[Reasmey Kampuchea] - ស្ពានអាកាសស្តុបផ្សារដីហុយ នៅម៉ោង១១យប់ថ្ងៃទី១៩មេសាបិទការធ្វើចរាចរណ៍មួយចំហៀងនឹងបន្តការស្ថាបនាមួយចំហៀង
ភ្នំពេញ៖ ស្ពានអាកាសស្តុបផ្សារដីហុយនឹងបិទមួយចំហៀងនៅម៉ោង ១១និង០០យប់ថ្ងៃទី១៩ខែមេសាឆ្នាំ២០១៨នេះ ក្រោយពីស្ពានអាកាសមួយនេះបានដាក់ឲ្យប្រជាពលរដ្ឋប្រើប្រាស់ជាបណ្តោះអាសន្ន កាលពីថ្ងៃទី១២ មេសា មុនចូលឆ្នាំថ្មី កន្លងមកនេះ ប៉ុន្តែទោះការដ្ឋានស្ពានអាកាសស្តុបផ្សារដីហុយដំណើរការសាងសង់បន្តទៀតយ៉ាងណាក្តីតែការស្ថាបនាស្ពានអាកាសនេះ មិនបានបិទការធ្វើចរាចរណ៍ទាំងស្រុងនោះទេគឺបិទមួយចំហៀង ហើយមួយចំហៀងទៀតនឹងធ្វើចរាចរណ៍ទ្វេទិស។
លោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញបានឲ្យដឹងនៅថ្ងៃទី១៨ខែមេសានេះថាៈ នៅម៉ោង ១១និង០០យប់ថ្ងៃទី១៩ខែមេសាឆ្នាំ២០១៨នេះបិទការធ្វើចរាចរណ៍មួយចំហៀងក៏ប៉ុន្តែ ការដ្ឋានស្ពានអាកាសស្តុបផ្សារដីហុយ នឹងបើកឲ្យដំណើរការចរាចរណ៍ទ្វេរទិសដដែល ប៉ុន្តែនឹងបិទចរាចរណ៍លើកម្រាលស្ពាន ១គន្លងក្នុងចំណោម ២គន្លងនៃមួយចំហៀងស្ពាន ដើម្បីបន្តការសាងសង់។
លោកបន្តថា៖ការដាក់ឱ្យចរាចរណ៍បណ្តោះអាសន្ននេះ ត្រូវបានហាមរថយន្តក្រុង និងរថយន្តមានកម្ពស់លើស ៣ម៉ែត្រ ឆ្លងកាត់ស្ពាន។
គួររំលឹកថា អាកាសស្តុបផ្សារដីហុយ ត្រូវបានដាក់ឲ្យប្រជាពលរដ្ឋបានប្រើប្រាស់ជាបណ្តោះអាសន្ន កាលពីថ្ងៃទី១២ មេសា មុនចូលឆ្នាំថ្មី រហូតដល់ថ្ងៃទី១៨មេសានោះតែក្នុងរយះពេលនេះត្រូវបានរថយន្តក្រុងឯកជនចំនួន២គ្រឿងបានបើកបុកបំផ្លាញរបាំងដែរកំណត់កម្ពស់រថយន្តឆ្លងកាត់បាក់រាបដល់ដីចំនួន២លើកផងដែរ ។ ប៉ុន្តែទោះបីជាយ៉ាងណាក្តី កាលពីល្ងាចថ្ងៃទី១៨ មេសានេះ របាំងដែរកំណត់កម្ពស់រថយន្តឆ្លងកាត់លើស្ពាន អាកាសស្តុបផ្សារដីហុយ បានធ្វើការជួសជុលនិងដំឡើងបានល្អស្អាតឡើងវិញហើយ។
គួរបញ្ជាក់ផងដែរថា៖ ការដ្ឋានរស្ថាបនាស្ពានអាកាស ស្តុបផ្សារដីហុយ មានបណ្តោយ៩០៥ម៉ែត្រ ទទឹង១៦.៥ម៉ែត្រ ស្ថិតនៅប្រសព្វរវាងមហាវិថីសហព័ន្ធរុស្ស៊ី និងផ្លូវហាណូយ(១០១៩) ដែលជាគម្រោងហិរញ្ញប្បទានរបស់សាធារណរដ្ឋប្រជាមានិតចិន ទទួលបានសិទ្ធិសាងសង់ដោយក្រុមហ៊ុន សៀងហៃ និងត្រួតពិនិត្យបច្ចេកទេសដោយក្រសួងសាធារណការ និងដឹកជញ្ជូន។
លោកប្រធានមន្ទីរបានបញ្ជាក់ដែរថា៖ បច្ចុប្បន្ននេះនៅក្នុងរាជធានីភ្នំពេញមានស្ពានអាកាសចំនួន៥កន្លែងហើយ គឺស្ពានអាកាសក្បាលថ្នល់ នៅអតីតរង្វង់មូលក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ថិតនៅស្តុបពេទ្យលោកសង្ឃ ស្ពានអាកាស៥មករា ស្ថិតនៅស្ដុបតិចណូ និងស្ពានអាកាសស្តុបផ្សារដីហុយនេះមានប្រវែងជាងគេក្នុងចំណោមស្ពានអាកាសទាំង៥ ៕
