[Phnom Penh Post] - ស្ពានអាកាស ២ ទៀតនៅរាជធានីភ្នំពេញ តម្លៃជាង $៤៦ លាន ត្រូវបានបើកការដ្ឋានសាងសង់
2022-09-01
Go to the website published Phnom Penh Post
ភ្នំពេញៈ ស្ពានអាកាសក្នុងរាជធានីភ្នំពេញចំនួន ២ ទៀត ដែលមានតម្លៃសរុបជាង ៤៦ លានដុល្លារអាមេរិក ត្រូវបានលោកនាយករដ្ឋមន្ត្រី ហ៊ុន សែន បើកការដ្ឋានសាងសង់នាព្រឹកថ្ងៃទី ៣១ ខែសីហា ដែលស្ពានអាកាសទី ១ ត្រូវបានដាក់ឈ្មោះថា «ស្ពានអាកាសព្រះមុនីវង្ស» និងស្ពានអាកាសទី ២ មានឈ្មោះ ថា«ស្ពានអាកាស គង់ សំអុល»។
ស្ពានអាកាសដែលសាងសង់បន្ថែមនេះ ទី ១ ស្ថិតនៅចំណុចប្រសព្វមហាវិថីសម្តេចតេជោហ៊ុន សែន និងមហាវិថីព្រះមុនីវង្សជាមួយវិថីកងយោធពលខេមរភូមិន្ទ [ផ្លូវលេខ ២៧១] ក្នុងទឹកដីខណ្ឌចំការមន និងខណ្ឌមានជ័យ។ រីឯស្ពានអាកាសទី ២ នៅចំណុចប្រសព្វមហាវិថីសហព័ន្ធរុស្ស៊ីជាមួយមហាវិថីសម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល [ផ្លូវលេខ ២០០៤] ក្នុងខណ្ឌពោធិ៍សែនជ័យ។
លោកនាយករដ្ឋមន្ត្រី ហ៊ុន សែន ដែលបានចូលរួមជាកិត្តិយសក្នុងការបើកការដ្ឋានសាងសង់ស្ពានទាំង ២ នេះបានឱ្យដឹងថា ស្ពានអាកាសទាំង ២ នេះ សាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) ដោយចំណាយថវិកាសរុប ៤៦៧៧៥ ០០០ ដុល្លាអាមេរិក។
លោកបញ្ជាក់ថា ស្ពានអាកាសចំណុចប្រសព្វមហាវិថីសម្តេចតេជោ ហ៊ុន សែន និងមហាវិថីព្រះមុនីវង្សជាមួយវិថីកងយោធពលខេមរភូមិន្ទ ចំណាយថវិកា ៣៦ ៧៧៥ ០០០ ដុល្លារ និងចំណាយពេលសាងសង់៣៦ខែ។ ដោយឡែកស្ពានអាកាសនៅចំណុចប្រសព្វមហាវិថីសហព័ន្ធរុស្ស៊ីជាមួយមហាវិថីសម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល ចំណាយថវិកា ១០ ០០០ ០០០ ដុល្លារអាមេរិក ចំណាយពេលសាងសង់ ១៦ ខែ។
លោក ហ៊ុន សែន ថ្លែងថា៖ «ខ្ញុំបានសម្រេចដាក់ឈ្មោះឱ្យស្ពានអាកាសចំណុចប្រសព្វមហាវិថីព្រះមុនីវង្ស មហាវិថីសម្តេចតេជោ និងវិថីកងយោធពលខេមរភូមិន្ទថា ស្ពានអាកាសព្រះមុនីវង្ស។ រីឯស្ពានអាកាសចំណុចប្រសព្វផ្លូវ ២០០៤ និងមហាវិថីសហព័ន្ធរុស្ស៊ី ដាក់ឈ្មោះថា ស្ពានអាកាស គង់ សំអុល»។កាលពីទសវត្សរ៍ឆ្នាំ ៨០ និង ៩០ តម្រូវការរបស់ប្រជាពលរដ្ឋខុសឆ្ងាយពីពេលបច្ចុប្បន្ន ដែលពីមុនតម្រូវការខ្ពស់បំផុត គឺត្រឹមជាស្បៀងអាហារតែប៉ុណ្ណោះ។ ក៏ប៉ុន្តែសម្រាប់បច្ចុប្បន្ននេះវិញ ប្រជាពលរដ្ឋមិនមែនខ្វះស្បៀងអាហារទៀតទេ គឺពួកគាត់មានតម្រូវការប្រព័ន្ធហេដ្ឋរចនាសម្ព័ន្ធសម្រាប់ធ្វើដំណើរវិញ។
នាឱកាសនោះ លោកនាយករដ្ឋមន្ត្រីក៏បានលើកឡើងដែរថា ការសាងសង់ហេដ្ឋារចនាសម្ព័ន្ធ និងស្ពានអាកាសក្នុងរាជធានីភ្នំពេញ គឺជាការប្រើយុទ្ធសាស្ត្រ យកស្លឹកត្នោតខ្ចប់ស្ករត្នោត។ មានន័យថា យកលុយចំណូលពីការវិនិយោគក្នុងរាជធានី មកអភិវឌ្ឍរាជធានីភ្នំពេញវិញ។
