[Rasmei Kampuchea Daily News] - ទេសរដ្ឋមន្ត្រី ស៊ុន ចាន់ថុល គូសបញ្ជាក់ជាថ្មី អំពីសារៈសំខាន់ នៃការអភិវឌ្ឍផ្លូវនាវាចរណ៍ ទន្លេបាសាក់
ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន កាលពីថ្ងៃទី២៧ ខែកក្កដា ឆ្នាំ២០២២ បានអញ្ជើញដឹកនាំ កិច្ចប្រជុំពិភាក្សា និងពិនិត្យវឌ្ឍនភាព ការងារសិក្សា និងជម្រើស ស្តីពីការតភ្ជាប់ផ្លូវនាវាចរណ៍ និងប្រព័ន្ធភស្តុភារកម្ម ទន្លេបាសាក់ ដោយមានការចូលរួម ថ្នាក់ដឹកនាំក្រសួង និងមន្ត្រីជំនាញពាក់ព័ន្ធ ពីអង្គភាពឱវាទក្រសួង។
លោកទេសរដ្ឋមន្ត្រី បានគូសបញ្ជាក់ជាថ្មី អំពីសារៈសំខាន់ នៃការអភិវឌ្ឍផ្លូវនាវាចរណ៍ ទន្លេបាសាក់ ដើម្បីជំរុញការដឹកជញ្ជូន តាមផ្លូវទឹកនៅកម្ពុជា ដែលអាចជួយកាត់បន្ថយ ការចំណាយលើការដឹកជញ្ជូន និងភស្តុភារកម្ម និងមានប្រសិទ្ធភាពជាងមុន ព្រមទាំងងាយស្រួល ធ្វើសមាហរណកម្មផ្ទៃក្នុង ក្នុងវិស័យដឹកជញ្ជូន តាមផ្លូវទឹកផងដែរ។
បន្ទាប់ពីមន្ត្រីជំនាញរបស់ អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានធ្វើបទបង្ហាញ អំពីវឌ្ឍនភាពនៃ ការសិក្សា និងជម្រើស ស្តីពីការតភ្ជាប់ផ្លូវនាវាចរណ៍ និងប្រព័ន្ធភស្តុភារកម្ម ទន្លេបាសាក់ និងមានការចូលរួម ផ្តល់មតិយោបល់ ក៏ដូចជា ធាតុចូលពីថ្នាក់ដឹកនាំ ពាក់ព័ន្ធរួចមក លោកទេសរដ្ឋមន្ត្រី បានជំរុញឱ្យក្រុមការងារ ធ្វើការសិក្សាឱ្យបានស៊ីជម្រៅលម្អិត និងគ្រប់ជ្រុងជ្រោយបន្ថែមទៀត ដើម្បីដាក់ជូនភាគី ពាក់ព័ន្ធពិនិត្យពិចារណា៕
