ឯកឧត្តមទេសរដ្ឋមន្ត្រី ស៊ុន ចាន់ថុលរដ្ឋមន្ត្រីក្រសួង សាធារណការនិងដឹកជញ្ជូន មានប្រសាសន៍ថា កំណើននៃការប្រើប្រាស់រថយន្តអគ្គិសនីនៅកម្ពុជា មានកើនឡើងគួរឱ្យកត់សម្គាល់ សម្រាប់ឆ្នាំ ២០២២នេះ ដែលជួយលើក កម្ពស់ដល់វិស័យបរិស្ថាន។ អ្នកយកព័ត៌មានយើងប្រចាំខេត្តសៀមរាបធ្វើសេចក្តីរាយការណ៍! ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន មានប្រសាសន៍ក្នុងឱកាស ក្នុងពិធីសម្ពោធដាក់ឱ្យប្រើប្រាស់ស្ថានីយបញ្ចូលថាមពលយានយន្តអគ្គិសនី (EV Charging Station) ដែលមានទីតាំងស្ថិតនៅភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប កាលពីថ្ងៃទី១៤ ខែកញ្ញា ឆ្នាំ ២០២២នេះថា កំណើននៃការប្រើប្រាស់រថយន្តអគ្គិសនី នៅកម្ពុជា មានការកើនឡើងគួរឱ្យកត់សម្គាល់ ដោយក្នុង រយៈពេល៧ខែ ក្នុងឆ្នាំ ២០២២ មានរថយន្តអគ្គិសនី សរុបចំនួន៣០៥គ្រឿងបានចុះបញ្ជី ធៀបនឹងរយៈពេលដូចគ្នាក្នុងឆ្នាំ២០២១ មានការកើនឡើងប្រមាណ១៨០៦% ដែលជាការឆ្លុះបញ្ចាំងឱ្យឃើញនូវការយល់ដឹង និងការគាំទ្ររបស់បងប្អូនប្រជាពល រដ្ឋ លើការប្រើប្រាស់រថយន្តអគ្គិសនីនៅកម្ពុជា។ ឯកឧត្តមបន្តថា៖ ការប្រើប្រាស់រថយន្តអគ្គិសនី មាន គុណសម្បត្តិល្អច្រើនជាងរថយន្តប្រើប្រេងឥន្ធនៈ ដោយពន្ធនាំចូលលើរថយន្តអគ្គិសនីនេះមានតម្លៃទាបជាងពន្ធនាំ ចូលនៃរថយន្តប្រើប្រេងឥន្ធនៈ ម្យ៉ាងវិញទៀតការប្រើប្រាស់រថយន្តអគ្គិសនីចំណេញថាម ពលច្រើនជាងរថយន្តប្រើប្រេងឥន្ធនៈដល់ទៅ៣ដង ចំណែកការជួសជុលថែទាំមានការចំណាយតិច ដោយ សារគ្រឿងបន្លាស់រថយន្តអគ្គិសនីមានចំនួនតិច ជាពិសេសជាងនេះទៀត ការប្រើប្រាស់រថយន្តអគ្គិសនីមិនបំភាយឧស្ម័នពុលទៅក្នុងបរិយាកាស និងមានសំឡេងស្ងាត់ល្អផងដែរ។ ឯកឧត្តមទេសរដ្ឋមន្ត្រី បានបន្តទៀតថា ជាមោទនភាពដែលក្រសួងសាធារណការ និងដឹកជញ្ជូន បានទទួលការឯកភាពដ៏ខ្ពង់ខ្ពស់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឱ្យធ្វើជាប្រធានដឹកនាំក្រុមការងារអន្តរក្រសួង