ជាមួយគ្នានេះ លោក ហ៊ុន សែន ក៏បានលើកឡើងពីគម្រោងសាងសង់ស្ពានឆ្លងទន្លេ ៣ ខ្សែទៀតផងដែរ គឺស្ពានឆ្លងពីផ្សារចាស់ទៅស្វាយជ្រុំ (បែងចែកជា ២ កំណាត់)។ ស្ពានឆ្លងពីក្ដីតាកុយឆ្ពោះទៅអរិយក្សត្រ និងស្ពានឆ្លងពីចាក់អង្រែទៅព្រែកប្រា ដើម្បីសម្រួលការធ្វើចរាចរណ៍ចេញ-ចូលរាជធានីភ្នំពេញ ខណៈគម្រោងខ្លះកំពុងសិក្សាទីតាំងសាងសង់ និងគម្រោងខ្លះទៀតកំពុងចរចាជាមួយដៃគូ។
លោក ឃួង ស្រេង អភិបាលរាជធានីភ្នំពេញបានថ្លែងក្នុងពិធីនោះថា ក្នុងវិស័យហេដ្ឋារចនាសម្ព័ន្ធរូបវន្ត រាជរដ្ឋាភិបាលបានស្តារនូវសមិទ្ធផលនានាពាសពេញផ្ទៃប្រទេស ដោយជំរុញដល់ការអភិវឌ្ឍសង្គមជាតិលើគ្រប់វិស័យ ដើម្បីលើកកម្ពស់ជីវភាពប្រជាជន និងកិត្យានុភាពជាតិ។
លោកអភិបាលរាជធានីបានលើកឡើងថា៖ «សម្រាប់រាជធានីភ្នំពេញ សម្តេចតេជោតែងតែគាំទ្រយ៉ាងពេញទំហឹងចំពោះការអភិវឌ្ឍរូបវន្តដឹកជញ្ជូន ដើម្បីជំរុញការស្តារ និងកសាងហេដ្ឋារចនាសម្ព័ន្ធ រូបវន្តនានាក្នុងទីក្រុងឱ្យកាន់តែមានលក្ខណៈទំនើប ដូចបណ្តាទីក្រុងជិតខាងក្នុងតំបន់ផងដែរ»។ បើយោងតាមការបញ្ជាក់ពីលោក ឃួង ស្រេង រហូតមកទល់ពេលបច្ចុប្បន្ន រាជធានីភ្នំពេញបានចំណាយលើការសាងសង់ទាំងស្ពានឆ្លងទន្លេ និងស្ពានអាកាស សរុបថវិកាជាង ២២៦ លានដុល្លារអាមេរិកហើយ។
ដោយឡែក នាពិធីបើកការដ្ឋានសាងសង់ស្ពានអាកាសនេះដែរ លោក ហ៊ុន សែន ក៏បានដាក់បទបញ្ជា និងរំឭកទៅដល់អភិបាលខេត្ត-ក្រុង ព្រមទាំងអភិបាលរងទាំងអស់ ជាពិសេសផ្នែកសាធារណការ និងដឹកជញ្ជូនត្រូវមើលផ្លូវ។លោក ហ៊ុន សែន បានថ្លែងថា៖ «ប៉ុន្មានថ្ងៃមុន ខ្ញុំបានដកចៅហ្វាយក្រុងតាខ្មៅ ដោយសារមិនមើលផ្លូវ ហើយខ្ញុំចាំមើលចៅហ្វាយខេត្តមួយណា ដែលនឹងធ្វើឱ្យព្រែកហូរត្រូវបានចាក់បេតុងឱ្យបានច្រើនជាងនេះ។ ស៊ីចៅហ្វាយខេត្តច្រើន តែមិនមានចៅហ្វាយខេត្តណាមួយធ្វើកន្លែងហ្នឹងឱ្យបានល្អ»។
លោកនាយករដ្ឋមន្ត្រីបន្ថែមថា ការណ៍ដែលលោកបញ្ជាឱ្យមើលផ្លូវនេះ គឺមិនសំដៅតែលើរាជធានីភ្នំពេញ និងខេត្តកណ្តាលទេ គឺគ្រប់រាជធានី-ខេត្តនៅទូទាំងប្រទេសត្រូវតែមើលផ្លូវដែលខូច។
លោកបានបញ្ជាក់ថា៖ «ផ្លូវកាន់តែច្រើន តម្រូវការជួសជុលកាន់តែច្រើន ហើយផ្លូវកាន់តែវែង តម្រូវការជួសជុលក៏កាន់តែច្រើនដែរ។ ដូចនេះត្រូវតែមានការទទួលខុសត្រូវលើការថែទាំវា ដើម្បីឱ្យផ្លូវស្អាត ហើយអ្វីដែលសំខាន់ជាងនេះទៅទៀត គឺហាមឃាត់ និងដាក់វិន័យចំពោះអ្នកដែលដឹកលើសទម្ងន់ រួមនឹងអ្នកដែលបើកបរហួសល្បឿនកំណត់ផងដែរ»។
គួរបញ្ជាក់ដែរថា ក្នុងរាជធានីភ្នំពេញមានស្ពានអាកាសចំនួន ៦ ដែលត្រូវបានដាក់ឱ្យប្រើប្រាស់ ក្នុងនោះមានស្ពានអាកាសក្បាលថ្នល់ ស្ពានអាកាស ៧ មករា (ពេទ្យលោកសង្ឃ) ស្ពានអាកាស និងផ្លូវក្រោមដីស្ទឹងមានជ័យ ស្ពានអាកាស និងផ្លូវក្រោមដី ៥ មករា (តិចណូ) ស្ពានអាកាសមិត្តភាពកម្ពុជា-ចិនសែនសុខ (ផ្សារដីហុយ) ស្ពានអាកាស និងផ្លូវក្រោមដីចោមចៅ ហើយទី ៧ គឺស្ពានអាកាសឫស្សីកែវ ដែលកំពុងដំណើរការសាងសង់៕
