ក្រសួងសាធារណការ និងដឹកជញ្ជូន រៀបចំវគ្គបណ្តុះបណ្តាលស្តីពីការរៀបចំរបាយការណ៍សមិទ្ធកម្ម ដល់សមាសភាពនៃអង្គភាពថវិការដ្ឋបាលកណ្ដាល និងមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត សៀមរាប៖ ថ្ងៃសុក្រ ៧រោច ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៩ ខែសីហា ឆ្នាំ២០២២ ឯកឧត្តម ស៊ឹង សុគង់ អនុរដ្ឋលេខាធិការតំណាងដ៏ខ្ពង់ខ្ពស់ឯកឧត្តម សួង ហេង រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីបើកវគ្គបណ្តុះបណ្តាលស្តីពីការរៀបចំរបាយការណ៍សមិទ្ធកម្មដល់សមាសភាពនៃអង្គភាពថវិការដ្ឋបាលកណ្ដាល និងមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត ប្រមាណជាង១០០នាក់។ វគ្គបណ្តុះបណ្តាលនេះរៀបចំឡើងក្នុងគោលបំណងជួយឱ្យសិក្ខាកាមទាំងអស់ចេះតាមដានជាប្រចាំនូវ ការអនុវត្តថវិកានៅតាមអង្គភាពរបស់ខ្លួន ពិសេសអាចយល់ដឹងអំពីការធ្វើរបាយការណ៍វឌ្ឍនភាពលើសូចនាករលទ្ធផលក្នុងឆ្នាំ និងសូចនាករលទ្ធផលចុងក្រោយ ដែលត្រូវអនុលោមទៅតាមទម្រង់របាយការណ៍របស់ក្រសួងសេដ្ឋកិច្ច និងហិរញ្ញវត្ថុ ដែលស្តែងឱ្យឃើញនូវភាពច្បាស់លាស់លើការគ្រប់គ្រង និងការប្រើប្រាស់ថវិកាជាតិ ប្រកបដោយប្រសិទ្ធភាព ជាពិសេសការអនុវត្តតាមនីតិវិធីនៃការអនុវត្តថវិកា កម្មវិធីដែលជាគោលដៅបង្កើនការផ្សារភ្ជាប់ថវិកាទៅនឹងគោលនយោបាយជាអាទិភាពរបស់រាជរដ្ឋាភិបាល និងការកែទម្រង់ការគ្រប់គ្រងហិរញ្ញវត្ថុសាធារណៈឈានមកដល់ដំណាក់កាលទី៣។ ថ្លែងក្នុងសុន្ទរកថាបើកកម្មវិធី ឯកឧត្តមអនុរដ្ឋលេខាធិការ បានថ្លែងអំណរគុណយ៉ាងជ្រាលជ្រៅចំពោះ ក្រសួងសេដ្ឋកិច្ច និងហិរញ្ញវត្ថុ ដែលបានសហការជាមួយក្រសួងសាធារណការ និងដឹកជញ្ជូន ធ្វើឱ្យវគ្គបណ្តុះបណ្តាលនាថ្ងៃនេះលេចចេញជារូបរាងឡើង។ ទន្ទឹមជាមួយគ្នានោះដែរ ឯកឧត្តមអនុរដ្ឋលេខាធិការ បានជម្រាបជូនថា៖ ការអនុវត្តកម្មវិធីការកែទម្រង់ ការគ្រប់គ្រងហិរញ្ញវត្ថុសាធារណៈ បានឈានមកដល់ដំណាក់កាលទី៣ ក្នុងគោលដៅបង្កើនការផ្សារភ្ជាប់ថវិកាទៅនឹងគោលនយោបាយជាអាទិភាពរបស់រាជរដ្ឋាភិបាល ពិសេសការអនុវត្តថវិកាកម្មវិធីពេញលេញរបស់អង្គភាពថវិកា ដែលវគ្គបណ្តុះបណ្តាលនាថ្ងៃនេះ ពិតជាមានសារ:សំខាន់ណាស់សម្រាប់សមាសភាពដែលអញ្ជើញមកពីអង្គភាពថវិកា រដ្ឋបាលកណ្តាល និងមន្ទីរសាធារណការ និងដឹកជញ្ជូន ទាំង២៥ រាជធានី-ខេត្ត ក្នុងការពង្រឹងសមត្ថភាព និងលើកកម្ពស់ការយល់ដឹងថែមទៀត ដើម្បីគាំទ្រដល់ប្រក្រតីភាព និងប្រសិទ្ធភាពនៃការអនុវត្តការងារនៅក្នុងអង្គភាពរបស់ខ្លួនផងដែរ។ ឯកឧត្តមអនុរដ្ឋលេខាធិការ បានសម្តែងក្តីសង្ឃឹមយ៉ាងមុតមាំថា៖ សិក្ខាកាមទាំងអស់នឹងបានយល់ដឹងកាន់តែស៊ីជម្រៅលើការរៀបចំរបាយការណ៍សមិទ្ធកម្ម ជាចំណេះដឹងថ្មីបន្ថែមទៀតសម្រាប់យកទៅអនុវត្ត ក្នុងការងារប្រចាំថ្ងៃសមស្របទៅតាមនីតិវិធី ហើយទទួលបានប្រសិទ្ធភាពការងារខ្ពស់ និងបានផ្តាំផ្ញើសុំឱ្យ សិក្ខាកាមទាំងអស់ជួយផ្សព្វផ្សាយឱ្យកាន់តែទូលំទូលាយបន្ថែមទៀតនៅក្នុងអង្គភាពរបស់ខ្លួន និងត្រូវ ផ្តោតការយកចិត្តទុកដាក់ក្នុងកិច្ចការងារអនុវត្តប្រចាំថ្ងៃលើការរៀបចំរបាយការណ៍សមិទ្ធកម្មឱ្យបានសមស្របទៅតាមនីតិវិធីប្រកបដោយប្រសិទ្ធភាពខ្ពស់ និងច្បាស់លាស់៕