[Reasmey Kampuchea] - ស្ពានអាកាសផ្សារដីហុយនឹងបើកដំណើរការបណ្តោះអាសន្ននៅថ្ងៃទី១២ខែមេសានេះហើយ
ភ្នំពេញ ៖ ស្ពានអាកាសនៅត្រង់ភ្លើងស្តុបផ្សារដីហុយឬហៅថាស្ពានអាកាសទី៥ដែលទទួលការស្ថាបនាដោយក្រុមហ៊ុនចិននិងជាអំណោយរបស់ប្រទេសចិននឹងត្រូវបើកឱ្យដំណើរការនៅថ្ងៃទី១២ខែមេសាឆ្នាំ២០១៨មុនពេលបុណ្យចូលឆ្នាំខ្មែរមកដល់នេះហើយ។
បើតាមលោក ស៊ុន ចាន់ថុល ទេសរដ្ឋមន្ដ្រី រដ្ឋមន្ត្រីក្រសួងសាធារណៈការ និងដឹកជញ្ជូនបានឱ្យដឹងក្នុងពិធីបើកឱ្យប្រើប្រាស់ ជាបណ្តោះអាសន្ន គម្រោងរថភ្លើង ដឹកអ្នកដំណើរ ភ្នំពេញ-ព្រលានយន្ដហោះអន្តរជាតិភ្នំពេញនាព្រឹកថ្ងៃទី១០ ខែមេសា ឆ្នាំ២០១៨ នេះថាស្ពានអាកាសមួយកន្លែងនេះគឺបើកឱ្យពលរដ្ឋធ្វើដំណើរជាបណ្តោះអាសន្នសិនមុនចូលឆ្នាំខ្មែរដើម្បីជួយបញ្ច្រៀសការកកស្ទះចរាចរណ៍។សម្រាប់ការសម្ពោធជាផ្លូវការនោះវិញនឹងត្រូវធ្វើឡើងក្រោមអធិបតីភាពដ៏ខ្ពង់ខ្អស់ពីសំណាក់សម្តេចតេជោហ៊ុនសែននាពេលក្រោយទៀត។
មុនសម្រេចជោគជ័យបើកឱ្យដំណើរការស្ពានមួយកន្លែងនេះត្រូវបានក្រុមការងារសាងសង់សម្រុកយ៉ាងមមាញឹកទាំងយប់ថ្ងៃរហូតសម្រេចជោគជ័យមួយភាគធំដែលអាចបើកឱ្យអ្នកធ្វើដំណើរឆ្លងកាត់បានចាប់ពីថ្ងៃទី១២ខែមេសាឆ្នាំ២០១៨នេះតទៅ។
គួរបញ្ជាក់ថាស្ពានអាកាសផ្សារដីហុយស្ថិតនៅផ្លូវប្រសព្វ រវាងផ្សារដីហុយ មហាវិថីសហព័ន្ធរុស្ស៊ី និងផ្លូវហាណូយ ដែលមានប្រវែង៦០៥ម៉ែត្រ និងទទឹង១៧ម៉ែត្រ។វាជាគម្រោងស្ពានអាកាសទី៥ នៅរាជធានីភ្នំពេញ ដែលត្រូវបានបើកការដ្ឋានសាងសង់ចាប់តាំងពីខែសីហា ឆ្នាំ២០១៦ ដោយក្រុមហ៊ុនសាងសង់ OCIC ក្រោមហិរញ្ញប្បទានរបស់សាធារណរដ្ឋប្រជាមានិតចិន៕
