ពិធីសំណេះសំណាល ចែករំលែកបទពិសោធន៍ និងលើកទឹកចិត្តដល់បេក្ខជនជ័យលាភីអាហារូបករណ៍របស់រាជរដ្ឋាភិបាលជប៉ុន(MEXT)ក្នុងក្របខណ្ឌកម្មវិធីអ្នកដឹកនាំវ័យក្មេង ថ្ងៃអង្គារ ៤កើត ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៣០ ខែសីហា ឆ្នាំ២០២២ នៅទីស្តីការក្រសួង ឯកឧត្តម ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន បាន អញ្ជើញជាអធិបតីដ៏ខ្ពង់ខ្ពស់ក្នុងពិធីសំណេះសំណាលជាមួយបេក្ខជនជ័យលាភីអាហារូបករណ៍របស់ រដ្ឋាភិបាលជប៉ុន(MEXT)ក្នុងក្របខណ្ឌកម្មវិធីអ្នកដឹកនាំវ័យក្មេងចំនួន០៥រូប ក្នុងនោះស្រី០១រូប ដោយមានការចូលរួមពីថ្នាក់ដឹកនាំ និងមន្ត្រីជំនាញពាក់ព័ន្ធ។ កម្មវិធីនេះរៀបចំឡើងក្នុងគោលបំណងជួបសំណេះសំណាល ចែករំលែកបទពិសោធន៍ និងលើកទឹកចិត្ត ជូនចំពោះបេក្ខជនជ័យលាភីទាំង០៥ រូប ដែលបានប្រឡងជាប់អាហារូបករណ៍រដ្ឋាភិបាលជប៉ុន(MEXT) ក្នុងក្របខណ្ឌកម្មវិធីអ្នកដឹកនាំវ័យក្មេង។ បេក្ខជនជ័យលាភីទាំង០៥ រូបនេះនឹងត្រូវចេញដំណើរទៅបន្តការសិក្សាថ្នាក់បរិញ្ញាបត្រជាន់ខ្ពស់នៅ ប្រទេសជប៉ុននាពេលដ៏ខ្លីខាងមុខលើកម្រិតសិក្សារួមមាន៖ បរិញ្ញាបត្រជាន់ខ្ពស់ជំនាញរដ្ឋបាលសាធារណៈចំនួន០២ រូប មកពីក្រសួងមហាផ្ទៃ បរិញ្ញាបត្រជាន់ខ្ពស់ជំនាញសុខភាពសាធារណៈ ចំនួន០២ រូប មកពីក្រសួងសុខាភិបាល និងបរិញ្ញាបត្រជាន់ខ្ពស់ជំនាញនីតិពាណិជ្ជកម្មចំនួន០១ រូប មកពីក្រសួងពាណិជ្ជកម្ម។ ថ្លែងក្នុងពិធីសំណេះសំណាលនាឱកាសនោះ ឯកឧត្តមរដ្ឋលេខាធិការ បានក្រើនរំលឹកដល់បេក្ខជនជ័យ លាភីទាំងអស់ថា៖ ក្នុងនាមជាបញ្ញវន្តតំណាងឱ្យប្រទេសកម្ពុជា ត្រូវព្យាយាមសិក្សារៀនសូត្រស្វែងយល់ ឱ្យបានស៊ីជម្រៅ ដកស្រង់យកបទពិសោធន៍ថ្មីៗឱ្យបានច្រើន និងតាមដានពីភាពរីកចម្រើនប្រទេសរបស់ខ្លួន ដើម្បីយកទៅប្រើប្រាស់ជាជំនួយគំនិត ព្រមទាំងកែច្នៃប្រើប្រាស់ឱ្យសមស្របទៅតាមបរិបទសង្គម ជាតិយើងនៅពេលត្រឡប់មកវិញ។ ឯកឧត្តមរដ្ឋលេខាធិការ បានបន្ថែមថា៖ បេក្ខជនជ័យលាភីទាំងអស់គឺជាអ្នកមានចំណេះដឹងជាអ្នកនាំពាក្យតំណាងឱ្យប្រទេសកម្ពុជា មានតួនាទីចូលរួមផ្សព្វផ្សាយអំពីតថភាពសង្គម ភាពរីកចម្រើនក្រោម ដំបូលសុខសន្តិភាពក្រោមការដឹកនាំដ៏ត្រឹមត្រូវរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ភាពល្អផូរផង់នៃប្រពៃណីជាតិខ្មែរទៅកាន់ពិភពលោក និងជាពិសេស ត្រូវរក្សាមិត្តភាព និងទំនាក់ទំនងល្អរវាងគ្នានឹងគ្នា ដោយប្រកាន់ភ្ជាប់នូវវិន័យ និងការគោរច្បាប់នៃប្រទេសជប៉ុនឱ្យបានខ្ជាប់ខ្ជួនផងដែរ។ ឯកឧត្តមរដ្ឋលេខាធិការ ក៏បានជំរុញ និងលើកទឹកចិត្តផងដែរឱ្យបេក្ខជនជ័យលាភីអាហារូបករណ៍ទាំង ៥ រូប ព្យាយាមសិក្សាឱ្យអស់ពីលទ្ធភាព ដើម្បីទទួលបានលទ្ធផលល្អប្រសើរ ហើយក្លាយជាទំពាំងដ៏ល្អ មានសមត្ថភាពគ្រប់គ្រាន់ អាចស្នងឬស្សីពិតប្រាកដបាន និងអាចចូលរួមជាមួយរាជរដ្ឋាភិបាលដើម្បី អភិវឌ្ឍសង្គមជាតិឱ្យកាន់តែរីកចម្រើន ពីព្រោះអ្នកទាំងអស់គ្នាគឺសុទ្ធសឹងជាអនាគតអ្នកដឹកនាំ៕