សម្រាប់រៀបចំតាក់តែងលិខិតបទដ្ឋានគតិយុត្ត គោលនយោបាយ និងយុទ្ធសាស្ត្រជាតិ សម្រាប់គ្រប់គ្រង និងអភិវឌ្ឍវិស័យយានយន្តអគ្គិសនីនៅកម្ពុជា និងបានជំរុញលើកទឹកចិត្តឱ្យវិស័យឯកជនវិនិយោគលើការដំឡើងស្ថានីយបញ្ចូលថាមពលយានយន្តអគ្គិសនី ឱ្យបានទូលំទូលាយនៅទូទាំងប្រទេស ជាពិសេសនៅតាមស្ថានីយលក់ប្រេងឥន្ធនៈដើម្បីធានាបាននូវការផ្គត់ផ្គង់ថាម ពលអគ្គិសនីដល់យានយន្តបានគ្រប់ពេលវេលា។ ឯកឧត្តមទេសរដ្ឋមន្ត្រី ក៏បានគូសបញ្ជាក់ផងដែរ ពីកិច្ចខិត ខំប្រឹងប្រែងរបស់ក្រសួងសា ធារណការ និងដឹកជញ្ជូន ក្នុងការសហការជាមួយដៃគូអភិ វឌ្ឍន៍នានា ដូចជាកម្មវិធីអភិ វឌ្ឍន៍សហប្រជាជាតិ ដើម្បីចាប់ផ្ដើមត្រួសត្រាយផ្លូវឱ្យវិស័យឯកជនចូលរួមលើការវិនិយោគក្នុងការដំឡើងស្ថានីយបញ្ចូលថាមពលយានយន្តអគ្គិសនី។ សំឡេង៖ដោយសារផ្នែកឯក ជន លោកអត់ទាន់ដាក់ វិនិ យោគលលើស្ថានីយ៍បញ្ជូលថាមពលទេ ដូច្នេះបងប្អូនប្រជាពលរដ្ឋ ដែលចង់ទិញឡានប្រើដោយអាគុយនោះ លោកថាទិញឡានប្រើអាគុយអត់មានកន្លែងបញ្ជូលទេ អត់កន្លែងបញ្ជូលអាគុយពិបាកណាស់មកតាមផ្លូវ អត់អាគុយមិនដឹងបញ្ជូលតាមណាទេ ដូច្នេះបានរាជរដ្ឋាភិបាលយើងខិតខំប្រឹងប្រែងណាស់ ធ្វើការជាមួយដៃគូអភិវឌ្ឍន៍ដើម្បបើផ្លូវឱ្យវិស័យឯកជន យើងបានជំនួយពី UNDP ចំនួនបួនគ្រឿង។ សូមជម្រាបផងដែរថា គិតត្រឹមថ្ងៃទី១៤ ខែកញ្ញា ឆ្នាំ ២០២២ ក្រសួងបានដាក់ឱ្យដំណើរការនូវស្ថានីយបញ្ចូលថាមពលយានយន្តអគ្គីសនីបានចំនួន៣ទីតាំង ក្នុងនោះ៖ ទីតាំងទី១ស្ថិតនៅក្នុងទីស្ដីការក្រសួងសាធារណការ និងដឹកជញ្ជូន ទីតាំងទី២ស្ថិតនៅក្នុងខេត្តព្រះសីហនុ ដែលបានសម្ពោធដាក់ឱ្យប្រើប្រាស់កាលពីថ្ងៃទី២៧ ខែមេសា ឆ្នាំ២០២២កន្លងទៅ និងទីតាំងលើកទី៣ស្ថិតនៅក្នុងក្រុងសៀមរាប នាពេលនេះ។ ក្រសួងនឹងដំឡើងស្ថានីយបញ្ចូលថាមពលយានយន្តអគ្គិសនីទី៤ នៅខេត្តបាត់ ដំបង ដែលជាជំនួយរបស់អង្គការ UNDP ដើម្បីជំរុញលើកទឹកចិត្តឱ្យបងប្អូនប្រជា ពលរដ្ឋប្រើប្រាស់យានយន្តអគ្គិសនីឱ្យបានច្រើននៅក្នុងព្រះរាជាណាចក្រកម្ពុជា៕