(ព្រះវិហារ)៖ លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានថ្លែងប្រាប់មន្ត្រីដោយហាមដាច់ខាតផ្តល់បណ្ណបើកបរដល់អ្នកដែលគ្មានមុខមកប្រឡង និងធ្វើការណែនាំដល់មន្រ្តីត្រូវឲ្យរថយន្ត ដឹកទំនិញធុនធ្ងន់ទាំងអស់ បើកឆ្លងកាត់ស្ថានីយ៍ថ្លឹងរថយន្ត ដាច់ខាតត្រូវចូលថ្លឹងទាំងអស់ដោយគ្មានការយោគយល់នោះទេ។ ចំពោះមន្ត្រីដែលប្រព្រឹត្តល្មើសត្រូវទទួលខុសត្រូវដោយខ្លួនឯង។ ថ្លែងក្នុងកិច្ចប្រជុំឆ្លងរបាយការណ៍លទ្ធផលការងារខែកក្កដា និងលើកទិសដៅអនុវត្តសម្រាប់ខែសីហា របស់មន្ទីរសាធារណការ និងដឹកជញ្ជូនខេត្តព្រះវិហារ នៅថ្ងៃទី២១ ខែកក្កដា ឆ្នាំ២០២២នេះ លោក សំ លាងទ្រី ថ្លែងថា មួយរយៈកាលកន្លងមកនេះ លោកទទួលបានព័ត៌មានមិនល្អមួយចំនួនរបស់មន្ត្រីនៅក្នុងមន្ទីររបស់យើងមិនមានមូលដ្ឋានពិតប្រាកដនោះទេ ពោលគ្រាន់តែគេដើរនិយាយ និងបង្ហោះក្នុងគ្រុបតេឡេក្រាម អាចក្នុងន័យមូលបង្កាច់ និងបង្ខូចឈ្មោះមន្ត្រីយើងក៏ថាបាន។ ប៉ុន្តែទោះជាយ៉ាងណា ក្នុងនាមមន្ទីរសាធារណការ និងដឹកជញ្ជូនខេត្ត ពិសេសដោយអនុវត្តតាមការណែនាំពីលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន, លោកបានហាមដាច់ខាតដល់មន្ត្រី ពិសេសមន្ត្រីជំនាញតាមការិយាល័យមួយចំនួន ពាក់ព័ន្ធនឹងការផ្តល់បណ្ណបើកបរ បើគ្មានមុខមកប្រឡងទេគឺហាមផ្តល់បណ្ណបើកបរឱ្យជាដាច់ខាត គេធ្វើណាបានគេទៅនឹងទៅ សម្រាប់មន្ទីរសាធារណការខេត្តព្រះវិហារ ដាច់ខាតមិនធ្វើឱ្យនោះទេ។ ពាក់ព័ន្ធនឹងរថយន្តដឹកទំនិញធុនធ្ងន់ដែលបើកបរឆ្លងកាត់ជញ្ជីង ដាច់ខាតត្រូវតែចូលថ្លឹង ចំពោះមន្ត្រីដែលប្រព្រឹត្តត្រូវទទួលខុសត្រូវដោយខ្លួនឯង។ សម្រាប់ព័ត៌មានដែលអ្នកដើរនិយាយត្រូវមានភស្តុតាងផង តើឡានដឹកអី លេខប៉ុន្មាន ដឹកថ្ងៃណា ម៉ោងប៉ុន្មាន កុំចេះតែមានមាត់និយាយដោយគ្មានមូលដ្ឋាន គ្មានភស្តុតាងច្បាស់លាស់។ លោក សំ លាងទ្រី ក៏បានថ្លែងណែនាំដល់មន្ត្រីទាំងអស់ ត្រូវយកចិត្តទុកដាក់បម្រើសេវាសាធារណៈជូនប្រជាពលរដ្ឋឱ្យបានល្អ ឱ្យបានរហ័ស និងត្រូវមកបំពេញការងារឱ្យទាន់ពេលវេលា មិនថាមន្ត្រីដែលនៅក្នុងមន្ទីរសាធារណការទេ មន្ត្រីជួរមុខនៅច្រកចេញចូលតែមួយដែលទាក់ទិនជាមួយមន្ត្រីសាធារណការក៏ដូច្នេះដែរ ត្រូវតែរហ័ស។ ជាមួយគ្នានេះ លោកក៏ប្រាប់មន្ត្រីទាំងអស់ ត្រូវចូលរួមគោរពទង់ជាតិឱ្យបានគ្រប់ៗគ្នារៀងរាល់ព្រឹកថ្ងៃច័ន្ទ និងត្រូវធ្វើពលកម្មសម្អាតបរិវេណមន្ទីរ និងនៅតាមការិយាល័យនានា ១ម៉ោងរៀងរាល់ល្ងាចថ្ងៃសុក្រ៕