ភ្នំពេញ៖ កម្ពុជាចង់ឃើញទំនាក់ទំនង និងកិច្ចសន្ទនាជាមួយសហរដ្ឋអាមេរិក ដែលរឹងមាំ និងច្រើនជាងសព្វថ្ងៃ ក៏ដូចជាការវិនិយោគពីបណ្ដាក្រុមហ៊ុនសហរដ្ឋអាមេរិកច្រើនបន្ថែមទៀត។ ក្នុងការពិភាក្សាពាក់ព័ន្ធជាមួយមូលដ្ឋានយោធានៅសមុទ្ររាម ភាគីកម្ពុជាបានបញ្ជាក់ឡើងវិញ នូវអ្វីដែលសម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានលើកឡើងក្នុងកិច្ចប្រជុំកំពូលពិសេសអាស៊ាន-អាមេរិក នៅរដ្ឋធានីវ៉ាស៊ីនតោនថា មិនមាន និងមិនអនុញ្ញាតឱ្យមាន វត្តមានមូលដ្ឋានយោធាបរទេសណាមួយនៅលើទឹកដីកម្ពុជានោះឡើយ។ ពាក់ព័ន្ធសំណុំរឿងសកម្មជននយោបាយនានានោះ គឺជាការអនុវត្តច្បាប់នៃព្រះរាជាណាចក្រកម្ពុជា ចំពោះជនល្មើសទូទៅ ហើយជាសមត្ថកិច្ចរបស់តុលាការ និងមិនមែនជាការបំពានទៅលើសិទ្ធិនយោបាយ និងបញ្ចេញមតិរបស់សកម្មជនទាំងនោះទេ។ ទន្ទឹមនេះ ភាគកម្ពុជាក៏បានជម្រាបជូនគណៈប្រតិភូ អំពីវឌ្ឍនភាពរបស់កម្ពុជាក្នុងនាមជាប្រធានអាស៊ានឆ្នាំ២០២២ ដោយរំលេចអំពីទស្សនកិច្ចដ៏ជោគជ័យ របស់លោក Antony Blinken រដ្ឋមន្ត្រីការបរទេសអាមេរិកមកកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ។ ភាគីកម្ពុជា ក៏បានបញ្ជាក់អំពីគោលនយោបាយការបរទេសឯករាជ្យ និងអព្យាក្រឹតដោយឈរលើ គោលការណ៍ សន្តិសហវិជ្ជមាន ដោយផ្អែកលើរដ្ឋធម្មនុញ្ញកម្ពុជា។ នេះគឺជាការបញ្ជាក់ពីភាគីកម្ពុជាដឹកនាំដោយលោកសួស យ៉ារ៉ា ប្រធានគណៈកម្មការកិច្ចការបរទេស សហ ប្រតិបត្តិការអន្តរជាតិ ឃោសនាការនិងព័ត៌មាននៃរដ្ឋសភា សមាជិកសភា និងមន្ត្រីជាន់ខ្ពស់សភា រួម ជាមួយតំណាងរាជរដ្ឋាភិបាល កាលពីថ្ងៃទី១៦ ខែ សីហា ឆ្នាំ២០២២ នៅវិមានរដ្ឋសភា បានទទួលជួបពិភាក្សាការងារជាមួយគណៈប្រតិភូសភាអាមេ រិក ដឹកនាំដោយ លោក Edward J. Markey សមាជិកព្រឹទ្ធសភា ដើម្បីពង្រឹងកិច្ចសហប្រតិបត្តិការ នៃសភាទាំងពីរ។ ជំនួបពិភាក្សាការងារនេះ មានការអញ្ជើញចូលរួមពី លោក ម៉ម ប៊ុននាង ប្រធានគណ:កម្មការទី១០ នៃព្រឹទ្ធសភាលោកទី សុគន្ធ លោក ខៀវ ភារិទ្ធ លោកជាម ប៉េអា សមាជិករដ្ឋសភា លោក ឡេង ប៉េងឡុង អគ្គលេខាធិការរដ្ឋសភា និងតំណាងរាជរដ្ឋា ភិបាលរួមមាន លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង សាធារណការនិងដឹកជញ្ជូន លោកចែម វិទ្យា រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ លោកជិន ម៉ាលីន រដ្ឋលេខាធិការក្រសួងយុត្តិធម៌ និងលោក លោក ស្រី តំណាងក្រសួងស្ថាប័នពាក់ព័ន្ធ មួយចំនួនផងដែរ។ ចំណែកឯគណៈប្រតិភូសភាសហរដ្ឋអាមេរិករួមមាន Hon. Adam Stewart Lowenthal, Hon, John Raymond Garamendi, Hon. Donald Sternoff Beyer, Hon. Amata Coleman Radewagen សមាជិករដ្ឋសភា។ ភាគីកម្ពុជាបានសម្តែងការស្វាគមនដ៏កក់ក្ដៅដល់គណៈប្រតិភូសភាសហរដ្ឋអាមេរិក ដោយបានជម្រាប ជូនពីដំណើរការរៀបចំបែបបទជូនសភាសហរដ្ឋអាមេរិកជាអ្នកសង្កេតការផ្លូវការរបស់អាយប៉ាក្នុងមហាសន្និបាត អាយប៉ាលើកទី៤៣ ដែលសភាកម្ពុជាជាប្រធាននិងជាម្ចាស់ផ្ទះក្នុងខែវិច្ឆិការឆ្នាំ២០២២នេះ ហើយក៏ធ្វើបទបង្ហាញអំពីដំណើរ ការអភិវឌ្ឍប្រទេសកម្ពុជា ជាពិសេសចាប់ពីឆ្នាំ ១៩៩៨ ដែលកម្ពុជាទទួលបានសន្តិភាពពេញ លេញ។ យោងតាមសេចក្តីប្រកាសព័ត៌មានពីអគ្គលេខាធិការដ្ឋានរដ្ឋសភា ដែលទទួលបាននៅថ្ងៃនេះ។ នៅក្នុងជំនួបពិភាក្សានោះដែរ ភាគីកម្ពុជាបានលើកបង្ហាញអំពីអាយុជាមធ្យមរបស់ប្រជាជនខ្មែរ បានកើនពី៥៦ឆ្នាំ នៅឆ្នាំ ១៩៩៨ មក ដល់៧០ឆ្នាំ នៅឆ្នាំ២០២២ នេះជាការឆ្លុះបញ្ចាំងពីការអភិវឌ្ឍរបស់ប្រទេសកម្ពុជាលើគ្រប់វិស័យដូចជា វិស័យ ហេដ្ឋារចនាសម្ព័ន្ធ អប់រំសុខភាពសាធារណៈជាដើម ដោយទទួលបានការជ្រោមជ្រែងពីបណ្តាប្រទេសជាមិត្តដូច ជា ជប៉ុន ចិន កូរ៉េ សហរដ្ឋ អាមេរិក សហគមន៍អឺរ៉ុប និងដៃគូរអភិវឌ្ឍន៍អន្តរជាតិនានា។ ជាក់ស្ដែងក្រោមជំនួយ របស់ជប៉ុន កម្ពុជាបាននិងកំពុងធ្វើទំនើបកម្មកំពង់ផែក្រុងព្រះសីហនុដើម្បីឱ្យភ្ជាប់ការដឹកជញ្ជូនដោយផ្ទាល់ពីកម្ពុជាសហរដ្ឋអា មេរិក។ គណៈប្រតិភូសភាអាមេរិក បានថ្លែង អំណរគុណចំពោះរដ្ឋសភាកម្ពុជា ដែលបានទទួលស្វាគមន៍យ៉ាងកក់ក្តៅ ព្រម ទាំង បានសម្តែងនូវការសាទរចំពោះជំហរកម្ពុជា ពាក់ព័ន្ធវិបត្តិនៅអ៊ុយក្រែន និងអរគុណចំពោះកិច្ចខិតខំប្រឹងប្រែង ទាំងឡាយរបស់កម្ពុជា ក្នុងការរកដំណោះស្រាយវិបត្តិនៅប្រទេសមីយ៉ាន់ម៉ា ហើយលើកទឹកចិត្តដល់ កម្ពុជាខិតខំប្រើប្រាស់ឥទ្ធិពលរបស់ខ្លួនចូលរួមដោះ ស្រាយ បញ្ហានានាក្នុងតំបន់ផងដែរ គណៈប្រតិភូក៏បាន ទទួលស្គាល់នូវការអភិវឌ្ឍជឿនលឿនដ៏គួរឱ្យកត់សម្គាល់របស់កម្ពុជាកន្លងមកនេះ ។ ជារួមគណៈប្រតិភូសភាសហរដ្ឋអាមេរិកបានបញ្ជាក់ពីបំណង់របស់គណៈប្រតិភូសភាសហរដ្ឋអាមេរិក មកទីនេះ គឺដើម្បីធ្វើជាដៃគូររបស់កម្ពុជា បង្កើនកិច្ចសហការ និងជួយគាំទ្រកម្ពុជា សម្រេចឱ្យបាននូវសក្តានុពល អភិវឌ្ឍន៍របស់ខ្លួន ដោយយកលទ្ធិប្រជាធិបតេយ្យជាមូលដ្ឋានគន្លឹះ តាមរយៈការរបង្កើនតម្លាភាពកាន់តែពេញលេញ លើការអភិវឌ្ឍនានា៕