ភ្នំពេញ៖ នៅទីបំផុត, លោកស្រី បុប្ផា ផានី ប្រធានស្ថានីយ៍ជញ្ជីងថ្លឹងរថយន្តអចល័តព្រែកហូរ-រាជធានីភ្នំពេញចេញលិខិតបំភ្លឺទទួលការពិតថា ពិតជាមានក្រុមរថយន្តដឹកខ្សាច់មួយចំនួនតូចពុំបានចូលមកថ្លឹងនៅក្នុងស្ថានីយពិត ប្រាកដមែន ក្រោយពីមានការចុះផ្សាយរបស់បណ្ដាញមាន The Mirror News កាលពីថ្ងៃទីយប់ថ្ងៃទី៣១ ខែសីហា ឆ្នាំ ២០២២ ដែលបានបញ្ជាក់អំពីការដឹកជញ្ចូនរបស់ក្រុមរថយន្តដឹកខ្សាច់មួយចំនួនតូច ដែលពុំបានចូលថ្លឹងនៅ ស្ថានីយថ្លឹងរថយន្តអចល័តព្រែកហូរ-រាជធានីភ្នំពេញ នៅពេលយប់។ នេះបើយោងតាមលិខិតបំភ្លឺរបស់គណៈកម្មាធិការសម្របសម្រួលអចិន្ត្រៃយ៍ស្ថានីយអចល័តព្រែកហូរ-រាជធានីភ្នំពេញដែលអង្គភាពព័ត៌មាន The Mirror News ទើបទទួលបាននៅរសៀលថ្ងៃទី០២ ខែកញ្ញា ឆ្នាំ២០២២នេះ។ ក្នុងលិខិតបំភ្លឺ លោកស្រី បុប្ផា ផានី បានបញ្ជាក់ថា ក្រុមរថយន្តដែលសារព័ត៌មានបានធ្វើការចុះផ្សាយខាងលើ គឺពិតជាបានធ្វើការដឹកជញ្ជូនខ្សាច់យកទៅចាក់នៅកំណាត់ផ្លូវសម្តេចតេជោ(៦០ម៉ែត្រ)ទល់មុខផ្សារអីអន ពុំបានចូលមកថ្លឹងនៅក្នុងស្ថានីយពិត ប្រាកដមែន ដោយពុំបានស្តាប់ និងធ្វើតាមការណែនាំរបស់យើងខ្ញុំជាមន្ត្រីស្ថានីយដែលបានធ្វើការអប់រំណែនាំ ជាច្រើនលើករួចមកហើយ។ នៅក្នុងលិខិតនោះដដែលលោកស្រីប្រធានស្ថានីយ៍ជញ្ជីងថ្លឹងរថយន្តអចល័តព្រែកហូរ-រាជធានីភ្នំពេញបានបញ្ជាក់បន្ថែមថា ក្រុមរថយន្តខាងលើ យើងខ្ញុំបានធ្វើការគៀងចូលស្ថានីយចំនួន ០២លើក (ពីរលើក)រួចមកហើយ ដើម្បីធ្វើការអប់រំណែនាំអំពីការដឹកជញ្ជូនដែលច្បាប់បានកំណត់ និងអនុញ្ញាតឲ្យដឹក ពោលគឺនៅយប់ពីថ្ងៃទី១៤ ខែសីហា ឆ្នាំ២០២២ និងនៅថ្ងៃទី១៧ ខែសីហា ឆ្នាំ២០២២។ ជាមួយនឹងការ អប់រំណែនាំខាងលើ ក្រុមរថយន្តទាំងនោះបានធ្វើការសន្យាថា នឹងធ្វើការដឹកជញ្ជូនឲ្យមានសណ្តាប់ធ្នាប់ និង មិនលើសទម្ងន់ឡើយ ឬអាចលើសក្រោម៥តោន។ បន្ទាប់ពីបានធ្វើការអប់រំណែនាំដល់ក្រុមរថយន្តខាងលើរួចមក យើងខ្ញុំបានធ្វើការគៀងដោយកំណត់ ឲ្យរថយន្តមួយចំនួនត្រូវចូលថ្លឹងជាក់ស្តែង ដើម្បីប្រាកដថា តើពួកគាត់បានធ្វើតាមការណែនាំរបស់យើងខ្ញុំដែរ ឬទេ។ ជាក់ស្ដែងយើងខ្ញុំបានសង្កេតឃើញរថយន្តទាំងអស់នោះ មានការដឹកខ្សាច់ខ្លះក្រោមទ្រូង និងខ្លះស្មើ ទ្រុងស្ទើតែមើលពុំឃើញ ក្នុងនោះរថយន្តចំនួនជាង១០គ្រឿងត្រូវបានថ្លឹង ជាលទ្ធផលបញ្ជាក់ថា រថយន្តទាំង នោះគឺលើសជាមធ្យមក្រោម៥តោន និងរថយន្តខ្លះដឹកស្មើទម្ងន់ដែលច្បាប់អនុញ្ញាត៕