[Reasmey Kampuchea] - រថភ្លើងដឹកអ្នកដំណើរ ភ្នំពេញ-ព្រលានយន្តហោះអន្តរជាតិភ្នំពេញ បើកដំណើរការហើយ
ភ្នំពេញ: រថភ្លើងដឹកអ្នកដំណើរ ភ្នំពេញ-ព្រលានយន្តហោះ អន្តរជាតិភ្នំពេញ បានត្រូវបើកឲ្យប្រើប្រាស់ជាបណ្តោះអាសន្ន នៅព្រឹកថ្ងៃទី១០ ខែមេសា ឆ្នាំ២០១៨ នេះ ក្រោមវត្តមានលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូន។
សម្រាប់ការដាក់ឲ្យប្រើប្រាស់ ជាបណ្តោះអាសន្ននេះ ប្រជាពលរដ្ឋអាចធ្វើដំណើរតាម រថភ្លើង ដោយឥតគិតថ្លៃ ចាប់ពីថ្ងៃទី១០ ខែមេសា រហូតដល់ថ្ងៃទី៣១ ខែកក្កដា ឆ្នាំ២០១៨។ជាពិសេសភ្ញៀវជាតិនិងអន្តរជាតិដែលត្រូវធ្វ់ដំណើរទៅអាកាសយានដ្ឋានអន្តរជាតិភ្នំពេញ ដែលមិនស្ទះចរាចរណ៍និងចំណេញពេលវេលា។
លោក ទេសរដ្ឋមន្ត្រី ស៊ុន ចាន់ថុល បានថ្លែងឱ្យដឹងថារថភ្លើងដឹកអ្នកដំណើរនេះចំណាយពេលប្រមាណ ៣០ នាទីក្នុងការដឹកជញ្ជូនអ្នកដំណើរពីស្ថានីយរថភ្លើងភ្នំពេញ ទៅព្រលានយន្តហោះនិងអាចផ្ទុកអ្នកដំណើររួមទាំងអ្នកអង្គុយនិងអ្នកឈរ ប្រមាណ១០០នាក់ផងដែរ។
ផ្លូវដែកនេះបំបែកពីផ្លូវចាស់ (ដែលចេញពីស្ថានីយ៍រថភ្លើងរាជធានីភ្នំពេញឆ្ពោះទៅខេត្តព្រះសីហនុ) ចូលទៅអាកាសយានដ្ឋានអន្តរជាតិភ្នំពេញ។ កំណាត់ថ្មីនេះមានប្រវែង ១,៩១៣ម៉ែត្រ ហើយរថភ្លើង៣គ្រឿង នឹងដាក់ឲ្យដំណើរមុនចូលឆ្នាំខ្មែរ សម្រាប់ដឹកជញ្ជូនភ្ញៀវទេសចរ ចេញចូលអាកាសយានដ្ឋានអន្តរជាតិភ្នំពេញ។ ចំពោះកន្លែងឆេកអ៊ីន( Chek in) អ្នកដំណើរអាចឆែកនៅស្ថានីយអយស្ម័យយានភ្នំពេញ ហើយពេលមកដល់អាកាសយានដ្ឋាន យើងអាចឡើងទៅកន្លែងត្រួតពិនិត្យលិខិតឆ្លងដែនតែម្តង។
រថភ្លើងចេញដំណើររាល់៣០នាទីម្តង និងមានកន្លែងរង់ចាំរថភ្លើងបន្ទប់ម៉ាស៊ីនត្រជាក់៕
