹង ២៤.៥ ម៉ែត្រ ដែលវិនិយោគដោយសាជីវកម្មផ្លូវ និងស្ពានចិន (CRBC) បានចាប់ផ្តើមនៅខែមីនា ឆ្នាំ ២០១៩។ ផ្លូវ​បង់​ប្រាក់​នេះ​ត​ភ្ជាប់​ពី​រាជធានី​ភ្នំពេញ​ទៅ​កំពង់ផែ​ទឹក​ជ្រៅ​ក្រុង​ព្រះសីហនុ​នៃ​ខេត្ត​ព្រះសីហនុ​កាត់​ខេត្តកណ្តាល​កំពង់ស្ពឺ​និង​ខេត្ត​កោះកុង។ជាមួយនឹងផ្លូវពីរគន្លងសម្រាប់ចរាចរណ៍ក្នុងទិសដៅនីមួយៗ បូកនឹងគន្លងសង្គ្រោះបន្ទាន់នៅសងខាង និងក្រាលបេតុងកៅស៊ូ ផ្លូវល្បឿនលឿនភ្នំពេញ-ព្រះសីហនុ នឹងអាចឱ្យយានជំនិះទៅដល់គោលដៅបានប្រហែល ២ ម៉ោង ជំនួសឱ្យរយៈពេល ៤ ឬ ៥ ម៉ោង នៅលើចម្ងាយផ្លូវជាតិលេខ៤ នេះបើយោងតាមក្រសួងសាធារណការ និងដឹកជញ្ជូន៕