នៅថ្ងៃទី២៦ ខែកញ្ញា ឆ្នាំ២០២២នេះ ក្រសួងសាធារណការ និងដឹកជញ្ជូន មន្ទីរសាធារណការ និងដឹកជញ្ជូន បានចេញសេចក្តីជូនដំណឹងស្តីពីការបិទចរាចរណ៍រថយន្តដឹកទំនិញធុនធ្ងន់គ្រប់ប្រភេទ លើកំណាត់ផ្លូវក្នុងភូមិសាស្រ្តខេត្តកំពង់ធំ ជាបណ្តោះអាសន្ន។យោងតាមសេចក្ដីជូនដំណឹងខាងលើ ការផ្អាកចរាចរណ៍បណ្ដោះអាសន្ននេះ ដោយសារស្ថានភាពជំនន់ទឹកភ្លៀងបាន និងកំពុងជន់ឡើងយ៉ាងខ្លាំង ជាហេតុបណ្ដាលឱ្យលិចលង់នៅតាមកំណាត់ផ្លូវមួយចំនួន ក្នុងភូមិសាស្រ្តខេត្តកំពង់ធំ ដែលស្ថានភាពបែបនេះធ្វើឱ្យផ្លូវ ស្ពាន មិនអាចទ្រទ្រង់ទម្ងន់របស់រថយន្តធុនធ្ងន់បានទេ។ ដើម្បីបង្ការគ្រោះថ្នាក់ជាយថាហេតុ និងទប់ស្កាត់ការខូចខាតរចនាសម្ព័ន្ធផ្លូវ ថ្នល់ ស្ពាន មន្ទីរសាធារណ និងដឹកជញ្ជូនខេត្តកំពង់ធំ សូមធ្វើការបិទចរាចរណ៍រថយន្តដឹកទំនិញធុនធ្ងន់គ្រប់ប្រភេទជាបណ្តោះអាសន្នលើកំណាត់ផ្លូវដូចខាងក្រោមនេះ៖ ផ្លូវជាតិលេខ ៦ ចាប់ពីគីឡូម៉ែត្រលេខ ២២០ ដល់គីឡូម៉ែត្រលេខ២២៤ ស្ថិតក្នុងភូមិគ្រាច ឃុំកំពង់ចិនជើង ស្រុកស្ទោង ខេត្តកំពង់ធំនិងនៅទីប្រជុំជនភូមិត្នោត ឃុំកំពង់ចិនជើង ស្រុកស្ទោង ខេត្តកំពង់ធំ ផ្លូវខេត្តលេខ ២៦៤D ស្ថិតនៅក្នុងឃុំបន្ទាយស្ទោង ស្រុកស្ទោង ខេត្តកំពង់ធំ ផ្លូវខេត្តលេខ ២៦៤G ស្ថិតនៅភូមិតាទ្រាល ឃុំប្រឡាត ស្រុកស្ទោង ខេត្តកំពង់ធំ តាមបញ្ជាក់ក្នុងសេចក្ដីជូនដំណឹងដដែលបានឲ្យដឹងទៀតថា ការផ្អាកចរាចរណ៍ជាបណ្តោះអាសន្ននេះនឹងអនុវត្ដចាប់ពីថ្ងៃជូនដំណឹងនេះ រហូតដល់មានសេចក្តីជូនដំណឹងសារជាថ្មី៕